Historien van Troyen

[fol. 72r]

¶ Dits dat vijftiende boec inden welken dat vertelt wert den derden vreseliken strijt

ALs dat bestant ende die tijt des vreden ouer was ghecomen ende gheleden so ordineerde coninc agamenon met sijnre groter sorchuoudicheyt ende voersienicheyt sine scaren hoe dat si manierlicken ende punteliken souden voert gaen inden stride Ende die eerste scare die beual hi achilles. die anderde dyomedes. die derde menelaus. die vierde menestenus Ende alle die ander scaren. die ordineerde ede bescickede hi mit groter wijsheyt ende voersichticheyt Ende hector van troeyen die ordineerde oec mede sine scaren mit groter wijsheyt Ende die eerste scare die beual hi troeylus sinen broeder Ende alsoe vaste voert soe ordineerde ende bescickede hi alle die ander scaren mit haren leytsmannen ende capiteynen Ende sonder enich toeuen of merren. so is hector mit allen sinen scaren vter poerten vander stat van troeyen ghereyset totten bolwercken der gryecken ende hi is oec manlicken ende seer vromelijcken ghecomen mit hem inden velde Ende hector die heuet ten eersten male achilles bestreden dien hi seer wel bekende Ende wanneer als si op malcander reden mit haren glauien. soe worpen si malcander van haren paerden. mer hector die spranc seer haestelijcken ende vromelijcken weder op ende sat op sijn paert. ende hi liet archilles achter. ende hi bestreet die groetste ende meeste scaren vanden gryeken ende hi sceyde van een die gryexsche scaren mit sijnre groter crachte Ende eer yet lanc so stont achilles weder op. ende hi trat op sijn paert ende hi verdruckede die troeyanen. ende hi sloegher veel doot. ende hi street ende vacht alsoe langhe. dat hem hector weder ghemoetede. ende si hebben noch op malcander ghereden. dat hare glauien braken in stucken. ende hector die werp achilles van sinen paerde ende hector die woude hem sijn paert ontnemen. mer want aldaer doe vele gryecken bi achilles waren die dat hinderden. ende benamen so trat achilles weder op sijn paert mit groten haeste ende hi sloech hector mit sinen swaerde also crachteliken op sinen helme dat hi neder bockede. ende hi en mochte hem nauweliken onthouden op sinen paerde. mer doe wert hector ontsteken mit groten toerne ende mit groter verwoetheit ende hi sloech weder mit sinen swaerde op achilles helme dat hem dat bloet ouer al sijn aensicht liep. ende doe wert al daer een groet swaer nydich strijt tusschen hem beyden. ende hadden si doe onder hem beyden langher stridende ghebleuen. een

[fol. 72v]

van hem beyden of alle beyde souden si daer doot ghebleuen hebben. Mer daer quamen doe van beyden siden heren diese beyde wel bekenden ende men mochtse nauwelijken van malcander scheyden Ende doe quam aldaer dyomedes gereden met eenre groter scare inden strijde Ende troeylus hectors broeder die quam daer teghen hem oec met eenre groter scaren van volcke ghereden Ende dyomedes ende troeylus die worpen malcander onderlinge van haren paerden Mer diomedes die stont weder eerst op. ende hi sat op sijn paert seer haestelijcken. ende hi slooch troylus die noch te voet was met enen swaerde also vromelijcken ende verwoedelijcken op sinen helme. dat hi brac den rinck van sinen helme Mer troylus die slooch dat paert doot daer diomedas op sat. ende doe streden sij beide te voete. die grieken die deden diomedes weder sitten op een paert Ende die troeyanen die deden troylus weder een paert daer hi op sat Mer want diomedes troylus te machtich was. soe hadde hij hem gheuanghen. ende hi woude hem gheuanghen seynden tot sinen bolwercke Mer die troeyanen die weder stonden seer vromelijken diomedes. ende si verlosseden doe troylus van diomedes handen Ende doe quam coninc menelaus te strijde Ende paris hectors broeder die ghemoetede doe hem. ende doe wert aldaer een groot hert nidich strijt Ende hector die versloech op die selue tijt alle die ghene die hem doe ghemoeteden Ende hem ghemoetede doe oec een vroom starc ridder. die gheheten was boetes. welcken boetes dat hector sijn hooft clouede tot sinen navel toe. ende hi viel neder doot van sinen paerde opter aerden Ende hector die dede dat part een van sinen knechten rijden van daen Ende wanneer als dit voersach archilogus boetes neve. doe woude hij dat rechtevoert wreken ende hi bestreet hector seer nideliken ende wredeliken welken archilogus dat hector sloech in tween stucken Mer coninc prothenor die reet op hector alsoe vromelijcken vander ander siden eer dattet hector gewaer wert dat hector neder viel van sinen paerde Mer hector die spranc doe seer vromeliken ende haestelijcken weder op sijn paert. ende hi clouede coninc prothenor in tween stucken Ende wanneer als achilles sach dat coninc prothenor doot was. soe wert hi vtermaten seer bedroeft Ende coninc archelaus die was oec seer bedroeft. wantet sijn neve was die hi seer lief hadde Ende doe arbeyden achilles ende archelaus seer naernstelijcken om te verweruen ende te nemen coninc prothenors lich-

[fol. 73r]

aem. welc si niet en vermochten. want die gryeken doe wijken moesten ende si werden alle te samen vluchtich tot haren tenten welke dat die troeyanen seer vromeliken veruolgeden ende si wondense ende si versloegense mer om die duusternisse des nachtes soe is die strijt ghecomen ten eynde.