|
| |
¶ Dits dat viertiende boeck vander ordineringhe der scaren des heers van troeyen. welcke dat ghesciede bi hector coninc priamus soon
ALs die nacht was gheleden ende die scone dageraet alle dat aertrijcke metter claere sonnen verlichtede die vrome starke wel strijdende hector bescicker ende leytsman den heers van troeyen also als hi seer sorchuoudich ende wijs was inder ordineringhe. soe geboot hi alle sine stridelike mannen in haren wapenen dat si vergaderen souden op een plaetse midden inder stat van troeyen voer den tempel eenre afgodinnen die gheheten was dyana. ende hi ordineerde aldaer die scaren ende die vergaderinghe. om daer mede inden strijde te gaen Ende hij gheboot datmen een vanden poerten op doen soude die daer gheheten was darnanydes. ende hi riep tot hem die hertogen ende sine magen als glaucon des conincs soon van lycien Ende thyntmabor sinen bastaert broeder. ende hi sette die dat si wesen souden hooft heren vander eerster scaere M. vroemer stouter ridderen van licien ende van troeyen Ende wanneer als si oerlof hadden ghenomen soe sijn si seer soetelijcken ghereyset totten griexschen here Ende in deser seluer reyse der eerster scaren. soe ordineerde oec hector ander dusent ridderen onder coninc theseus van tracyen. ende onder archilegus coninc theseus sone. welcke dat beide seer vroem waren ende hi gaf hem doe goedertierlijcken oerlof inden name van haren goden. ende hij seide dat si hem versamenen souden metter eerster scaren Ende doe scickede hij die ander scare met drye dusent ridderen. welcke da sy setten onder coninc santypus van phrygien. ende coninc alcanus beyde vroeme stoute coninghen. ende si sijn bi oerlof ghegaen gegaen vter stat van troeyen totten griexschen heer Die derde scare met drie M. ridderen die settede hij onder troeilus sinen broeder in deser manieren. want hector die ver- | |
| |
maende troeylus sinen broeder aldus ende seide O mijn alre liefste broeder ouerste blijscap mijns herten dine grote ouerdragende ende onmate moedicheit. die doet mi seer twiuelen dattu di seluen ouermoedeliken ende sonder enighe voersichticheit di seluen oefenen sulste inden stride Ende alhier om soe bidde ic di oetmoedeliken mijn lieue broeder. dattu dijn lijf doch bewaren. ende wel behoeden wilste mit alre naersticheyt. ende laet ymmer achter dine onghemeten sotheyt ende dwaesheyt. ende en verlate di seluen niet alte seer op dine vroomheyt ende cloecheyt. op dat onse vianden van dinen doot ende van onsen rouwe hem niet en verbliden Ende alhier om soe ganc inden name onser goden ende come weder. wanneer als ic dat beghere in onser stat van troeyen een verwinre. tot welcken woerden dat troeylus antwoerde aldus O mijn alre liefste broeder ende here bider gunsten der goden soe en staet niet te twiuelen. ic en sal altoes dinen gheboden onderdanich wesen ende ghehoersamich als mijns alre liefsten broeders ende here Ende mit desen woerden so is troeylus sijn broeder mit vier dusent ridderen ter poerten wt ghereyset. mit costelijcken edelen wapenen Ende hi hadde voer hem enen scilt van bleeker verwen. inden welcken waren ghemaect ende ghemaelt twee gulden leeuwen Ende aldus so is hi seer ouermoedelijcken ende stoutelijcken ghereyset totten gryexschen heer Doe ordineerde voert hector de vierde scare mit iij dusent ridderen ende tseuentich onder coninc vpon. want hi was seer groet ende starc ende wel stridende. ende seer begheerliken totten stride also dat onder den volcke van troeyen nyemant starcker en was anders dan alleen hector van troyen ende in welkes geselscappe dat was een seer vroom man. die ghenoemt was acdellus welke beyde seer gherich waren totten stride ende si sijn bi hectors oirlof totter seluer poerten wt ghereden Ende si hadden noch enen hoeftman met hem ende dat was hectors bastaert broeder ende hi was donarchus gheheten Doe ordineerde hector die vijfte scare onder den coninc van sysonia. want die luden van sysonia die waren te malen seer starc ende groet van liue also dat reusen scenen te wesen Ende des conincs wapen die waren siluer wit sonder enich ander teyken Ende mit hem soe was een leytsman polidamas anthenors soen ende si haesteden seer tot haren vianden bi hectors oerlof Doe ordineerde hector die seste scare vanden luden van boecia. onder den coninc protheseus. ende onder enen hertoghe die ghe- | |
| |
noemt was serpedon. welke beyde seer vroom waren ende moedich Mer dit volc dat ghinc onghewapent ten strijde. ende si en hadden gheen borsplaet noch pantser te doen. mer si hadden enen helme sonder scilt. Ende dit volc dat plach te strijden met seer lange pijlen ende ghescutten smal op dat eynde. ende met sere scarpen yseren beslagen daer mede si hare vianden dootliken plagen te wonden. ende si plaghen die paerde vluchtich te maken. ende seer starckeliken te schieten Ende dese scare die beual hector dyephebus sinen wittachtighen lieuen broeder Ende wanneer als dyephebus hadde oerlof van sinen broeder hector. soe is hi ghereyset seer ouermoedelijcken totten griecken Ende tot deser seluer scaren so ordineerde hector vele ridderen vten lande van agresta. ende hi ordineerdese onder twee coninghen als coninc edras. ende coninc pylon Ende dese selue coninc pylon die hadde enen wonderlijcken waghen al heel gemaect van elpen been ende sine wielen die waren van houte. ghenoemt eobanus ende dese waghen die was ouergedect met fine goude. ende dat decsel bouen dat was altemalen bedect met seer costelijcken ghesteenten ende met suluer. ende dese waghen die plaghen te trekken twee starcke ghewapende ridders Ende hector die gaf desen twee coninghen sinen bastaert broeder mede die genoemt was pictagoras welcke bi hectors oerlof te samen reyseden ter paerten wt tot haren vianden Ende in deser seuender scare. so ordineerde hector den edelen eneas daer dicke ende menichweruen af is gesproken alhier te voren In welcken gheselscappe dat hi ordineerde alle die ridderen die daer waren vander heerlicheyt Toynus welcke alle te samen nae hectors oerlof met tameliken ende sedigen reysen hem versamenden ende verenichden hem metten anderen scaren Die achte scare die ordinierde hector te wesen coninc dorsen van persen met sinen volcke. ende hi gaf hem tot enen leytsman paris sinen broeder welcke dat hi vermaende al waer dat sake dat hi die ander scaren volghede. nochtan en soude hy niet gaen inden strijt eer dat hy hector selue aldaer waer. welcke hector dat hem seer haestelijcken souden volghen Tot welcken woerden paris sinen broeder antwoerde ende seyde dat hi altoos sinen gheboden woude onderdanich wesen Ende aldus nam paris oerlof aen hector sinen lieuen broeder Ende hy is met sijnre scaren ghereyset vter poerten Ende die neghende scaere die | |
