|
| |
¶ Dits dat xxviij.ste boeck daer in vertelt wert hoe dat eneas ende anthenor te samen ordineerden ende dachten hoe dat si die stat van troeyen verraden souden ende dat si die dan den griecken leueren souden
ENde wanneer als die troianen in aldustaniger groter droefheyt waren besloten. soe hadde anchyses met eneas sinen soon. ende anthenor met polydamas sinen soon raet. hoe dat si haer leuen alre beste souden mogen behouden op dat si vanden griecken niet en werden verslagen. ende mochten si anders ghene weghe vijnden soe wouden si die stat van troeyen verraden. waer om dat si doe onderlinghe oerdineerden met coninc priamus te spreken dat hij soene versoecken soude aen den griecken Ende dat hij coninc menelaus helena sijn wijf soude weder gheuen Ende dat hij oec beterde die scade die paris ghedaen hadde sijn soon inden eylande van cytherea Mer hoe genuechlijcken soude dat coninc priamus geweest hebben. hadden hem die grieken alsulke ouerdrachte willen gonnen. want dan soude hi ende syn wijf | |
| |
ende sine kinderen die doe noch leueden. ende sine burgheren hebben mogen bliuen in gesonden langhen liue ende leuen. mer deser heren opsette van payse ende van vrede te maken. ende dat te versoecken aen den gryeken dat en was anders niet dan onder een subtijl bedectheyt ende cloecheyt die stat van troeyen te verraden om dat si haer lijf ende hare goeden souden moghen behouden Ende wanneer als si dit te samen hadden ghesloten in haren raet om dit te volbrenghen so quamen si te samen tot coninc priamus ende si rieden hem dat hi eendrachticheyt soude versoecken aen den griecken ende daer was op die tijt bi coninc priamus. sijn meeste bastaert soen. die gheheten was amphimachus. ende vele ander edelinghen vter stat van troeyen Ende doe coninc priamus hoerde dat anthenor ende eneas hem ryeden aen den gryecken eendrachticheyt. ende soene te versoecken so dochte hi in hem seluen dat si dat niet en deden om minne of om vrientscappe of om enighe trouwe Ende coninc priamus die versuchte hem seer swaerlijcken daer om Ende daer nae soe antwoerde hi hem. dat hi daer een wijl tijts woude sijn beraet op nemen Doe seiden si beyde gader tot coninck priamus. wilstu alhier op raet houden. soe hore ten eersten onsen raet Ende is dat sake dattu dan enen beteren raet vindeste dan den onsen. soe en moghestu dan dien raet ghebruycken ende doen. mer coninck priamus die en openbaerde hem niet die gedachten sijns herten. mer hi antwoerde hem beyden aldus Ic en wil uwen raet nv niet versmaden. op dat hi goet is. ende is dat sake dat hi niet goet en is. soe en wert niet toernich dat ic enen beteren raet volge Doe stont anthenor op. ende hi sprack dese woerden Ghenadighe heer coninc onse voersichticheyt. die en mach niet vertoeuen te openbaren in wat groter vresen ende anxten dat ghi nv op dese tijt sijt. ende alle uwe ondersaten. want ghi nv te hant al omme beuanghen ende begrepen sijt van uwen vianden. ende die oec anders niet en verwachten noch en begheeren dan uwen ende uwer ondersaten doot ende uwe verderffenisse Onder welcken dat meer sijn dan vijftich coninghen. die anders niet en begheeren noch in haren sinnen ende ghedachten en hebben dan dese edele scone stat neder te worpen ende te gronde te verderuen ende destrueren Ende die ghene die nv leuen ende bi v sijn die en sijn niet also machtich. dat si v mogen bescutten of beschermen. of dat si mogen die grieken verwinnen. want | |
| |
