Cort Besluyt van't derde stuck.
ALsoo is hier int ondersoecken van dit derde stuck mede ghebleken soo uyte woorden des Katechismi, als uyt Kalvijns, Besa, ende Bullingers eyghen woorden, oock uyte Heylige Schrift selve: dat de Vaders ende Voorstanders van dese Katechismo sullen moeten bekennen in dese antwoorde opte vijfde vraghe groflijck ghedooldt te zijn: of sy sullen moeten segghen dat Christus in genen mensche hier en regneert, dat het Beelde Christi in gheen mensche heel is vernieut, dat Godt door Christum den menschelijcken gheslachte niet en is versoent: dat Adam machtigher is om verderven dan Christus om ghenesen, ende dat Christus niet en heeft moghen volbrengen 'tghene hy ons is ghekomen in den vleesche.
Of sy sullen moeten bekennen ('twelck doch hier voor oock is bewesen) dat de gheneghentheydt om Gode ende den Naesten te haten, niet en blijft inden mensche, die gants vernieut is door de wedergheboorte, oock dat de natuere der bekeerden tot Christum niet quaedts meer in haer en heeft, maer geheel goet is, ende datter kinderen Gods zijn die niet en sondighen.
Auteursrechtvrij