| |
settede hector onder hem seluen mit veel edelinghen die seer vroom ende machtich waren vter stat van troyen. ende hi nam oec mede mit hem thien sijnre bastaert broederen die seer vroom ende coen waren ende hi hadde onder hem vijf dusent ghewapender vromer stouter ridderen ende wanneer als hi was ghewapent soe sat hi op sijn paert datter gheheten was galatham van welckes paerts. groetheyt. starcheyt. ende schoenheyt meyster dares wel of heuet bescreuen Ende wanneer als hector gewapent sat op sijn paert soe sprac hi tot coninc priamus sinen vader dese woerden O mijn alre liefste vader hout bi di vijfthien hondert ridderen tot dinen gheselschappe. mit welcken dat ghi sult bewaren onse stat ende onse bolwercken Ende ghi en sult nyemant meer laten wt reysen ten si dat sake dat icse wt bode ende sijt vlytich ende naerstich inder bewaringe der openre steden ende bolwercken. want of ons die strijt te swaer ende te lastich viel dat wi dan moghen hebben een seker vaste toevlucht Ende ghi sult selue seer sorchuoudeliken toe sien wanneer als wi sijn inden stride op dat onse vianden onse stat niet en belopen ende winnen ende berouen ouermits bedroch verraet ende list ghelikerwijs als si eens ghedaen hebben Ende aldus suldi ons wesen een muyere. ende een hulpe in onsen regimente. totten welke dat coninc priamus antwoerde ende seide aldus O mijn alre liefste soen. ic wil doen alle dat ghene dattu mi beueelste ende dattu mi ghebiedeste. want na der hulpen der goden. soe en is mi anders ghenen hope noch trouwe dan inder groter moghentheit dijnre armen ende dijnre leden. ende inder diepheyt dijnre sinnen ende inder onderscheydinghe ende bescickinghe des strides Ende ic bidde seer oetmoedeliken onsen goden. dat si di willen bewaren in ghesonden liue ende dat si di willen bescermen van allen quaden ende wederstoet Ende alhier na desen woerden so nam hector oerlof aen coninc priamus sinen vader ende hi reet tot sijnre scaren Ende hector van troeyen die was bouen maten seer starc ende onuerwinlicken inden stride. ende hi was oer mede die wijste ende subtijlste ouerman ende leytsman des heers van troeyen Ende dit waren die teykenen sijnre wapenen. want hi voerde twee gulden leeuwen in een blaeu velt Ende dese selue hector die reet inden name der goden vter stat van troyen mit sinen gheselscappe mit ontwonden bannieren ende wimpelen Ende al was hi die laetste inder reysen. hi was nochtan die eerste inden vel- | |
| |
de ende inden strijde Ende die edele vrouwen ende wiuen die binnen der stat van troeyen laghen ende waren die clommen op die mueren vander stat also dat si also souden moghen bescuwen ende sien dat vechten ende strijden Ende aldaer soe clommen mede op coninc priamus dochteren met helena. welcke helena menighe gedachten ende twiuelingen hadde in haerre herten met groter sorghen
| |
¶ Dit is die bescikkinghe ende ordineringe des heers van griecken datter gheschiede biden coninc agamenon haren ouersten
ENde wanneer als hector van troeyen sine scaren hadde gheordineert. so wasset oec wel te vermoeden ende te weten dat die coninc agamenon sine scare niet en vergat te ordineren ende te weten dat di coninc agamenon sine scare niet en vergat te ordineren ende te bescicken. want hi ordineerde van sinen volcke xxvi scaren Ende inder eerster scaren soe makede hi een hooft heer te wesen patroculus ende hi beual hem al sijn eygen volck. ende oec mede die myrmigdones achilles volc. want binnen dien dage so en ginc achilles niet te strijde Mer hij bleef in sijnre tenten. ende hi liet sine wonden verbijnden ende meesteren Ende dese patroculus die was een seer edel man. ende hi was een geboren hertoghe. ende hi was oec seer abel sedich ende rijcke. welcken patroculus achilles also seer lief hadde ende patroculus weder achilles dattet scheen dat si hadden een siele ende enen gheeste te samen Ende in die andere scare sette hi coninc menon Ende coninc ydomenus met drie dusent ridderen. ende oec menestenus die hertoge van athenen met alle sijn volc van athenen In die derde scare soe settede hi coninc astolophus. ende phylomenus sinen soon. onder welcken dat hi ordineerde dat beproefde volc inden stride van camanus Ende inder vierder scaren. so ordineerde hi den coninc archelaus. ende coninc prothenor. met alden volck van boecia. ende in deser scare soe was die alre starcste man die gheheten was secutydan Inder vijfter scaren soe was coninc menelaus met al sijn volck Ende in deser sester scaren soe waren coninc epistrophus ende coninc telidis. ende si hadden onder hem dat volck van prouincien. ende van sedijsis. Inder seuender scaren so was coninc thelamonis ayax metten volke van salmanya. ende dese hadden in haren gheselscappe vier ridderen als theseus amphimacus doryus ende palisanus Die achte scaer die hadde coninc thoas Die neghende scaer die leyde ayax oleus Die thiende scaer die leyde die coninc phylotopas Die elfte scaer die leyde coninc po- | |
| |
liphebus ende coninc phineus Die twalefste scaer die leyde hertooch nestor Die dertiende scaer die leyde coninc nenes Die viertiende scare die leyde coninc vlixes Die vijftiende scaer die leyde coninc hemelius Die sestiende scaer die leyde coninc protheselaus volc die verslaghen was Die seuentiende scaer die leyde coninc polidarius ende coninc machaon Die achtiende scaer die leyde coninc rodenus Die neghentiende scaer die leyde coninck euripulus van othomedus Die twintichste scaer die leyde coninck santiphus van lycodus. ende coninc amphimacus Die een ende twintichste scaer die leyde coninck polamides heer van bocha Die twee ende twintichste scaer die leyde coninc dyomedes ende stelenus Die drie ende twintichste scaer die leyde coninc eneus van cypren Die vier ende twintichste scaer die leyde coninc protheseus Die vijf ende twintichste scaer die leyde coninc caprenor van capadocia Ende die sessentwintichste scaer die leyde coninc agamenon selue die een ouerste ghecoren was van haren heer ende een keyser des heers