ghi sijt gecomen tot alsulcker ommachten dat ghi uwe poerten niet en dorret laten ontsluyten. ende ghi en wetet te hant niet meer hulpe te verweruen. want alle uwe vrome stoute sonen die sijn ghebleuen inden strijde. ende oec mede dat meeste deel van uwen volke ende uwen ondersaten Ende wi sullen oec mede aldus steruen. ouermits ghebreck ende hongher. want wij alhier binnen der stat moeten bliuen met besloten poerten Ende alhierom so isset goet datmen van tween quaden dat minste quaet verkiesen sal Ende dat wi aen den grieken versoeken soen ende vrede. ende dat ghi coninc menelaus weder gheuet sijn wijf helena om welcke helena dat also menich edel man is verslaghen. want paris v lieue soon van aertrijcken is verscheyden. ende datmen oec die grieken beter ende weder gheue. alsulcke ghebreken ende scaden. als paris v soon dede inden eylande van cytherea Doe stont op amphymacus priamus des conincs bastaert soon. ende hi weder riep anthenors raet ende sijne woerde. ende hi seide tot hem aldus Och wat hope mach coninc priamus van dij hebben. ende wij alle gader mede met hem. wanttu biden coninc ende bider stat hebben soudeste enen goeden vasten getruen moet mer nv soe begint di alrede te twyuelen Ende du radeste dinen here dijnen coninc dat hi hem seluen soude vernederen. ende dat hi aen den griecken pays ende vrede soude versoecken ende du soudeste dijns conincs edelheit eeren ende verheffen Ende sonder twiuel dinen raet die is hert ende quaet. want wi willen noch lieuer verliesen twintich duysent menschen eer dat geschien soude dattu dinen heer dinen coninc radeste. want dinen raet die en quam nye wt goeder getruwer herten ende minnen. mer hij comt wt dwalinghe ende wt verradenisse Ende noch veel meer scandelike ende confuyselike woerde sprack amphymacus coninc priamus bastaert soon tegen antenor Mer eneas die arbeyde met goeden soeten bequamen woerden. om amphymacus herde woerde te verwinnen ende hi seyde want wi te hant genen hope en hebben dat ons enige meer hulpe comen sal ende wi oec onsen poerten niet en dorren ontsluyten noch tegen onsen vianden meer strijden. soe en moghen wi niet beters doen. dan tegen onsen vianden te tijde pays ende vrede te maken Doe wert coninc priamus van desen woerden seer toernich. ende hi en mochte sinen toern niet langher verhuyden noch verbergen. mer hi versprac antenor ende eneas in deser manieren. ende seide aldus Hoe moechdij nv alle beyde sonder scaemte tegen mi | |
| |
aldus mit ontruwen wesen beroert want v opset ende uwen raet die doet mi aen v twiuelen. want so wat dat ic ghedaen hebbe tot deser tijt toe dat hebbe ic altoes noch gedaen bi uwen rade van v beyden O du here anthenor. hadde ic di niet selue ghesent inden lande van griecken om te verweruen exionas mijn suster Ende doe du weder quaemste. soe wasset uwen raet dat ic paris minen soen senden soude inden lande van gryeken Ic en soude dat selue niet ghedaen hebben hadde mi ghedaen die vermaninghe van v die mi daer toe brochte Ende du eneas. doe du waertste met paris minen soen waerstu doe niet dat opset dat paris mijn soen rouen ende nemen soude helena die conincinne ende du holpste hem helena nemen ende rouen ende in onsen conincrijcken brenghen. ende haddet ghi op die tijt paris dat ontraden bi auentueren helena die conincinne die en soude nye ghesien hebben die hoghe muyeren vander stat van troyen Ende nv na der doot alre mijnre vromer stouter kinderen. ende na aldus menich swaer verdriet ende scade so staet ghi op mit uwen opsette ende ghi radet oneerbaerliken ende ontameliken aldusdanige saken teghen mi Ende ghi radet mi aen den gryecken soene ende vrede te versoecken. die welcke dat mi aldus iammerliken ende deerlicken hebben verdoruen Ende sonder twiuel al daer om soe en staet mi alsulken raet niet te prisen noch te volghen met welken rade dat ic mijn leuen brenghen soude tot enen quaden eynde in groter scanden ende oneren Ende eneas die hadde oec veel herder woerden teghen coninc priamus ende met desen woerden sijn eneas ende anthenor ghegaen van coninck priamus. mit enen quaden toernighen moede
| |
¶ Hoe dat coninc priamus insettede datmen anthenor ende eneas verslaen soude.
