|
| |
¶ Dits dat xxvste boec. Ende die vijftiende strijt Inden welken dat dyomedes dootliken geslaghen wert van troeylus
ENde alsser ouer geleden waren ij. maenden des bestants so ordineerden die grieken hare scaren. ende si quamen te strijde. ende si streden seer wredelijcken. alsoe datter aen beyden siden doe veel der edelinghen werden verslaghen Ende doe quam troeylus met eenre groter scaren der ridderen te strijde. ende hij verslooch doe ontallike veel griecken. begherende te wreken den doot sijnre broederen. want meester dares die heuet bescreuen dat troilus op dien dach metten swaerde versloech x. duysent ridderen vanden griecken. waer bi dat die grieken op dien dach allegader voer hem vluchtich werden tot haren tenten Ende die troeyanen die veruolgheden hem. ende si versloegense seer wredelijcken metten swaerde Ende des anderen daghes soe gesciede die sestiende scarpe strijt. want die griecken doe seer vromelijcken streden tegen den troeyanen om wrake te doen van haren doden luyden
| |
| |
den Onder welcken was diomedes. die welcke dat doe met sijns selues handen grote wonderlijcke dinghen dede op dien dach. want hi versloech doe die troeyanen. die sommighe van haren paerden doot ende die sommighe die waren ter doot toe gewont. mer wanneer als troeyluls diomedes sach ende vernam. die welcke dat hi wel kennede dat hi die troeyanen alsoe wreedeliken ende bitterliken versloech. so reet hi mit enen rasenden verwoeden sinne op diomedes met eenre langher scarper glauien Ende diomedes die verkoes weder troeylus ende hi reet op troylus sine glauie aen stucken. nochtan so bleef troeylus onghewont Ende troylus die bestreet weder diomedes ende hi werp hem van sinen paerde seer swaerliken ter doot ghewont. alsoe dat hi scheen doot te wesen eer hi quam opter aerden Ende doe versprac troylus diomedes mit leliken confuseliken scampighen woerden. om die liefte ende minne van briseida mer die gryecken die toghen weder diomedes vter paerden voeten met gro groten arbeyde ende si brochten hem voer doot in sijnre tenten Ende wanneer als coninck menelaus versach ende vernam dat diomedes also gewont was ende gheslagen soe reet hi mit sinen paerde op troeylus ende hi woude troeilus stoten. ende werpen van sinen paerde. mer troeylus die sloech menelaus also vromelijcken ende hi stac hem mitter seluer glauien daer hi diomedes mede hadde ghewont. dat coninc menelaus neder viel van sinen paerde opter aerden ter doot gewont welke dat die gryecken toghen vter paerden voeten ende si brochten hem in sijnre tenten Ende wanneer als coninc agamenon sach ende merckede dat sijn volc veel doot bleef. so bestreet hi die troyanen seer wredeliken ende hi versloecher vele weder ter doot mer troeylus die bestreet coninc agamenon. ende hi stac hem seer swaerliken ghewont van sinen paerde Ende coninc agamenon die sat weder op sijn paert ouermits die hulpe der gryecken. want hi sorghede voer noch meerre ende swaerre verlies sijns volcs. Ende hi seynde haestelicken sinen boden tot coninc priamus. om ses maenden bestant ende vrede Ende coninck priamus die gaf hem dit langhe bestant teghen den raet sijnre heren ende sijns volcs Ende binnen desen bestande soe ghinc brijseida tegen haers vaders wille dicke ende menichweruen tot dyomedes bedde Inden welcken dat hi seer ghewont lach van troeylus handen. die haer vrient plach te wesen Ende want si seer wel wis- | |
| |
te dat si troeylus nimmermeer en soude moghen verweruen. soe begreep si volcomelijcken in haer seluen. also gheringhe als dyomedes genesen waer. dat si dan woude volbrenghen alle sine begheerten ende sinen wille. want si doe seer barnede met sijnre lieften ende minnen Ende binnen desen bestande. so quam coninc agamenon selue met coninc nestor tot achilles tente Ende achilles die ontfincse seer minlijcken met enen bliden moede Ende doe vermaende hem coninc agamenon. dat hi voert an soude comen te strijde. ende dat hi die griecken niet alsoe iammerlijken ende wredelijcken en soude laten verslaen Ende coninc agamenon die hadde doe teghen achilles veel ende menegherhande woerden. Mer achilles die was also verhart in sijnre herten. dat hi van coninc agamenons woerden niet en wert beweghen Ende want achilles coninc agamenon seer lief hadde. so leende hi hem sijn volc. om met hem te reysen inden strijde. die geheten waren myrmigdones. waer of dat coninc agamenon ende vlixes hem seer dancten Ende si namen oerlof aen hem ende si ghinghen beyde te samen weder tot haren tenten