| |
¶ Hoe dat die scaren vergaderden inden stride Ende dit was die anderde strijt. inden welcken datter veel doot bleuen
ENde wanneer als die scaren aen beyden siden gheordineert waren. soe quamen beyde die parthien seer heerlicken in een velt om te striden Mer die alre stercste hector die stac sijn paert voert met sporen. ende hi bestreet seer vromelijcken ende verwoedelicken der gryeken scare. ende hi gemoete patroculus den coninc. want hi inder eerster scaren der gryecken was als een leytsman Ende dese coninc patroculus die reet op hector mit sijnre scarper glauien alsoe crachtelijken dat hi doer stack hectors scilt. ende hi stack hem doer alle sine wapenen. ende nochtan en wert hector niet ghequetst noch ghewont aen sinen lichaem. mer hector die en was van deser steec niet veruaert mer hi wert seer heet ende toernich. ende hi liet sine glauie achter. ende hi sloech patroculus also seer herdelicken ende stouteliken mit sinen groten swaerde dat hi hem sijn hoeft clouede aen tween stucken ende doe corteliken viel coninc patroculus van sinen paerde neder opter aerden al doot ende dat gheschiede midden inden stride. mer wanneer als hector sach dat patroculus daer doot lach voer hem. ende hi aensach sijn schone costelike harnas. doe wert hi begrepen ende ontsteken mit groter begeerten. om die wapenen te hebben Ende hi trat | |
| |
neder van sinen paerde. ende hi hielt dat biden thoom. ende hi ginc tot patroculus lichaem. ende hi woude hem berouen van sinen sconen costelijcken blinckende harnasse ende wapenen mer coninc menon die quam om patroculus te bescutten die daer doot lach met iij. M. ridderen. om dat hector dat lichaem niet en soude berouen. ende hi sprac in enen quaden toernigen moede tot hector deze woerde O gripende ende onversadelike wolf sekerliken dese spise die en sulste niet smaken noch proeuen. mer du moetste andersijns dijn spise soeken. wanttu sulste seer haestelijken sien comen meer dan vijftich dusent ridderen om di te doden ende te verslaen Ende aldus dede dese coninc ende die ander die vochten gheweldelijken alle te samen alleen teghen hem ende si wouden hem verslaen ende wouden hem sijn paert benemen Ende si deden hem alsoe groot ghewelt. dat hi neder viel op sinen knyen opter aerden Mer hij stont seer crachtelijken weder op. ende hi trat rechtevoert weder op sijn paert teghen al der griecken dancke. die doe om hem waren Ende hij reet op coninc menon om also wrake te doen met groter verwoetheyt Mer coninc claucon. ende coninc theseus. ende archilogus sijn soon die quamen coninc menon met drye duysent ridderen seer vromeliken te hulpe ende te baten Mer hector die versloech met sinen swaerde den eersten gryecke die hem ghemoetede Ende hier binnen soe wart aldaer een scarp sware strijt Ende hector die quam noch weder tot patroculus dode lichaem ende hij woude hem noch weder berouen van sinen wapenen ende van sinen harnassche. waer om dat hij weder af stont van sinen paerde. Ende dit versach ydomedus die coninc van creten. ende hy quam strijden teghen hector met twee duysent ridderen Ende wanneer als hector aldus toeuede ende trat van sinen paerde om dat hij patroculus dode lichaem berouen soude. soe bestreet hem coninc ydomeus met sinen ridderen alsoe swaerlijcken ende crachtelijcken. dat hi niet weder comen en mochte tot sinen paerde. ende si sloeghen stadelijcken hector seer swaerlijken. welke als hector versach dat hij ymmer te voete srtijden moeste. ende dat si alle te samen streden ende vochten om sinen doot. soe greep hi weder enen moet in hem seluen. ende hi versloech die vianden met sinen groten swaerde Ende hij sloech die sommighe haere paerden doot Ende die somigen van sinen vianden die sloech hij hare voeten beenen armen ende hare leden af. alsoe dat hi binnen een | |
| |
corte tijt versloech vijfthien ghwapender vanden gryecken Ende binnen deser tijt nam coninc menon patroculus des conincs lichaem op sijn paert. ende hi voerder inder gryecken tenten Ende nochtan so en lieten die gryecken niet of. mer si arbeyden seer om hem te vanghen. ende om hem sijn paert te benemen mit veel volcs of te doden. alsoe dat hector niet weder op sijn paert comen en mochte anders dan mit groten laste ende ghewelde. onder den welcken bisonder was een alte seer starken ridder. die gheheten was Caryon de petra. dat is te segghen vanden steen. welke ridder hector seer quellede ende moeyde Ende als een van hectors knape sach dat hector sijn heer was in desen groten verdriete so hadde hi twee scarpe glauien ende hi nam die een glauie. ende hi reet die een ridder ghehieten caryon de petra also crachtelijcken op sijn lijf dat hi daer doot bleef Ende nochtan hadde caryon mit hem dusent ridderen Ende daer na doe nam hectors knape dat ander speer of glauie Ende hi reet also vromelijcken op enen anderen die hector sinen meester mede bestreden hadde. dat hi mede daer neder doot bleef opter aerden Ende dese knecht die riep seer crachteliken totten troyanen dat si hector haren here te hulpe comen souden Ende als tyntinabor een van hectors bastaert broederen verhoerde dat roepen soe quam hi mit groten ghewelde. ende hi versloech die gryeken ende hi makede hem enen wech. ende hi is ghecomen wel bi hondert ridderen die hector bestreden. vanden welcken dat hi seer haesteliken versloech dertich ridderen ter doot. waer bi dat die troyanen doe weder seer wel ghemoet werden. ende si begrepen dat velt. ende si dwonghen die gryeken dat si wijken ende rumen moesten Ende doe wert hector weder harde seer verblijt. ende hi trat weder seer vromelijken op sijn paert ende hi street moghentliken ende verwoedeliken op die gryeken mit groten swaren slaghen. want hi hadde verloren den roof van patroculus den coninc ende hi versloech te mael veel gryecken die hem ghemoeteden. mer want die gryeken den doot ontsaghen. soe maecten si hem enen wech ende si werden voeruluchtich van sinen aensichte alsoe datter nyemant en bleef daer hi sine grote crachte ende machte aen mochte proeuen. mer doe quam hertoghe menestenus van athenen om mit hector te striden wel mit drie dusent ghewapender ridderen ende hi quam aen totter lufterhant der scaren Ende daer troeylus ende die van frigien coninc santiphus coninc | |