COninc priamus die was vtermaten seer bedroeft ende hi screide veel tranen. doe hi merckede ende vernam dat anthenor ende eneas die stat van troyen wouden verraden ende leuerense inden handen der gryecken. welcke verraet hi dochte dat hi hem benemen soude. ende dat hise soude doen verslaen alle beyde Ende hi riep tot hem sinen bastaert soon amphimachus al heymeliken ende hi seide tot hem aldus O mijn alre liefste soen en bin ic niet dijn vader ende du biste mijn kint. want wi aldus verenicht sijn inder naturen ende inden bloede so willen wi wachten ende voerhoeden dat wi mit vresen der doot van malcander niet en werden verscheyden want ic weet dat wel dat dese twee. als anthenor ende eneas te samen geordineert hebben. dat | |
| |
die griecken ons verslaen souden ende si sullen onse goede stat van troyen verraden Ende alhier om soe en waerre niet an te misdoen. datmen hem dede dat ghene dat si wouden dat ons gheschiede. waer om dat ic gedacht hebbe dat wi dese twee. als anthenor ende eneas verslaen willen. is dat sake dat wi vermoghen want si sullen morgen auont comen te rade Ende wanneer als die raet ghesloten is. soe sulstu metten sommighen die ons goet ende ghetruwe sijn al heymeliken bliuen. ende dan sulstu dese twee met dinen hulperen seer wredeliken verslaen. welcke amphymacus gheloue coninc priamus sinen vader dat hi die sake ghetruwelijcken ende volcomelijcken soude volbrenghen. ende dat ghene dat si aldaer te samen ghesloten hadden dat souden si heymeliken houden. Mer wanter geen dinc also heymelijcken en gesciet noch en is. ten comt wel te laetsten wt ende wert oec openbaer. alsoe gheuiel dit met anthenor ende eneas. want si desen raet ende dese dinghen vernamen Ende doe swoeren si te samen onderlinghe. dat si die stat van troeyen verraden souden Ende waer dat sake datmense aldaer te rade riep. so en wouden si aldaer niet comen dan met groter menichuoudicheyt van volcke die wel gewapent waren. want in dien tyden. soe was eneas seer groot ende machtich van vrienden ende van magen binnen der stat van troyen Ende daer en was nyemant inder stat van troeyen alsoe rijck als eneas. waer om dat hi coninc priamus bicant gelijc was Ende dier gelijcken was oec anthenor Ende dese twee hadden verworuen ende vercregen vanden grieken met vollen orlof. waer dat sake dat si die stadt van troeyen mochten verraden ende die den griecken leueren. dat si dan alle die ghene die haer vriende ende maghe waren bescutten souden. dat si haer lijf ende goet souden behouden Ende binnen deser tijt ontboot coninc priamus eneas ende anthenor dat si te samen te rade souden comen om sonderlinge toecomende saken Ende coninc priamus die woude sijn opset volbrengen Ende wanneer als eneas ende anthenor waren ontboden. soe quamen si tot coninc priamus alsoe als si te samen hadden gesloten. met groter menichuoudicheyt der gewapender mannen Ende wanneer als coninc priamus dat vernam. so ontboot hi amphimacus sinen bastaert soon dat hi dat opset niet volbrenghen en soude. om ander saken wille die hy hem noch wel openbaren ende seggen soude
| |
¶ Dits vander versierder ende geveynsder bootscappe van eneas ende anthe-
| |
| |
nor om pays ende vrede te maken teghen den gryecken.
DEs anderen dages so ontboet coninc priamus alle die troyanen te rade bi hem te comen Ende wanneer als si alle gader ghecomen waren. so stont. eneas op ende hi riet den troyanen dat si pays ende vrede maken souden met den gryeken welke alle die troeianen dochte wesen goet ende si gauen daer consent toe. Ende wanneer als coninc priamus dit hinderen ende benemen woude so sprac eneas tot hem aldus Heer coninck wat wilstu veel arbeiden in desen dinghen want waer du wilste of en wiltste men sal spreken mitten grieken om pays ende vrede te maken tot dinen onwille Ende doe coninc priamus verhoerde dat hi dat niet benemen of hinderen en mochte so hadde hi dat lieuer mede te consenteren dan dat hi met sinen weder segghen een ongenuecht ende een twist onder dat volc ghemaect hadde Ende daer om seide hi tot eneas aldus Eneas also alst v best duncket wesen ghedaen also doet. want wat du doetste dat duncket mi wesen goet Ende doe wert aldaer in haren rade gesloten dat anthenor reysen soude totten grieken om rust ende vrede te maken met hem Ende wanneer als die raet was gecomen ten eynde soe