Van 't kerck-bouwen der dooperen opten waenscherm

(1630)–D.V. Coornhert– rechtenstatus



[Folio 4r]
Van't Kerck-bouwen der Dooperen Opten aenscherm. Van I.P.V. Molen, (Dienaer der Vlaemsche Doops-ghezinde Ghemeynte) ghenaemt Defensio, aenwijsende, dat syn duystere Pijlkens te rugghe stuytende, treffen haren blinden Schutter, ende niet D.V. Coornhert. Handelende: 1. Van 't vervallen der Apostolischer Kercken. 2. Der vvederoprechtighen, sendinghe ende bevel. 3. Vander Kercken sichtbaerheydt ende onsichtbaerheydt. 4. Of niemandt sonder uyterlicke Sacramenten te ghenieten een Christen magh vvesen. 5. Van't onderscheydt der Christenen.
Aen den Leser. DAer is niet dan een ware Kercke Christi. Vele Kercken zijnder nu opgeresen. Elck vande selve noemt zich de ware, en al d'andere valsche Kercken, t'magh zijn dat het geen van alle dese en is: ymmers het magh niet zijn dat zijt alle syn. Nu vintmen Luyden, die noch in gheen van alle de voorsz Kercken en syn, noch oock niet van zinne en zijn, zich daer inne te begeven. Oock syn eenighe soo stijf daer in dat sy die niet willen begeven. andere syn met twijfel daer inne, of twijfelen daer inne te gaen. Niet voor de twee eersten, maer voor de twee laetste wert hier geschreven. Want d'een sal syn uytganck vorderen, maer d'ander syn inganc laten mogen, ist maer dat sy inder waerheyt komen te verstaen, de schadelicke dolingen der Vlaemsche Doops-gezinde. Die werden eensdeels tot dien eynde hier ontdeckt. Door u aller Dienstschuldighe D.V. Coornhert.