| |
manchen. ende coninc alcanus in waren. metten welken dat si doe vergaderden ende seer vromeliken streden. Doe bestreet hertooch menestenus troylus met sijnre glauien alsoe herdeliken dat hi moeste vanden paerde vallen waer hi wilde of en wilde ter aerden onder vele van sinen vianden. die allegader doe ghelijc arbeyden om hem te verslaen Mer hertoghe menestenus die arbeyde bouen maten seer om troeyles te vangen. waer bi dat hi dede alle sine macht ende hi toech hem vter paerden voeten. ende hi nam troelus geuangen. ende hi beual veel geselscaps van sinen ridderen dat si hem voeren souden in dat griexsche heer seer haestelijken Mer daer was een ridder die gheheten was myseres. die ouerluijt riep totten volcke van frygien ende seide O ghi edel starcke vroeme mannen alle te samen. waer om si dij hier gecomen inden strijde. sidi niet al hier gecomen om te verweruen prijs lof ende eere Ende en siet ghi niet of en verneemt ghy niet. dat troeylus coninc priamus soon alhier gheleydet werdet gevangen sonder twyuel laet ghi troeylus gheuangen van hene voeren. ghi ende alle uwe kinderen sijt alle te samen ewelijcken verderuet ende gheschent Ende alhier om soe arbeydet ymmer seer haestelijcken ende naersteliken hem te verlossen ende van daen te crijgen. eer dat hi ons te verre werde ontleydet ende ontvoert Ende doe liet coninc alcanus die ander achter. ende hij greep een glauye in enen quaden toernighen moede. ende hi vacht ende street tegen die griecken. ende hij sloech enen vanden ghenen die troylus leyden gheuanghen alsoe herde dat hi daer doot bleef Ende al daer nae so bestreet hi noch enen anderen alsoe herdeliken ende vromeliken. dat hi hem wonde ende quetsede totter doot toe Ende aldus wert troeylus verlosset vander gheuangenissen bi hulpen des conincs alcanus ende der geenre die hem doe te hulpe quamen. ende hi trat weder op sijn paert bider hulpen des conincs santhyphus die met sijnre scaren hem seer haestelijcken ende vromelijcken te hulpe ende te baten quamen Ende dese selue coninc santyphus. die bestreet enen hertoghe die gheheten was menestenus met enen verwoeden moede. ende met quaden fellen bosen sinnen. ende hi sloech hem also vromeliken. dat hij daer doot soude hebben ghebleuen hadden ghedaen sine edele goede fine wapenen Ende dese menestenus die was vtermaten seer bedroeft vander verlossinghe sijns gheuanghens Ende hi begonde seer wredeliken ende felliken te strijden ende te vechten ouer- | |
| |
mits die hulpe vanden gryecken die hem doe te hulpe ende te staden quamen. ende aldaer om so wert aldaer een dootlijc strijt doe gheuochten ende daer werter aen beyden siden ontallike veel doot gheslaghen Ende want menestenus van toerne niet vermoeyt en mochte werden. soe sloech hi daer doot veel vanden troyanen. ende hi wert seer ontsinnet ende verwoet van groter droefheyt ende hi reet doer alle dat volc. ende hi sloech die troyanen alsoe langhe dat hem ghemoetede die selue miseres daer hi sinen gheuanghen bi hadde verloren. welcke miseres menestenus bekende aen sijnre wapenen die hi voerde Ende hi reet seer crachteliken mit sijnre glauien opten seluen miseres. ende hi stac hem alsoe van sinen paerde Ende doe quam daer een vanden troeyanen ghereden ende die was ghehieten coninc vpon. ende hadde in sinen gheselscappe enen die ghehieten was eurypisus mit twee dusent ghewapender mannen vanden conincrijcke van larisse Ende welcke weder ghemoetede coninc prothenor ende coninc archelaus mitten welcken vten conincrijcke van boeria dat si doe te samen seer wreedelicken streden ende vochten Ende eer yet lanc daer nae so quam den troyanen te baten ende te hulpe polydamas. anthenors soen mit veel ridderen Ende wanneer als hi sach alsoe vele troyanen aldaer te samen vergadert. soe ordineerde hi sijn volc om die gryecken aen een ander side te bestriden. waer bi dat doe gheschiede als dat dese voerseide scare die gryecken bestreet soe is ghecomen vter stat van troeyen coninc remus mit drie dusent gewapender mannen. ende hi bestreet coninc menelaus seer haesteliken mit al sinen volcke Ende wanneer als si onderlinghe aldus ghestreden hebben soe worpen ende staken si malcander vanden paerde. mer polidamas die bestreet den hertoghe die daer ghenoemt was merenus. ende hi was helena neue. welcke merenus dat was in sijnre bloeyender ioncheyt. want hi was van xx. iaren ende hi was een seer vroem stout ridder Ende polidamas die sloech dese merenus also seer hardeliken. dat hem sine wapenen ghinghen van sinen liue daer hi mede ghewapent was ende hi wondede hem ter doot toe dat hi neder viel op sinen paerde waer bi dat nerenus daer neder doot viel opter aerden Ende wanneer als menelaus verhoerde ende vernam dat menerus doot was die hi soe seer minnede ende lief hadde so was hi vter maten seer bedroeft ende hi begeerde sinen doot aen den troyanen te wre | |
| |