| |
¶ Dits vanden seuenthiende strijde Inden welcken dat achilles teghen sijn opset sine mirmigdones liet comen te strijde
ENde wanneer als dat bestant weder ouer geleden was. so quam coninc agamenon met sinen volcke weder te strijde Ende achilles die geboot alle sine myrmigdones dat si hem wapenen ende rede maken souden. ende hi halpse selue in haren wapenen. ende hi teykentse allegader met sonderlinge roden teykenen. ende hi gaf hem oerlof te strijde te reysen met wtstortinghe van veel tranen Ende doe quamen die myrmigdones met enen sachten ganghe te stride In welcken strijde doe hi begonnen was. doe quamen die troeyanen. ende si verdruckeden die griecken bouen maten seer wredeliken Mer die hertoghe van athenen die quam den griecken seer vroemelijcken ende manlijcken te hulpe Welcken hertoghe dat troeylus doe bestreet. ende hi stac hem van sinen paerde. ende hi quetsede oec veel myrmigdones ter doot toe in dien seluen daghe. Ende daer wert doe ghesteken ende geuochten al totten auont toe. want die duysternisse des nachtes aen quam. ende so quam den strijt ten eynde
| |
¶ Dit is vanden achtienden strijde in welcken dat vele myrmigdones waren verslaghen vanden troeyanen Ende oeck mede vanden neghentienden strijde. ende vanden
| |
| |
bestande dat den griecken wert geghunt van coninc priamus
ENde des anderen daghes soe quamen beyde dit parthyen te stride. ende aldaer wert doe een alte seer scarpen strijt gheuochten. want coninc philomenus ende polidamas die vinghen doe coninck. thoas. ende si wouden hem doe geuanghen leyden inder stat van troyen mer die mirmigdones die hinderden dat. ende si ontnamen hem mit groten ghewelde wt haren handen Ende doe quam troeylus ghereden onder die mirmigdones. ende hi versloecher seer veel. die sommighe ter aerden seer ghewont ende die sommige die sloech hi ter doot. mer die mirmigdones die verweerden hem seluen seer vromelijcken. ende si sloegen dat paert doot daer troeylus op sat. ende si wouden troeylus vanghen Ende doe quam paris sinen broeder midden onder die mirmigdones met sinen bastaert broders ende si verdruckeden seer die mirmigdones. ende si verlosseden troeylum haren broeder wt haren handen. ende doe spranc hi seer haesteliken ende vromeliken op een ander paert. ende doe troeylus was verlost so streden die mirmigdones seer wredelijken ende si versloeghen tydon. welcke tydon dat was coninc priamus bastaerts soen. waer om dat troeylus sijn onrecht ende sijns broeders doot woude wreken ende hi versloech ende wonde veel mirmigdones ende hi quam paris sinen broeder seer vromeliken te hulpe ende te baten ende sinen bastart broederen mer si en mochten die mirmigdones niet lichtelijcken scenden noch verderuen. want si waren bouen maten seer vroom. ende wel gheleert inden stride Ende nochtan want si die troyanen seer ontsagen so vergaderden si alle te samen vaste bi malcander in een vergaderinge. ende si bescutteden hem seluen seer vromeliken. mer troeylus die haer alre ghesel ende verdriet was die sceydese weder van malcander ende hi versloecher seer veel Ende doe quamen daer te stride coninc menelaus. coninc thelamon. ayax. vlixes. ende diomedes mit haren scaren. die welcke dat seer vroom waren. waer om dat doe wert een seer scarpen strijt aen beyden siden ende die gryeken die versloeghen doe ontallike veel troyanen. mer doe reet troeylus daer die troeyanen den meeste lasten leden ende hi versloech. ende quetsede weder die griecken mit groten ghewelde also dat alle die gryeken doe vluchtich werden al tot haren tenten toe met groter haesticheyt Mer doe quam daer te stride thelamonius aiax ende hi bestreet die troeyanen mit | |
| |