clommen die troianen in een teyken des vreden op haren vesten ende muyeren ende si hadden ryse van oliue bomen in haren handen Ende doe die grieken dat versaghen ende vernamen. so deden si den troyanen ghelike teykenen van consente Ende doe deden die troeyanen anthenor climmen ouer die mueren vander stat Ende wanneer als hi quam onder die gryeken so wert hi gebrocht voer coninc agamenon. coninc agamenon ende die gryecken die beualen haren consente ende goetduncken Coninck crete diomedes ende vlixes Ende wat dese drie mit anthenor. die die vierde was ouerdroegen in desen dingen dat wouden die gryecken in dier seluer saken vast ende van waerden hebben tot ewighen daghen Ende dit swoeren die gryecken alle lieflijcken nae hare ewen ende nae haren manieren Ende wanneer als dese drie mit anthenor alleen waren. soe gheloefde hem anthenor rechteuoert. dat hi die stat van troyen verraden soude. ende dat hise den gryechen leueren soude. dat si haer wille daer mede doen souden behoudelijcken dat si eneas. ende anthenor versekeren souden haer lijf ende haer goet. ende oec mede alle die ghene daer si beyde voer baden dat die haer sijf ende haer goet behouden souden. ende dat si hem ghenen last noch verdriet aen doen en | |
| |
souden Ende dit swoeren dese drie heren anthenor volcomelijcken ende wel te houden Mer des soude hare opset heymeliken bliuen totter tijt toe datmen dat opset mochte volbrenghen Ende anthenor die vermaende hem drien seer hoghe. dat sij dat opsette heimeliken souden houden. om dat si dat alsoe veel te bet souden mogen volbrengen Ende om dat si oec soeken ende vernemen mochten een maniere. hoe dat si dit alrebest suptijlliken souden moghen volbrenghen. Ende om datmen hem alsoe veel te bet soude ghelouen. so bat hi den griexschen heren datmen met hem seynden soude. coninc calsibius. die welke dat seer out was. om dat hi ombedrieghelike soude ondersoeken den wille ende dat goet duncken der troeyanen. ende dat hi hem alsoe veel te bet soude mogen openbaren die begeerten der griecken. ende om alsoe te maken enen goeden vasten pays ende vrede Ende anthenor die bat den griecken oec mede op die tijt. dat si hem geuen souden dat lichaem van pentheselia der coninginnen. welck lichaem dat hi doe verwerf. ouermits sijnre beden willen Ende wanneer als anthenor oerlof hadde ghenomen anden griexschen heren. so quam hi rechtevoert met coninc calchybius binnen der stat van troeyen Ende daer nae dede hi coninc priamus te weten van sijnre toecomste
| |
¶ Dits die antwoerde van anthenor ende vanden bedriechgeliken pays ende vrede der grieken ende der troyanen onderlinghe
ENde des anderen daghes soe gheboot coninc priamus de burgheren van troeyen. dat si alle gader te rade souden comen. om dat si horen souden anthenors antwoerde Ende hi gheboot anthenor. dat hij daer segghen soude voer alden burgeren van troeyen. alle dat gene dat hi metten griecken ouerdraghen hadde Ende want anthenor sine valscheit ende sijn bedroch woude bedecken ende verhuyden so sprac hi grote lange redenen van veel woerden Ende hi seide ten eersten vander groter mogentheit der grieken. ende van hare grote eerbaerheyt ende warachticheit. ende vander vasticheit haerre bestanden ende vreden. want si binnen al haren strijden nye bestant noch vrede en hadde ghebroken Ende voert soe seide hi mede vander troyanen crancheyt. want si waren al soe verre ghecomen. dat si hem anders niet en onderwonden dan te suchten ende te screyen ende in groter bedroefenissen te leuen Ende hi seide bi desen redenen. dat hem gheen dinc profijtelijker noch oerbaerlijker en waer dan dat si den strijt laten souden. ende dat si weghe soeken souden des | |
| |