ken Ende hi sloech coninc remus alsoe herdeliken met sinen swaerde. dat hij sinen helme brack ende sine wapenen. ende hi quam tot sinen vleysche ende hi wonde hem also swaerlijcken in sinen hoofde. dat hi half doot viel neder opter aerden van sinen pairde. ende want sijn volc vermoede dat hi doot geweest had. so en quamen si hem niet te hulpe noch te baten want si wouden wijcken ende voervluchtich werden vten strijde. welke dat si gedaen souden hebben. en hadde polydamas ghedaen diese aldaer hielt welcke polydamas die seer naernstelijken arbeide om haren coninc remus te verweruen ende te behouden. ende hi tooch coninc remus vter paerden voeten. ende hi leide hem doe half leuendich tot sinen bolwerke Mer coninc celidis die in sinen daghen was gecomen die schoonste van hem allen waer af dat meester dares screef. datmen sine schoonheyt ende sine ghedaente niet besciuen en mochte. welken coninc die coninginne vanden vrouwe meer minnede dan haer seluen Dese coninc celidis die arbeyde met sijnre glauien om polydamas te werpen van sinen paerde. op welken polydamas also seer vertoernt wert. dat hi hem sloech met sinen swaerde. dat hi aldaer neder doot viel opter aerden Ende alhier binnen dede hector met sinen vrienden. ende met sinen luyden die gryecken seer nootlijken wijken. ende hij quam onder der griecken scaren. ende hy sloechgher ontallike veel. also langhe dat hi quam totten volcke van salmanya. die welke dat waren onder coninc thelamons gheleyde Ende dese coninc thelamon die was seer vrome. ende hi versloech ende wondede vele troeyanen Ende doe quam vander griecken side coninc theucus. welcke hector bestreet. ende hi stac also manlijcken op hector met sijnre glauien. dat hi hector manlyken ende merkeliken quetste ende wondede Op welken coninc theucus dat hector sijn paert stuerde biden thome Ende wanneer als hij hector sach vertoernt. soe wert hi voervluchtich van hectors aengesichte. alsoe verre dat hi was wt hectors ogen Ende alsoe als hector sinen toern sijns herten niet en conde noch en mochte bedwinghen. so bestreet hij enen vermaerden griecke. welcke hi in sinen toerne ende in sijnre wreetheyt met sinen swaerde verslooch Ende alhier om soe quam aldaer een grote scare der grieken. die hector al omme aen allen siden bestreden ende aenvochten. om hem doot te slaen of te vangen Onder welcken oec mede was theseus. die hector bat ende vermaende oitmoedeliken ende goedertierlijcken. dat hij doch wijken | |
| |
woude een weynich vten stride op dat hi sonder goeden raet onder alsoe veel gryeken niet en bleue doot verslaghen. welcke dat seer scadeliken waer alder werelt. dat alsulcken vromen onuersaechden ridder bliuen soude inden stride. van welken woerden dat hector hem doe harde seer bedancte Ende aldaer wert doe een seer scarp strijt want die troyanen die gryecken seer vromelijcken bestreden Ende polidamas die street doe een weynich van hector. welcke polidamas coninc medelaus ende coninc thelamon bestreden te samen Ende coninc thelamon die stac mit sijnre glauien polidamas van sinen paerde. ende mit groten crachtighen slaghen. want doe sijn swaert hadde gebroken. soe brac hi polidamas helme ende sine wapenen. alsoe dat polidamas was sonder wapenen op sijn hoeft. waer om dat si polidamas doe vinghen. ende si wouden hem haestelijcken totten gryecken senden Mer hector van troeyen die niet verre en was van daen. ende hi sach aen die side veel gryecken die polidamas hadden omme bereden beset. ende daer toe gheuanghen. ende hi hoerde die stemmen roepen datmen polidamas soude senden ende brenghen totten gryecken So bestreet hi verwoedelicken alle die ghene die polidamas hadden beset. ende hi makede hem seluen enen wech mit veel gryecken ter doot te wonden also lange want hi quam bi die ghene die polidamas leyeden gheuanghen. ende hi bestreetse also seer verwoedeliken ende crachteliken. dat hi aldaer doe dertich gryecken doot sloech Ende doe werden die gryecken vluchtich. ende si lieten polidamas vry ende quijt Doe quamen si mit al haren scaren teghen den troyanen als coninc epistrophus. coninc menelaus ende coninc thelamon. die welcke mit allen haren scaren die troyanen alsoe vromeliken bestreden dat die troyanen doe van groten node moesten wijcken ende dat velt begheuen want al was dat sake dat hector doe bi hem was die wonderlijcke dinghen dede wanter doe der gryeken ontallike veel waren. ende si versloeghen dat paert daer hector op reet onder hem Doe street hi seer vromelijcken te voete. ende hi bescuttede alsoe hem seluen datter vanden gryecken nyemant alsoe coen en was die een hant aen hem dorste steken. mer hectors bastaerts broederen. wanneer als si saghen dat die troeyanen bycant waren verwonnen. ende dat si hector haren broeder selue niet en saghen. soe quamen si allegader te samen.
| |
| |
ende si sochten hector haren broeder also naernstelijcken onder die scaren ende si hebben hector gheweldigher hant gheuonden. ende si quetseden coninc thelamon seer swaerlijcken Ende dynadron hectors bastart broeder die bestreet enen vernoemden grieke. welke dat reet op enen starcken ende mogenden teldenaer. ende hi stiet met sijnre glauyen den seluen grieke van sinen teldenaer. ende hij greep den teldenaer biden thome. ende hi gaffen hector sinen broeder die daer seer vromelijcken ende manlijcken street te voete Op welcken teldenaer hector haestelijcken sat. ende hij bedreef doe groet wonder met sine bastaert broederen teghen den grieken Ende doe quam dyephebus met sijnre scaren metten volcke van boeria. welcke lude hadden bogen ende scutten. metten welcken dat si doe die griecken dootliken wonden Ende dyephebus die wondede enen griexschen coninc seer swaerlijcken in sinen aensichte. waer bi dat doe die troyanen die doe vluchtich gewerden waren. weder enen hogen moet grepen. ende si streden doe weder sere vromelijcken teghen die griecken Ende want coninc teseus die troyanen seer vromelijcken bestreet als voerseyt is. so quam aldaer een van coninc priamus bastaerts sonen die gheheten was quintillenus met medenus sinen broeder. ende si bestreden coninc theseus voerscreuen ende si vinghen hem ende si wouden brengen ter doot Teghen welcken hector seer vromelijcken riep. dat sy hem niet en souden misdoen. ende dat si hem oec vry souden laten gaen. Ende aldus ouermits hectors ghebot. soe lieten si theseus vry ende quijt gaen Ende wanneer als hi aldus verlost was soe danckede hi hector met alre oetmoedicheyt. ende hij keerde hem weder omme totten gryecken Ende doe quam vander gryecken side te strijde coninc thoas metten volcke van calcedonia. ende hi hadde met hem enen die gheheten was phyloteas. welcke teghen die troeyanen begonde te strijden ende te vechten Ende coninc thoas die bestreet cassibulam coninc priamus bastaerts soen. ende hi slooch cassibulam dat hi neder opter aerden viel vanden paerde al doot daer dat hector aen sach Ende om welckes doot dat hector vtermaten seer bedrooft was ende vertoernt. waer om dat hi die grieken noch veel hardelijcker ende wredeliker bestreet. ende hij sloochger seer veel vanden paerde. die sommighe die bleuen doot ende die sommighe die waren totter doot ghewont. alsoe dat die griecken hem wijken moesten om sijnre grooter mogentheyt ende wreetheyt willen | |
