Van den aflaet Iesu Christi

V. Capittel.

Wat ghetuychnissen hier meest sullen ghebruyckt werden.

HEBRON.

Schrift is lichtelijcker veel, dan wel te allegeren. Hattus. So houde icx mede, maer heb icks niet wel ghedaen berispt my. Wel aen om sulcx my te overkennen hebdy stofs ghenoech in dat boecxken van de Onderdanicheyt by my u terstont ghedaen. Daer is veel Schriftuers geallegeert. Dat en hebben uwe Leeraren tot noch toe niet een eenich woort niet berispt. Leght dat hier voor ons, ende begint wercks, ick sal hooren ende antwoorden. Hebron. Neen nu niet, ick wils eerst alleen met ernst door lesen, of wy de oude vaderen middeler tijt gebruyckten. Daer soude blijcken dat dese uwe opinie nieu ende wederschriftelijck is. Hattus. Neen, maer dat zy out ende schriftelijck is. Hier toe ben ick bereyt. Maer vraghe eerst of ghy der oude vaderen schriften in allen, gheloove gheeft. Hebron. Jae in allen daer zij over een stemmen mette heylige Schriftuere. Hattus. Soo souden wy verlooren moeyten doen int allegeren van heure schriften. Hebron. Hoe dat? Hattus. Staet het gheen zy seggen oock inde heylige Schrift, so en behoeven wy der Vaderen seggen niet. Staet het niet inde heylige Schrift, soo en gelooft ghy der Vaderen seggen niet. Hebron. Wat bewijs sullen wy dan gebruycken. Hattus. Niet der oude maer der nieuwe heylige Vaderen schriften. He- ⁺ bron. Wat vaderen sijn datte. Hattus. Weet ghy dat niet? u Nederlandsche Predicanten noemen heure heylige Voor-vaderen te wesen, Luther, Zwingel, Oecolampadium, Capito, Bucer, Melanthon, Martijr, Bullinger , en de Calvijn. Met weynighe van desen sal ick my vernoeghen om kortheydts wille, immers met Calvijn alleen. Hebron. Meyndy dat ick wil gehengen dat ghy met my handelt uut Calvini schriften? Hattus. Meyndy dat ick my dat van u wil laten verbieden? Waerom soudy my niet toelaten, 'tgheen ghy self doet teghen anderen? Dan Catholijcken bevecht ghy met heure eygen Concilien, Decreten, Doctoren ende Theologienen, den Doperen mette schriften van Menno van Dirrick Philipssen ende anderen, ende den Confessoren metten schriften van Luther, van Brentio ende anderen. Waerom soude ick tegen u luyden u Calvini schriften niet te velde brenghen? acht ghy't by u luyden voor een loflijcke victorie, datmen zijn wedersaecke treffe met zijn eyghen swaert: met wat recht moeghdyt my verbieden? Ick en laets my voorts meer van niemande verbieden? Hebron. Sullen wy dan nerghens meer mette Godlijcke schrift bewijsen? Hat. Daert u ende my gelegen sal zijn. Mijn meyning en was terstont niet om die heylige Schrift uut te sluyten, O Neen, maer wel dat ick nu daer met alleen niet en wilde handelen so ick heb gedaen in dat boecxken. Ik wil oock hier nu mijn meyninge niet bevesten met u Calvini schriften, als oft die Evangelie by my waren, dat verde van daer is, maer betoonen uut hem dat ghy my om dese mijne meyninge niet en mocht schelden, sonder u Calvijn self oock te schelden ende u luyder mont met zijn meel selve te stoppen.

+ Sent-brief tegen tbergico boec pag. 19.