Het oudt Huysken van Bethleem

met vele schoone leyssenen, lofsanghen ende andere geestelyke liedekens verciert, ter eere van den nieuwen gheboren Coninck onsen Salichmaker Christus Jesus

Een schoon Leysen

op den thoon van L’allemande la doulce.

Al zijnt nv droeue tijden,
Nochtans willen wy verblijden
In dien heylighen nacht,
Dat Iesus was gheboren,
Om ons die waren verloren,
Te verlossen wt s’Vyandts macht.
Lof Kindeken excellent,
Weest in mijn herte gheprent,
Verlicht nv door v cracht
Alle sondaers verblent.

Als acht daghen waren leden,

So wert Iesus besneden
Nader Ioodtscher Wet,
Sijn suyuer bloet ghepresen
Heeft ons altsamen ghenesen
Die met sonden waren besmet,
Lof soete Kindeken fijn,
Wy dancken v van v pijn,
Laet ons hier door t’ghebedt
Altijt patientich sijn.

Den naem Iesus verheuen,

Daer voor dat d’Enghelen beuen,
Die worde ghegheuen het Kindt,
In wiens naem nv lijden,
En teghen die sonden strijden
Sijn dienaers zeer bemindt,

[p. 59]

 

Lof heylich Kindeken goet

 

Wilt ons nv gheuen moet

 

En laet ons niet verblindt

 

In s’werelts teghenspoet.

 

Dry Coninghen van verre

 

Gheleydt door een claer sterre

 

Die sochten den Heere bemindt,

 

Als zy tot Bethleem quamen

 

Haer schatten zy op namen,

 

Die zy offerden het Kint,

 

Lof Kindt ghebenedijt,

 

In v mijn herte verblijdt,

 

Sijt op my niet quaet ghesint

 

Om mijnen verloren tijdt.

 

Met grooter weerdicheden

 

Hebben zy dat Kindt aenbeden

 

Op sijns Moeders schoot,

 

Al waren zy Heeren van machten,

 

Sy kenden des Kindekens crachte

 

Door haer ghelooue groot.

 

Sy aenbaden daer present

 

Die Godtheyt excellent

 

Besloten sonder noot

 

In een cleyn lichaem ient.

 

Naer de veertich daghen

 

Wilde t’Kindt sijn ghedraghen,

 

En inden Tempel ghebracht,

 

Symeon oudt van jaren

 

Dede hy openbaren

 

Sijn Goddelijcke cracht.

 

In sijnen armen hy t’Kindt nam,

 

Voorsegghende bequam,

 

Dat tçleyn Kindt groot van macht

 

Dus alle verlossen quam.

[p. 60]

 

Eenen sanck heeft hy ghesonghen,

 

t’Kindt aen sijn herte ghedronghen,

 

Met liefden heeft hijt ghecust.

 

Laet nv Heer in vreden

 

Vwen dienaer treden

 

In v eewighe rust.

 

Mijn ooghen hebben ghesien

 

Datter salicheyt sal ghechien

 

Naer alle Menschen lust,

 

Die tot Godt sullen vlien.

 

O lieflijck Kindeken cleyne,

 

Maeckt ghy mijn herteken reyne,

 

Van alle sonden bloot,

 

Want ghy zijt alleyne

 

Heer Iesus die ick meyne,

 

Troost my in mijnen noot,

 

Cleet my met liefden groot

 

In d’uere van mijnder doot,

 

Verlost my van weyne

 

En van des Vyandts stoot.