| |
Ende onder des so quam daer noch vander gryecken side. hertoech nestor mit vijf dusent ghewapender ridderen. welcken dat ghemotede coninc endras. ende coninc philon mitten ghenen die daer waren vanden conincrijcke van agresta onder dat gheleyde van yeconias welke yeconias was des conincs soen van agresta. welcke dat van beyden siden te samen vochten ende streden ende si werden aen beyden siden ontallijcke veel verslaghen Ende want coninc philon seer vromelijcken ende manlijcken street so wert hi al omme aen allen siden bestreden ende beuochten. welcke gryecken alle te samen hem wouden verslaen mit groter haeste. Doe seide yeconias tot endras. en sietstu niet hoe dat coninc philon al omme vanden gryecken is bestreden ende beset dunctet v goet so laet ons hem haesteliken te hulpe comen Ende doe streden ende vochten die troyanen alsoe vromeliken teghen den gryecken Ende coninc philon die wert wt horen handen verlosset Ende hier binnen so ghinc hector vten stride mit dye phebus sinen broeder ende met celidonia sinen bastaert broeder. welcke dat te samen groet wonder hadden bedreuen inden stride teghen den gryecken. want die gryecken die wouden dat velt begheuen ende wijcken vanden troyanen. met coninc menelaus ende coninc thelamon die weder stondent ende si hinderdent seer machteliken ende crachteliken Ende doe quam eneas mitten volcke van yeconien onder eutremus gheleyde mit welken dat hector weder quam te stride ende hi street also vromelijcken dat die gryecken noch weder mosten wijcken. mer die mitten gryecken seer vromelijc street. wanneer als hi sach dat die gryecken wouden wijcken. ende vlyen. so was hi vtermaten seer bedroeft ende hi sach omme Ende wanneer als hi omme sach. soe sach hi vele scaren der gryecken comen mit bannyeren ende mit wimpelen te stride. die welcke dat noch nye en hadden ghestreden Onder welken scaren sonder twiuel was die blome vanden gryecxschen ridderen Ende al hier om so riep ayax ende hi vermaende die gryecken dat si niet wijcken en souden noch voeruluchtich werden want hem quame seer grote hulpe. waer bi dat aldaer noch wert een groet swaer strijt. want eneas ende ayax die vergaderden mit seer fellen ende mit enen hatighen moede Ende die een die bestreet den anderen te paerde alsoe vromelijcen. dat si beyde te samen vyelen vanden paerde onder der paerden voeten inden strijt. mer vander gryec | |
| |
ken side quam phyloteas voerscreuen van calcedonya met drie duysent ridderen om ayax te hulpen. want tot noch toe soe hadden die troeyanen den besten seghe ende auentuere gehat. welke troyanen dat seer ende naernstelijken arbeyden om die grieken vluchtich te maken Mer daer quamen twee scaren met phyloteas te strijde. waer bi dat die troeyanen doe den moet verloren. ende si en mochten die griecken niet langher wederstaen Ende wanneer als die strijt weder began. soe bestreet philoteas hector met sijnre glauyen. welcke dat hij op hector brack. ende hector die bestreet hem weder met sijnre glauyen. ende hi wondede hem weder totter doot toe. ende hij werp hem half doot van sinen paerde. doe quam daer noch vander griecken side coninc eneas met veel ridderen die seer meersterlijcken conden strijden ende vechten Ende oec mede coninc humelius. welke te samen inden strijde brachten wel tien dusent ridderen. wat mochten doe die troyanen dencken. want si alle den dach inden strijde waren vermoeyt met groten swaren arbeyde. ende si en mochten die grieken niet meer hinderen noch deren. ende si en mochten hem seluen oec nauwelijcken bescutten noch beschermen Mer paris die quam vander rechter siden aen metten volcke van persen inden strijde. ende hi bestreet den coninc van frysia. welcke dat was vlixes sweer. ende hi sloech hem doot van welckes doot dat die grieken seer bedroeft waren Ende vlixes die woude wreken sinen sweer. ende hy bestreet paris met groter verwoetheit ende naersticheit. ende hi stac doot paris paert met sijnre glauien Ende wanneer als troeylus versach dat vlixes also vromelijcken ende manlijcken paris sinen broeder bestreet. so bestreet hi seer haestelijken vlixes weder met sinen swaerde. ende hij slooch hem also hardeliken op sijn hooft dat hi brac sinen helme ende sine wapenen. ende hi quetsede hem in sijn voerhooft Mer vlixes die bleef nochtan seer vaste op sinen paerde. ende hi wondede troeylus weder mit sinen swaerde in sijn aensicht. ende doe hadden die troeyanen moeten wijcken en hadde gedaen hector met sinen bastaert broederen die doe den griecken alsoe vromelijcken ende soe stoutelijken weder stonden Ende alle die gansen dach lanc. so reet hector nv hier nv daer. ende hi bestreet die griecken. ende hi liet achter dat volc dat hij soude geleyden Mer wanneer als hij sach dat die griecken den troeyanen te machtig werden. soe keerde hi hem weder tot sijnre eyghenre scaren ende hi versamende ende verenichdese weder met hem. waer | |
| |
om dat die troyanen die in die scare waren hem doe vtermaten seer weder verbliden. want si doe haren leytsman weder hadden Ende die starcke vrome hector die sprac hem allen toe mit goeden begeerliken bequamen woerden ende hi vermaende hem allen dat si ghedachtich wesen souden des groten onrechts ende onreden. dat hem vanden gryecken was ghesciet Ende oec mede dat ghene dat die gryecken hem noch doen souden werden si verwinres Ende mit aldusdanighen goeden bequamen woerden so vermaende hector den troyanen dat si vromeliken souden striden ende vechten ende dat si inden stride souden bliuen om seghe ende victorie te verwinnen ende te vercrighen Ende wanneer als si alle te samen willich waren ende bereet. soe leydese hector aen die rechter side doer een dal om weder te striden teghen den gryecken Ende aldaer viel doe een ontallike groet swaer dootslach der gryeken Ende hector die queldese sonder eynde. Ende coninc thoas die verslaghen hadde cassibulam coninc priamus bastaerts soen die reet al omme inder scaren. ende hi quetsede