groter wreetheyt. waer bi dat die griecken doe weder te velde quamen. ende dit was den neghentienden dootliken strijt Inden welcken an beyden siden doe werden verslagen ontallike veel menschen Mer troylus die met groten gewelde die grieken altoos quellede. also herde dat die starcste van griecken teghen hem niet en mochten staen. ende hi dede den griecken alsoe groten last ende verdriet. dat sij weder vluchtich moesten werden tot haren tenten Ende troeylus die veruolghede hem altoos al strijdende. ende hi vinc hondert mannen vanden edelingen van griecken. ende hi voerdese gheuanghen inder stat van troeyen Ende wanneer als die mirmigdones weder quamen tot achilles. soe wasser daer veel seer swaerlijcken ghewont. ende si clagheden oec datter vele van haren luyden verslaghen waren. also dattet ondersocht wert datter meer dan hondert mirmigdones verslaghen waren Ende doe wert achilles seer droeuich. om datter also vele van sinen luden doot gheslaghen waren Ende wanneer als die nacht aen quam. soe en mocht hij niet slapen noch rusten van groten toerne. ende hi dachte in hem seluen dat hi des anderen daghes woude rijden inden strijde. om dat hi wrake doen woude om sijn volck Mer want hij seer swaerlijcken ghebonden was metter liefte ende metter minnen van pollexina. soe hadde hij in dier nachte menigherhande ghedachten in hem seluen. want hi dachte. waer dat sake dat hij met ghewapender hant quame te strijde. soe soude hij coninc priamus vertoernen. ende hettuba die coninginne ende pollexina sijn wtvercoren lief die en soude hi dan niet mogen vercrigen noch verweruen. want hi dan breken soude alsulke beloften als hi gelouet hadde Ende hi en mochte ymmer niet wel liden den doot ende dat verdriet van sinen volcke Ende aldus so was hi beuangen in groter sorchuoudicheit met menigerhanden ghedachten Mer te laetsten doe die troyanen quamen totten twintichsten strijde totten griecken. ende si onderlinge seer wredeliken streden ende vochten seuen dage lanck an malcander Inden welcken dat achilles noch niet comen en woude ten strijde om die liefte ende minne van pollexina. waer bi dat die grieken doe werden ontallike veel verslagen. Mer doe coninc agamenon versach dat grote verlies van sinen luden. so seynde hi tot coninc priamus om vrede ende bestant. dat hem coninc priamus niet langer gheuen noch gunnen en woude dat hi sine doden begrauen had
| |
| |
| |
¶ Dits vanden een ende twintichsten stride ende daer achilles selue in was ende hi wert van troeylus seer swaerliken gheslaghen ende ghewont
DIe gryeken ende die troyanen die hebben hare scaren weder gheordineert ende si sijn ghecomen totten een ende twintichsten stride. ende si hebben seer hardeliken ende wredeliken onderlinghe ghestreden Ende menelaus ende paris die sijn inden stride onderlinge vergadert. ende si hebben malcander seer crachteliken ende vromeliken mit haren glauien onderlinghe ghesteken van haren paerden Ende polidamas die bestreet vlixes met enen bloten swaerde. mer vlixes die beschermde hem seluen seer vromeliken ende menestenus die hertoghe van athenen die bestreet anthenor. ende hi soude hem oec seer swaerlijcken ghewont hebben. en hadde coninc thelamon hem niet te hulpe ghecomen welcke coninc thelamon stack philomenus van sinen paerde. ende archilochus coninc nestors soen die bestreet mit sijnre glauien een van coninc priamus bastaert sonen die ghenoemt was brunius van ghismelis ende hi stac hem seer swaerliken ghewont ende doot van sinen paerde waer om dat die troyanen seer bedroeft waren Ende wanneer als troylus vernam dat brunius sijn broeder doot was so wert hi seer bitterliken screyende. ende hi bestreet doe die grieken in groter rasender verwoetheit alsoe. dat hi doe die gryecken soude vluchtich gemaect hebben. en hadden die mirmigdones hem doe niet alsoe vromeliken wederstaen Ende wanneer als troeylus dit versach so liet hi die ander varen. ende hi bestreet alleen die mirmigdones. ende hi sloecher seer veel van haren paerden doot ende ter doot ghewont waer bi dat si doe mitten gryeken vluchtich werden altemalen tot haren tenten toe. ende die troeyanen die veruolgeden hem seer vromeliken Ende wanneer als si quamen voer der gryecken tenten. so stonden si van haren paerden ende si ghinghen inden tenten der gryecken ende si sloegen die gryecken doot also wredeliken. in groter menichuoudicheyt. waer bi dat doe inder grieken tenten was een groet iammerlike gherufte ende gheluyt van screyen ende van wenen also dattet clanck inder lucht also lude ende seer dat achilles dat hoerde daer hi stont binnen sijnre tenten Ende achilles die vragede vanden ghenen die hem genakeden die daer voeruluchtich waren wt den stride wat dat iammerlike gherufte bediede. ende si antwoerden hem mit screyenden oghen ende seyden dat die grieken waren al verwonnen. want si waren | |
