Het oudt Huysken van Bethleem
(1590)–Hendrik de Coster–
Auteursrechtvrijmet vele schoone leyssenen, lofsanghen ende andere geestelyke liedekens verciert, ter eere van den nieuwen gheboren Coninck onsen Salichmaker Christus Jesus
[pagina 53]
| |
Op de wijse. van Hoc In templo summe Deus.O Iesus alder soetsten naem,
Onser salicheyt seer bequaem,
O Iesus salichmaker groot,
Die de sielen helpt wt den noot,
Soeten naem Iesus weest gegroet,
Die onser allen herten voet.
Hoe soet is v memorie,
Hoe lieflijck is v glorie,
Om v Iesus ons hert verheucht
Want ghy zijt onsen troost en vreucht.
Soeten naem Iesus weest ghegroet, etc.
Bouen vreuchden sonder maten,
Allen seem, en honich graten,
En bouen alle soeticheyt,
Gaet Iesus inder eewicheyt. Soeten, etc.
Mocht ick v Iesum eens smaeken
Mijn siele sou haer vermaken,
Want die v eens const aenschouden,
Sou eewich wesen behouden. Soeten etc.
Men mocht niet lustigher singhen,
Beter noch bequamer dinghen,
Noch oock aenghenamer dincken,
Dan Iesus name sien blincken. Soeten etc.
Ghy zijt betreedt die v soecken,
Behulpich die hem vercloecken,
Om Iesus naem te belijden,
En hun herte te besnijden. Soeten etc.
Die weder comt in uwen schoot,
Verlost ghy van d’eeuwighe doot,
Die haer tot v Iesum keere,
| |
[pagina 54]
| |
Sijt ghy een ghenadich Heere. Soeten etc.
In v zijn alle rijckdommen,
Schatten om niet te versommen,
Iesu ghy zijt dopperste goet,
Die ons hier allen deuchden doet. Soeten etc.
Gheen tonghen souden vertellen,
Noch oock gheen letteren spellen,
Noch verstaen moghen ons sinnen,
Wat Iesus is te beminnen. Soeten etc.
O Iesus v overdincken,
Is my eten ende drincken,
O Iesus v soete inspraeck,
Weert mijn hertte van allen vaeck. Soeten etc.
Mijn hert is gheheel doorsteken,
Het schijnt van my nv gheweken,
Om dat soo seer naer Iesum snaeckt,
D’welc hy maer heeft van ver geraect Soeten etc.
Als wy tot v soo seer branden,
Beswijcken voeten en handen.
Want Iesus liefde soo versterckt,
Dat elck zijn lichaem niet en merckt. Soeten etc.
Tot v mijn bloet is ontsteken,
Om v mijn hert ick moet breken,
Als mijn hertte soo naer v craeckt,
Sonder Iesum ydel en naeckt. Soeten etc.
Weer ick gaen, oft weer ick staen.
Altijts soo roep ick Iesum aen,
Weer int eynde, weer int d’beghin,
Altijts valt hy my inden sin. Soeten etc.
V liefde die gaet bouen al,
V minnen wy sonder ghetal,
Want ghy Iesus ons hebt bemint
Meer dan een Moer haer eygen Kint. Soeten. etc.
Hoe ons v v liefde meer vermaeckt,
| |
[pagina 55]
| |
So meer ons hert naer Iesus haeckt,
Hoe Iesus ons meer deucht bewijst,
Meer tot Iesus ons Siel verrijst. Soeten. etc.
Den naem Iesus doet ons veel deucht,
En is der Sielen troost en ieucht,
Sijn liefde ons tot Iesus weckt,
En meer en meer tot Iesus treckt. Soeten. etc.
Duysent mael wy v begeren,
Wilt v ten laetsten verneren,
Om ons, Iesus, te versaden,
Eer onse daghen verspaden. Soeten. etc.
Hoe aenghenaem zijt ghy present,
Hoe begherlijck zijt ghy absent,
O Iesu wie sou v deruen,
Die v eens mochte verweruen. Soeten. etc.
V die smaeckt die blijft hongherachtich,
En die v drinckt blijft dorstachtich,
Want zy begeeren niemant meer,
Dan Iesum hunnen lieuen Heer. Soeten. etc.
Iesus hope der sondaren,
Laet v liefde openbaren:
Want tot v onse roepen vlien,
Wilt toch onse tranen aensien. Soeten. etc.
Onse herten tot v suchten,
Tot v alleen wy hier vluchten,
O Iesu wilt ons nv hulpen,
En ons bitter weenen stulpen. Soeten. etc.
Ghy Iesu hebt ons eens verlost,
d’Welck heeft v eyghen bloet ghecost,
Weert oock nv des duyuels aenstoot,
Die ons hier ouervalt seer groot. Soeten. etc.
Prince, Aensiet ons groot lijden,
En wilt ons ghebenedijden,
Gheeft ons hier rust peys en vrede,
En glorie naermaels mede. Soeten. etc.
|
|