vreden. ende die te volghen op dat haer druc ende liden also mochte comen tot enen goeden eynde Ende voert so seide hi. dat si mitten griecken niet soenen en mochten. dan met groter oueruloedicheyt van goude ende van siluer op datmen hem also soude beteren haren groten scade ende verlies dat den gryeken was ghedaen Ende alhier om riet hi alden ghenen die ghelt hadden ende sonderlinge den coninc. dat si hare handen souden op doen om den gryecken te beteren alsulcke scade als si van hem luyden gheleden hadden want men pleget ghemeenlijcken te segghen Het is beter een ydelen budel. dan een bedroeft herte Ende want coninc priamus vanden grieken hare begheerten noch niet volcomeliken en conde noch en mochte verstaen. so begeerde ende prisede anthenor dat eneas mit hem reysen soude tot den griecken. op dat si also onder hem beyden vanden gryecken vernemen souden. wat dat hare begeerten waren. ende oec mede om dat die gryecken anthenor alsoe veel te bet souden gelouen Ende dat dochte alden troianen seer goet wesen waer om dat eneas anthenor ende coninc calchibius weder omme te samen reyseden totten gryecken Ende wanneer als die raet was ghecomen ten eynde so ghinc coninc priamus in sijnre salen alleen. ende hi wert bitterliken seer screyende ende wenende ouerdenckende in sijnre herten. alle die verradelike valscheden van anthenor ende van eneas Ende dat hi alle sine stoute vrome sonen hadde verloren. ende oec mede alsoe grote ombegripelicke scade hadde gheleden Ende nv dat noch alre quaetste was. dat hi hem seluen moeste verlossen wt der gheenre handen die hem also grotelijcken ende swaerliken hadden misdaen. ende dat hi alsoe comen soude in groter armoeden ouermits dat hi den gryeken soude moeten geuen. sijn gout sijn siluer. sijn ghesteenten. ende alle sine costelike cleynodien ende iuwelen. Ende doe seide hi nochtan in hem seluen Och of mi mijn leuen versekert waer Ende coninc priamus die was in dien tiden in alsoe groten swaren laste dat hi niet en wiste. wat hi best doen soude. want hi wert op die tijt aldaer ghedwonghen met foortsen dat hi haren wille volbrenghen ende doen moeste. die ghene die arbeyden nacht ende dach met groter naersticheyt. datmen hem verslaen soude Ende doe helena vernam dat die troeyanen pays ende vrede maken soude mitten gryecken ende dat eneas ende anthenor reysen souden so quam si inder nacht ende si bat anthenor seer oetmoedelijcken. dat hi doch sprake mit haren | |
| |
man Coninc menelaus. ende bidden hem dat hi haer doch wilde weder ontfanghen in vrientscappen ende in duechden Doe ghelouede haer anthenor. dat hi dat gaern doen soude. ende dat hi dat oec wel verweruen ende vercrigen soude van haren man coninc menelaus Ende binnen deser tijt so wert glaucus anthenors soon begrauen met groter eeren Mer pentheselia die coninginne. die en wert niet begrauen. want coninc philomenus die woudese voer hem voeren in haren conincrijcke van amasonien. daer si een coninginne van plach te wesen. om dat hi haer aldaer begrauen soude met coninclijcker eeren also als dat haer wel betaemlijc was
| |
¶ Hoe dat dyomedes ende vlixes te samen reyseden inder stat van troeyen om aldaer te maken bedriechgheliken pays ende vrede metten troeyanen
ANthenor ende eneas die reyseden totter griecken tenten. ende daer si doe te samen onderlinge spraken metten drien heren. die de griecken daer toe gheordineert ghedeputeert ende ghecoren hadden. om die stat van troeyen mede te verraden Ende anthenor die sprac doe mede met coninc menelaus van helena sijnre coninginnen. waer hij doe af verwerf ende vercreech goede warachtighe sekere vasticheit des vreden Ende doe ordineerden die grieken dat dyomedes ende vlixes reysen souden met anthenor ende met eneas in die stat van troeyen Ende doe si alle te samen met malcander inder stat van troeyen quamen. so wert dat ghemene volck wonderlike seer verblijdet. want si beyde wijse bescheyden coninghen waren ende si hopeden dat si die vrede ende dien pais wel ombedriegheliken maken souden Ende des anderen daghes seer vroe soe vergaderden alle die troyanen in coninc priamus pallaes. om aldaer morghen sprake met malcander te houden Ende doe stont vlixes op ende nae vele woerden dede hij den troeyanen verstaen. dat die griecken twee dinghen begeerden als beteringe met groter ouervloedicheit des goudes ende des siluers vander grieken scade ende verlies Ende ten anderen male. so begeerden si dat amphymacus ten ewigen dagen sonder enigen hope weder te comen soude ballinc ende verdreuen wesen vter stat van troeien. ende dit hadde anthenor altemalen te voren geordineert met groter valscheit om dat amphimacus coninc priamus bastaert sone hem qualiken toe ghesproken hadde inder teghenwoerdicheit van coninc priamus met sinen hoghen rade Ende wanneer als vlixes ende dyome- | |
| |