veel troyanen welcken coninc thoas. wanneer als coninc priamus bastaert sonen hem wel bekenden so vergaderden si alle te samen teghen coninc thoas om haren broeder te wreken ende si sloeghen coninc thoas van sinen paerde Ende wanneer als coninc thoas sijn swaert had gebroken so en mochte hi hem seluen niet langher beschermen noch bescutten. waer hi dat si sinen helme ende sine wapenen an stucken sloeghen. ende si makeden sijn hoeft altemalen bloot ende ongewapent ende si wouden hem te samen verslaen. welc dat si wel lichteliken souden ghedaen hebben en hadde ghedaen die hertoghe van athenen. welcke dat bestreet quintellenus. welke quintellenus coninc thoas dede groet swaer verdriet. ende hi stac hem seer swaerlijcken ghewont van sinen paerde Ende wanneer als hi noch al hier na enen anderen bestreet die seer moghende ende machtich was Doe spande paris sinen boghe ende hi schoet hem mit enen scutte in sijn ribben. met die hartoghe van athenen die en achte des niet. mer hi verlossede coninc thoas mit groten ghewelde. mit veel van sijnre hulpen seer ghewont vten handen der troeyanen. Ende hector die bestreet die gryeken seer crachteliken Ende hier om vander gryeken side so spannede coninc humelius sinen boghe ende hi schoet hector in sijn aensichte waer om dat hector seer toernich op hem wert. ende hi sloech mit sinen swaerde sijn | |
| |
hooft an tween stucken. waer bij dat coninc humelius neder van sinen paerde doot viel opter aerden ende doe en mochte hij sinen boge niet meer spannen Ende die griecken die vergaderden bi dat blasen van enen hoeren. op dat si hem seluen al so manlijcken ende vromelijcken souden bescutten. ende si hadden doe wel vij. dusent ghewapender ridderen bi hem Ende alhier binnen soe weec hector vten strijde. ende hi genakede den coninc. ende hi bat hem ende vermaende hem. dat hi woude met sinen volcke hem te hulpe comen. welcke coninc hem te hulpen ende te baten quam versch ende on vermoyt inden strijde met drie dusent vroemer ridderen Ende doe wert aldaer weder een groot strijt ende gheuecht ende een swaer dootslach Ende hector die vergaderde met ayax onderlinghe. ende si worpen malcander vanden paerden Ende menelaus die welke dat was coninc priamus bastaert soon die slooch al hier binnen doot enen wonderlijcken groten starcken grieke Ende celidamas die versloech moles van arex die welcke dat was coninc thoas neve Ende madian die bestreet coninc sedyon ende hi slooch hem doe wt sijn een oghe Ende sardellus die versloech oec enen groten machtighen vernaemden grieke Ende margaryton die bestreet coninc thelamon Mer thelamon die coninc weerde hem seer starkelijcken ende vroemelijcken ende hi wondede margaryton seer swaerlijcken Ende samuel die werp coninc prothenor van sinen paerde Ende aldus soe streden alle coninc priamus bastaert kinder seer vromelijcken. ende si schenden ende verderfden seer die griecken Ende alhier binnen so bestreet duglas den hertoghe van athenen die daer gheheten es menestenus. ende hi wonde hem seer. ende hi werp hem met sijnre glauyen van sinen paerde Ende want menestenus doe gheen glauye en hadde. sloech hi duglas alsoe sere met enen bloten swaerde. dat hi doe ontween sloech die nose van sinen helme ende hi quetsede hem aen sijnre nosen Ende wanneer als beamor versach dat sijn broeder gequetst was in sinen aensichte ende aen sijnre nosen. soe bestreet hi menestenus also vroemeliken dat hi hem werp van sinen paerde Mer menestenus die stont ouermits sijnre eygenre craften seer haestelijcken weder op. ende die ander broeder al was hi te voete die bestreet den seluen menestenus seer wrideliken ende nydelijcken Ende des ghelijc alsoe deden al die drie broeders te samen. want si menestenus vanghen wouden of | |
| |
ter doot brenghen. mer menestenus die bescermde ende bescutte hem seluen seer vromelicken ende cloeckeliken onder dese drie broeders mer met veel groter slaghen so sloeghen si menestenus helme ontween. ende si sloeghen hem alle sijn wapene van sinen liue Ende wanneer als coninc theucus sach dat menestenus street ende vacht in aldus groter noot. soe quam hi hem seer haestelijcken te hulpe ende te baten. mer die alre stercste hector die ghemoetede hem beyden mit enen bloten swaerde. ende hi bestreet menestenus ende theucus seer fellijcken ende wredeliken ende sonder twiuel si souden daer beyde hebben ghebleuen hadde ghedaen die starcke ayax die in haren hulpe hector bestreet mit dusent ridderen. welcke twee dat hi doe brochte ende verloste wt haren handen Doe quam daer noch vander troyanen side met sijnre scaren paris te stride. ende mitten ghelude van enen horen soe bestreet hi die gryecken mit twee dusent ridderen Ende nae hem sijn gheuolghet noch ander scaren vanden troyanen. ende aldaer wert noch een scarp groet swaer strijt Ende die troyanen die bestreden ouermits hectors hulpe die gryecken alsoe vromeliken. dat die gryecken hem den rugghe boden. ende si werden voeruluchtich. welcke hector als meester dares screef. die versloech veel der gryexscher ridderen Ende wanneer als hector al omme liep ende aen allen siden die gryecken bestreet. soe ghemoetede hem voer een tente coninc menon. welcken als hector sach. soe sprac hi tot hem aldus O du lose valsche verrader nv is ghecomen die tijt dat ic di dijn leuen benemen sal. om dattu mi patroculus dwaseliken naemste. ende rechteuoert mit dien woerden. soe bestreet hem hector ende hi werp hem van sinen paerde. ende hector die clam haesteliken van sinen paerde. ende hi sloech hem mit enen swaerde sijn hoeft van sinen lichame. ende nochtan soe en bedroefde hem hector van sinen wapenen niet mer wanneer als menestenus die hertoghe van athenen dit sach ende vernam soe reet hi haesteliken mit eenre glauien op hector Ende want hem hector doe voer hem niet en wachtede noch en hoede. so wondede hi hector seer swaerliken mer want hi hectors toeren seer ontsach soe wert hi harde voeruluchtich. van hectors aensichte. ende doe hector geuoelde dat hi was ghewont soe reet hi rechteuoert vten stride. ende hi dede sine wonde alsoe vaste binden. als datter gheen bloet wt lopen en mochte Ende daer nae so | |
| |
