Aen Iacob Pietersz vander Molen, Leeraer of Vermaender vande Vlaemsche Doops-ghesinde.
HEt zijn nu ontrent seven Iaren gheleden, dat ick u vander Molen by Brief vermaende, my te vvillen bevvijsen tot mynre, ofte u selfs verbeteringhe, dat u uyterlijcke Ghemeente vvare de vvarachtighe Kercke Christi, ende ghy daer in een vvarachtich Leeraer of Sentbode Gods, ende dit overmits ick hadde hooren segghen, dat ghy de voornemelickste aendrijver zy gevveest, tot het bannen eeniger vromen Luyden &c. ghy en hebt my doe ter tijt geen antvvoorde gevvaerdicht. Ende al hoe vvel ick in meeninge vvas, anderen voor uvve dolingen te vvaerschouvven in druck, so vvert dat by my doe ghelaten uyt medooghen van u volckxken, niet hatelijcker dan sy vvaren te maken by den ghenen, die u luyden van self niet dan te veele en hatede, ende gheloof hadden by den machtighen, alsoo liet ick u berusten tot nu toe, als ick sach in druck uytkomen u boecxken, genaemt Defensio in 't Iaer 88. in vvelcks Voorreden ghy eenigen, sonder die te noemen zvvaerlijck van zvvare saken beschuldight: poghende in't boeckxken selve oock te vvederlegghen sommighe saken by my in eenighe myne uytghegeven boecxkens gheschreven, die ick als noch moet vvaer te zijn houden, u schrijven teghen myne, vvert by my in gheschrift overvveghen, ofte ick ergens gedoolt mochte hebben, dat Menschelick is. Ick boot u by Sentbrief aen dit myn gheschrift, voor't uyt gheven in druck, met u selfs inder liefden te ondersoecken, of by my, dan by u, of oock by ons beyde, doling mochte sijn, ghy vveygerdet, maer vvilde mijn Schrift vvel lesen, soo icks u vvilde senden, dat dede ick met gedinge, dat ghy my t'selve vveder sout senden binnen acht daghen, soo ick dan dacht te vertrecken, die tijt seyde ghy u te kort te zijn, ende is mitsdien alsulcks achter ghebleven, na dien ick dan sie in u schrijven aen my vanden 13. Aprilis. 88. dat ghy luyden ongaerne u leere ende sendinghe verdadinght aen den genen die buyten u Gemeente sijn, soo ick ben: oock dat ghy niet en lijdt eenich vvederspreken vanden uvven, als dien teghen sulcke metten van disputeert: meynende also u Leer te drijven, sonder ghehouden te zijn van die teghen yemanden te verantvvoorden, soo hebbe ick niet konnen laten uvve dolinge my daer voor bekent tot vvaerschouvvingh, vande onvvijse hertkens in druck te bevvysen: die by my u aengeboden vvaren in't voorgemelde mijn Schrift, op hope, of yemant daer door voor verleydinghe voorhoet ende eenighe verleyde, ofte oock Verleyders selve, van haer onvvegh afghevvesen mochten vverden. Hier inne en heeft my nu geen belet ghevveest, uvven Vyanden beduchte vermeerderingh van hate alsoo, haer macht nu nerghens na soo veel als voormaels, haer vvil mach versellen, sulcks dat dit mijn schryven nu niemant, noch u lieden selfs mede niet, schaden, maer vvel vele menschen nut mach vvesen t'vvelck van den Heere vvert ghevvenscht. By my
V ende alder Menschen Dienstschuldigher
D. Coornhert.
Auteursrechtvrij