Schole der deughden

Cap. IX.

Godes eer wort niet vermindert in't segghen dat de menschen willigh sijn gaven ontfanghet.

Wat reen moghen de bedelaers hebben by Gode: ⁺ of sy schoon al by den menschen rechtelijck te prijsen zijn? gheven sy Godt yet? of doen sy Gode eenig nut, dienst, ofte weldaet, neen neen, niet altoos, maer sy ontfangen, sy ghenieten den nut ende henlieden gheschiet ghenadighe weldaet. Wat oneere is hier oock inne gheleghen voor Gode? heeft die niet soo wel van't beginne als van't middel ende eynde zijn volle eere in sulcke ghenadighe beschenckinghe aen die ootmoedighe oude begeerlijcke ontfanghers! werckt Godt hier niet door sijn licht der ghenaden den hate der sonden, de begheerte ter deughden ende den goeden wille, jae oock het vol-brengen vandien dit werckt ende geeft, Godt ghenadelijck: de mensche lijdet ende ontfanghet willighlijck: is dit mede-wercken des menschen eenigh verminderinghe vande Goddelijcke eere? Godt selve heeft niet ghewilt dit alles wercken inden mensche sonder des menschen toe-stemmen wille ende mede-wercken: Ist Gode een vercleyninghe sijnder eeren te doen 'tgunt sijn wijsheyt van eeuwigheyt ghewilt heeft soo te sullen gheschieden? Even soo weynigh als het Godes eere een verminderen is gheweest dat hy door mede-werckinge Pauli ende der anderen Apostelen het Rijcke sijns Soons heeft willen op-rechten. Ghy mocht nu sien dat Godt den mensche niet en treckt met ghewelt, nochte sonder, maer met den menschen wille, het zy dan oock of ghy't neemt dat hy den mensche een nieu oore gheeft, want dat moet ontfanghen zijn, welck ontfanghen des

+ Roma. 4. a. 2.

[fol. 478v]

menschen werck is: ofte oock soo de Heere het vleeschelijcke oore besnijdet ofte het verstopte opent: want de mensche die sulcx sal lijden daer oock toe-stemmen ende in bewilighen moet, 'twelck mede des menschen werck is. Daerom seydt de Propheet wet: de Heere heeft my het oore gheopent, maer ick en wederspreke hem niet, siet dat openen is Godes werck: maer het niet weder-spreecken is des menschen lijden, comende uyt des menschen werck van bewilligen in dat ghedooghen.