| |
vluchtich ghewerden altemalen binnen haren tenten Inden welcken dat si hem seluen niet langher en mochten beschermen. mer si werden aldaer onghenadeliken verslaghen ende waendi dat ghi vry ende seker staet binnen uwen tenten ongewapent. ghi sult corteliken sien meer dan vijftich duysent troeyanen comen om v te verslaen. die welke dat uwe mirmigdones oec hebben verslaghen seer wredelijken in groter menichuoudicheyt noch verslaen ende si sullen alle te samen werden verslaghen. ten si dat sake datmen hem ghe weldeliken te hulpen come Ende wanneer als achilles dat verhoerde. soe wert hij bouen maten seer toernich ende bedroeft. ende hi vergat die liefte ende die minne van pollexina Ende hij dede hem sijn harnasch doe an doen. ende hij sat op sijn paert. ende hij quam doen seer haestelijcken ten strijde. recht als een hongherich wolf onder den scapen. ende hij bestreet doe die troeyanen alsoe vroemeliken. dat hi binnen een corte stont der troeyanen ontallike veel verslooch. alsoe dat die airde altemalen bedect was met den doden lichamen der troeyanen ende dat hij selue al omme nat was vanden bloede der verslaghenre troyanen. waer om dat hij bekennet wert bij sinen groten herden wreden slagen Ende wanneer als dit troeylus sach. ende achilles bekende. ende achilles weder hem. so streden si onderlinghe seer vromeliken. alsoe dat troeylus achilles alsoe swaerlijcken wonde. dat achilles lange tijt doe bleef vten strijde legghende op sijn bedde Ende al en was troeylus niet alsoe seer ghewont. nochtan soe was hij also seer ghequetst van achilles. want si malcander staken ende worpen van haren paerden Ende op dyen seluen dach. soe wert daer van des morghens totten auont toe ghestreden seer swaerlijcken ende wredeliken Ende wanneer als die duysternisse des nachtes aen quam. soe is die strijt totten eynde ghecomen want daer wert aldus starckeliken ghestreden sesse daghe lanc. waer om datter doe aen beyden siden vele menschen werden verslagen Mer coninc priamus die was seer droeuich. om dat achilles bouen sine geloftenissen weder aldus quam ten strijde. ende hi waende ende vermoede dat achilles hem woude bedriegen. ende hi versprac hettuba sijn wijf met veel leliker versmadeliker woirden: want hi seide had hi haren woirden ghelooft. hij soude ewelijcken gheschent ende verderft wesen Ende pollexina coninc priamus dochter | |
| |
die was oec seer droeuich. want si achilles gaern ghenomen hadde tot enen man Ende binnen sommighen daghen daer na so en werter niet meer gheuochten noch ghestreden. om dat si aen beyden siden hare dode lichamen souden begrauen ende verbranden Ende binnen dien daghen so liet hem achilles sine quetsinghen ende sine wonden helen ende meesteren die hem troeylus hadde gheslaghen Ende wanneer als hi weder ghesont ghewerden was soe was hi op troeylus seer verbolghen ende toernich. ende hi bedachte ende begreep in hem seluen. dattet van groten node waer dat troeylus steruen soude van sinen handen. om die wrake van sinen wonden
| |
¶ Dits vanden twee ende twintichsten stride In welcken dat troylus verslagen wert van achilles ende van coninc menon seer iammerliken wert gewont
ALs dit aldus altemalen was gheschiet so quamen beide die parthien mit haren scaren totten twee ende twintichsten stride Ende wanneer als si vergaderden soe streden si onderlinghe seer wredeliken ende nydeliken waer om dat doe aldaer geschiede an beyden siden een groet ende swaer dootslach Ende eer dat achilles te stride quam. soe riep hi voer hem alle sine mirmigdones ende hi claghede hem allen die pine ende die smarten sijnre wonden die hi van troeylus ontfanghen hadde biddende hem allen dat si met hem sonderlinghe troeylum wouden helpen bestriden mit alre naersticheyt. ende hem omme beriden ende dat si hem souden vaste houden. ende nochtan niet verstaen mer dat si hem souden laten leuen tot dier tijt toe dat hi selue bi hem