des waren binnen coninc priamus pallaes ende hielden raet so wertter inder stat van troeien een seer groet gherufte ende oec mede voerden inganc des pallaes. waer om dat diomedes ende vlixes werden doe vtermate seer veruaert. want si sorgheden dat hem die ghemeente vander stat van troeyen soude verslaen Ende si dochten oeck in haren sinnen. of dat coninc priamus bastaert kinder yet wesen mochten om amphimacus sijns bastarts soens willen. mer doemen die sake ondersochte so en conde men niet vernemen wat ende waer om dat gheruchte gheweest hadde Ende doe haren raet ten eynde gecomen was soe ghinghen si weder van daen alle die ghene die daer vergadert waren Ende anthenor die brocht doe diomedes ende vlixes tot eenre heymelijcker steden daer si te samen van hare verradenissen vrijlicken mochten onderlinge met malcander spreken Ende wanneer als si onder hem drien te samen op die heymelicke stede waren ghecomen. so seide vlixes tot anthenor waer om so vertoeues ende verbiedestu te volbrengen. dat ghene dattu ons gheloeft hebste. Doe antwoerde hem anthenor ende seide aldus Onse goden die weten dat wel voerwaer dat ic ende eneas niet anders en dencken. dan dat gene wat wi v geloeft hebben. dat hopen wi corteliken te volbrenghen. mer ons is hinderliken ende scadelijcken dat maecsel van een beelde na onsen goden welke dat ic v wel onderwisen sal. Is dat sake dattet v ghelieft. Doe antwoerde hem diomedes ende seide Het is ons seer wel bequaem ende het ghelieft ons seer wel Doe antwoerde anthenor ende seide Het is waerachtich ende wel te ghelouen sonder enighe twiuelinghe dat coninc ylus die eerste was die dese stat van troeyen eerst fundeerde waer om datse van sommighen menschen noch huden des dages ylia wert genoemt ende gheheten Ende dese coninc ylus die fundeerde in deser stat enen tempel in die eere eens afgodes die geheten was pallas Ende wanneer als desen tempel altemalen ghetimmert ende ghemaect was al totten decken toe so quam daer vten hemel een seer groet wonderlijc ende crachtich teyken of beelt. ende dat wert van hem seluen gheset al vaste inder muyeren. biden hoechsten ende ouersten altaer des tempels. ende daer dat beelt seeder die tijt altoes ghestaen heuet ende noch staet Ende dit beelt dat en laet hem van niemant draghen anders dan van sinen bewarer. als van enen pape die welke dattet beelt verwaert met groter naersticheit ende alsoe als die bewaerrers van desen beelde seggen so is dat meeste deel van desen beel- | |
| |
de ghemaect van houte Ende nochtan so en kanre nyement weten noch vernemen van wien. ende van wat houte dattet gemaect ende gheordineert is. want men wilt oec mede seggen datter troeyanen afgodinne dit beelt ghemaect heuet die geheten is pallas. ende waer om dattet beelt oec pallas of palladyum is ghenoemt Ende dit beelt dat is van alsulker crachten ende mogentheit. want also langhe als dit beelt is binnen den muyren vander stat van troeyen. soe en mach die stat van troeyen niet neder gheworpen werden noch ghewonnen. ende dit is der troeyanen sekerste ende alre meeste toeuerlaet. Doe antwoerde hem diomedes ende seide tot anthenor. vrient is dat sake dattet alsoe is alstu tot ons seggeste. so is onsen arbeit altemalen te vergeefs gesciet die wij ghedaen hebben. want wi en moghen dese stat niet vercrigen om des beeldes willen Doe antwoerde hem anthenor ende seide aldus Om deser saken willen isset dat wi tot deser tijt toe uwe gheloftenissen vertooft hebben Mer wi sullen spreken den bewaere van desen beelde. want wij wanen ende vermoeden dat wij des beelts seker sijn te verweruen. om een grote somme van goude vanden bewaerre des beeldes te vercrigen Ende sonder twyuel alsoe gheringe als wi dit verworuen ende vercregen hebben. so sullen wi dan rechtevoert tot v seynden dit selue beelde buyten der mueren vander stat Ende alhier mede soe is haren losen valschen raet ghecomen tot enen eynde Ende wanneer si van malcander souden sceyden. so seide anthenor noch tot hem luden aldus O mijn alre liefste vrienden. op datmen op onsen raet geen quaet vermoeden en heb. noch gene quade gedachten. so moet ic seer haesteliken gaen tot coninc priamus. ende segghen hem dat ic met v gesproken hebbe. ende ic hebbe v ghevraghet met hoe veel gouts ende siluers dat wi pais ende vrede souden mogen verweruen ende vercrighen Ende met desen woerden so namen si oerlof an malcander ende antenor die valsche verrader die ginc doe rechteuoert tot coninc priamus
|
|
Auteursrechtvrij