quame. want hi niet verre van hem en soude striden ende vechten Ende mit desen woerden so sweech achilles ende hi quam mit sinen mirmigdones seer haestelicken te stride Ende hier binnen so quam troeylus oec te stride met eenre groter vergaderinge met groter machte ende coenheyt ende hi bestreet die gryecken seer wredelijcken. ende hi sloecher veel ter neder van haren paerden die sommige die waren doot. ende die sommige die waren totter doot gewont. waer bi dat om sijn ghewelt ende om sijnre wreetheyt willen die grieken werden doe vluchtich altemalen tot haren tenten toe. ende dit gheschiede omtrent den middage dat die grieken aldus vluchtich werden Ende doe quamen daer ij. dusent mirmigdones te stride ende si waren ghedachtich des gebodes. dat achilles hem allen hadde gheboden. ende si bestreden die troeyanen doe seer wredeliken mitten swaerde waer om dat die griecken doe weder enen moet grepen ende si quamen weder te velde Ende die mirmigdones die soch- | |
| |
ten met groter naernsticheit al stridende onder den scaren troeylus: Ende wanneer als si troeylus hadden geuonden. soe omme reden si hem alle gader Ende wanneer als troylus dit sach ende vernam. so verslooch hij ontallike veel mirmigdones. ende hi wondese seer swaerliken ter doot. Ende wanneer doe nyemant vanden troeyanen en was die troylus doe te hulpe ende te baten quamen. so staken si dat paert doot met haren glauyen daer troylus op sat. ende si sloegen aen stucken den helm van sinen hoofde ende si sloghen hem oec alle sine wapenen van sinen liue Ende doe en mochte hi sine machte ende sine crachte niet meer proeuen om hem seluen te bescutten ende te beschermen Ende doe achilles dit vernam. so quam hij aldaer seer verwoedeliken ende half alrasende Ende doe hi sach dat troeylus hooft was onghewapent. soe slooch hi met veel groter slagen troilus hooft van sinen lichame. dattet neder viel onder der paerden voeten Ende hi nam troeylus dode lichaem ende hi bant dat met sijns selues handen aen den start van sinen paerde ende hi slepede dat alsoe doer alle dat here der scaren seer oneerlijken ende scandelijcken Mer du meester omerus die daer pryseste ende loueste in dinen boecken achilles met alsoe groten loue wat redelijcheit bracht dij aldaer toe. dattu hem alsoe groten lof gaueste. ende sonderlinghe dattu seydeste. dat achilles met sijnre eygenre crachte verslooch twee hectors als hector selue. ende den starcken vromen troeylus sinen broeder Sonder twiuel die goede gunste die du hadste totten grieken die bracht dij daer toe ende niet die rechtuaerdicheyt. want alsmen ons seit soe waerstu vten lande van griecken gheboren Mercke wel ende verneme of achilles met sinen crachten verslooch den alre starcsten hector van troeyen. den welken dat nyemant sijns ghelijc en was inder crachten. want hi vinc inder griecken tenten enen coninc. ende om dat hij den coninc te bet soude leyden ende hem alsoe veel te bet den troeyanen soude ouer leueren gheuangen soe werp hij sinen scilt op sinen rugghe. waer om dat hij doe ongewapent was Ende en waendi niet. of hector voersien hadde die grote liste ende behendicheyt van dyen oneerbaren valschen achilles. en soude hij dan sinen scilt niet seer haestelijcken voer hem hebben ghehanghen ende hem seluen teghen dyen snoden achilles vromelijcken ende manlijcken hebben verweert. want hector die plach dien achilles altoos vele te cloec ende te starc ende te lastich te | |
| |
wesen Ende des ghelijc soe ist oeck van troeylus. die welcke dat hi met sijnre eyghenre moghentheyt niet en versloech. mer want troeylus eerst wel van dusent mannen was verwonnen ende wt sinen wapenen gheslaghen. welcken troeylus aldus onghewapent achilles hem seluen niet en scaemde te verslaen ende te moorden troeylus. die hem seluen doe niet verweren en mochte. Ende om deser saken willen so en versloech achilles ghenen leuenden mensche. mer enen doden man Ende voert meer soe en was achilles niet alsoe seer te prisen ende te louen. gheliker wijs alstu bescreuen hebste want hi also edelen conincs soen also vromen ende frisschen man properliken van hem niet en wert verwonnen noch gheuanghen dat hi hem doe bant aen den start van sinen paerde Ende hi vergat die scande ende die scaemte diemen hem daer of mit groten reden achter sinen rugghe wel mochte spreken. Sonder twiuel sine edelheyt ende sine vroemheit die en brochte hem niet alhier toe ende oec mede so en mochte hem alhier toe niet brengen dat ghene dat hi selue inder natueren niet en hadde Ende wanneer als achilles aldus sonder scaemte mit groter scanden ende oneren slepede aen den start van sinen paerde dat dode lichaem van troeylus. ende als paris polidamas ende eneas daer na vernamen dat troylus doot was. soe woude paris aldaer van groten rouwen ende onghenuechten half doot bliuen Ende die troeyanen die deden seer groten arbeit om dat si troeylus lichaem gaerne verworuen hadden. ende dat si niet en vermochten ouermits die grote menichuoudicheit haere vianden Ende coninc menon die was oeck van troeylus doot seer bedroeft. ende hi bestreet achilles seer vromelijken Ende eer dat hi achilles bestreet. so versprac hi hem mit seer scandelijcken ende confuselicken woerden. segghende tot hem aldus O du valsche lose verrader. wat bitterheit ende quaetheit brenghet di alhier toe. dattu alsoe edelen vromen eerwaerdigen conincs soen soudeste slepen ende binden aen den start van dinen paerde. scaemstu di des niet du quade lose tiranne sonder twiuel du sulste hinder ende verderffenisse dijns lichaems aldaer om vercrigen Ende mit desen woerden. soe reet hi seer haysteliken ende vromeliken op dien valschen verrader achilles met sijnre glauien. ende hi wondede hem also swaerliken. dat achilles half doot neder uiel van sinen paerde opter aerden waer bi dat die troyanen hem doe weder ontnamen troylus lich- | |
| |
ame met groten arbeyde ende laste Ende die mirmigdones die hieuen achilles weder op vander aerden. ende si holpen hem weder op sijn paert. welcke achilles binnen corten tiden hem bet beuoelde ende oec bet ghemoet was. ende hi quam weder te strijde. ende hi bestreet coninc menon seer wredeliken Ende coninc menon die bestreet hem weder. waer bi dat si doe onderlinghe seer swaerlijcken ende crachtelijcken streden Mer wanter van beyden siden seer veel quamen te strijde. so werden si van malcander ghesceyden. ende wanneer als die dach totten auont quam. soe is die strijt gecomen ten eynde Ende dese strijt die duerde seuen daghe lanc binnen welcken daghen. dat achilles volcomeliken wert genesen van sinen wonden Ende opten seuenden dach. soe quam achilles weder te strijde om wrake te doen teghen coninc menon Ende hi beual sinen volcke. dat si coninc menon souden omme beriden ende van allen siden bestrijden ende besetten. mer dat si hem niet verslaen en souden. om dat hij met sijns selfs hant wrake ouer hem doen woude Ende doe wert aldaer een groot swaer strijt. ende daer werter ontallike veel verslaghen aen beyden siden Coninc menon ende achilles die quamen te samen tegen malcander. ende si worpen hem seluen onderlinghe van haren paerden. ende si streden doe te voete sere vromelijcken Ende doe bestreden die mirmigdones coninc menon seer vromelijcken van allen siden. ende want hem doe nyemant te hulpe en quam so verslooch hem achilles met veel wonden ende quetsinghen Ende achilles die en mochte coninc menon niet alleen hebben verslaghen. want coninc menon die quetsede dicke ende menichweruen achilles. dat hem dat bloet ouervloedeliken bi sinen voeten neder lyep alsoe datmen menichweruen meer waende ende vermoede sinen doot dan sijn leuen O du onsalige meester omerus. nv mercke ende aensich dat achilles nye vromen man en verslooch noch ter doot en bracht anders dan met verraet. nochtans soe wijset die redelijcheyt contrarie. want wanneer alsmen coomt ten strijde. soe moet hem een yeghelijc mensche wachten an allen siden Ende binnen deser tijt als die strijt herder wert. so quamen daer te stride met haren scaren coninc menelaus menestenus dijomedes ende thelamonius ayax. waer om dat die troeyanen doe vluchtich moesten werden met groter vresen haers lijfs. ende si haesteden hem seer te comen binnen der stat van troeyen | |
| |
Ende die grieken die veruolgheden hem doe stadeliken. ende si versloeghense in groter menichuoudicheit ende die troyanen die haesteden hem te comen binnen haere poerten ende si sloten die stat mit vasten sloten
|
|
Auteursrechtvrij