quam hi weder seer haestelijcken ten strijde. ende hij versloegh in sijnre toernicheyt veel griecken. nae dat meester dares boeck wt wijset Ende si deden den griecken alsoe groot ghewelt. dat si vluchtich wouden werden. ende si en mochten hem seluen niet bescermen langher noch bescutten. noch coninc agamenon die een ouerste was vanden griexschen heer en mocht hem oec niet bescermen waer bi dat die troyanen doe voert gingen met groten gewelde. ende sij volgheden die griecken altemalen voer haren tenten. als verwinres Ende si gingen inder griecken tenten seer manlijcken. ende si beroofdense ende si namen aldaer wt siluer gout wapenen ende ander costelijcke iuwelen. ende oec mede alden huysraet die si aldaer hadden ende si voerden dat wech van daen in hare sekerheyt ende vriheit Ende dit was die selue dach die welcke dat den strijt soude ghebracht hebben totten eynde. ende die troeyanen die souden verwinres geweest hebben Mer die auentuyre die vallet dicke ende menichweruen contrary den ghenen diese somwijlen schijnt mede te wesen Och wat broosscher ende crancker clynre sake so was dat die den troeyanen also seer verblinde ende bi sonder. hector die sijn eyghen doot ender sijns volcs yammer ende verdriet wel mochte hebben bescuttet. want in dien daghe hadden die troeyanen alsulcken voertganck ende auentuer dat si die grieken hare vianden mochten hebben verslagen ende voervluchtich gemaect. ende hem seluen vander toecomender vresen verlosset volcomeliken Ende sonder twiuel ten is den vroeden wisen mensche niet te prisen wanneer als hi hem seluen brengen mach bi goeder auenturen vten laste ende vten verdriet. ende vten toecomenden commer ende vrese dat hi dan der goeder auenturen ondancbaer is. ende laet dat dan sinen voertganc hebben om clene lichte saken. want een vre die dient dick ende menichweruen het dan een heel iaer doet op sommigen tiden Ende aldaer om cortelijcken te seggen so is die gene der goeder auentuyren onwaerdich. die daer ondancbaer is Ende aldus isset den onsaligen hector vergaen Want hij binnen dien dage mochte hebben sine viande met groter eren verslagen ende verwonnen want si doe alle te samen voervluchtich waren Ende vander griecken side quam tegen hector in sinen ghemoete exyonas soon. ende hij was genoemt thelamonis ayax. die welcke dat seer vroom ende starck was inden strijde die welcke dat hector seer vromelijken ende manlijcken bestreet Ende onder desen tween | |
| |
wert een seer groet strijt Ende als si onderlinghe al stridende spraken. so bekende hector dattet waer sijnre vriendinnen soen ende sijn neue ende dat hi was van sinen bloede. waer bi dat hector wert seer blide ende hi dede af sine wapenen ende hi sprac hem toe mit goeden begheerliken woerden ende hi seide hem toe mit gheloften. dat hi hem te wille woude wesen. ende hi vermaende hem dat hi binnen troeyen comen soude om dat hi sine maechscappe aldaer besien ende bescouwen soude ende sijn groet gheslachte twelcke dat hi hem weygherde. mer hi bat hem om sijns volcs. ende om sijns lants salicheit ende hit bat hector of hi ghunst ende vrientscappe tot hem droeghe. dat hi woude verweruen ende bescicken dat die troyanen die gryecken souden in vreden laten. welcke bede dat die onsalighe hector verhoerde. Ende bi dat blasen van enen horen soe gheboet hector den troyanen dat si den strijt laten souden. ende dat si binnen troeyen weder reysen souden Ende die troyanen die hadden begonnen dat vuer inden scepinghen der gryeken te ontsteken. ende si soudense alle te samen verbrant hebben. mer ouermits hectors ghebot ende sijn beueel so lieten si af ende si reyseden weder binnen die stat van troeyen seer ghemoeyt ende si waren qualiken te vreden Ende dit was also clenen ende lichten sake. waer om dat die troyanen doe af lieten vander verwinnighe victorie ende seghe. tot welker victorie dat si aldaer namaels mit geenre auentueren en mochten comen
| |
¶ Hoe die gryecken begheerden bestant van coninc priamus twee maenden lanc. ende dat wert hem gheghunt
ALs die poerten vander stat van troeyen mit goeden sekeren vaste sloten teghen der nacht al vaste ende wel waren ghesloten. ende daer na die nacht doe bicant was gheleden Ende een weynich tijts voer die dagheraet. die troyanen die noch ghesont waren die namen hare wapenen. ende si wapenden hem verbeydende dat licht vanden daghe. om dat si bi hectors haers leytsmans ghebot souden wtgaen te stride. mer wanneer alst dach ghewerden was soe seynden die gryecken boden tot coninc priamus. biddende hem om een goet vast seker bestant. twee maenden lanc. welc bestant dat hem wert gegunt bi consente ende goetduncken van coninc priamus hectors sijns soens. ende der ouerster vander stat van troeyen Ende binnen deser tijt. soe begroeuen die gryecken haer doden tot haren wille. ende die ghene die si niet en wouden noch en mochten begrauen die verbran- | |
| |
den si metten vuyre Mer achilles die niet ghetroost en mochte werden van patroculus doot. screyende ende wenende veel tranen In groter droefheyt ende in claghelijcken woerden Ende aldaer nae doe dede hi maken een seer costelic graf dat wt ghehouwen was van marmoren In welcken dat hi hem waerliken ende waerdeliken met seer groter eren patroculus lichaem dede begrauen Ende alsoe begroeuen oec mede die ouerste ende die meeste van griecken protheselaus lichaem In een marmoren stenen graf. met groter eeren ende waerdicheyt. gheliker wijs alset op die tijt ghewoonliken was Ende die troeyanen die deden binnen desen goeden vasten bestande hare wonden ende quetsinghen met medicinen weder genesen ende gesont maken. also dat si alle te samen binnen desen tween maenden al geheel ende weder gesont waren. Mer coninc priamus die niet getroost en mocht werden van sijns bastaerts soons doot die daer geheten was cassibula. den welcken dat hi vtermaten seer minnede ende lief hadde. ende seer weende ende screyde lange tijt Mer ten laetsten soe dede hi hem begrauen in een seer costelijc graf. met groter eren ende waerdicheyt In venus tempel Mer wanneer als cassandra verhoerde die suchtinge kerminge ende screyinghe der troeyanen. soe riep si ouerluyt met een verwoedelike stemme. ende seide aldus O ghi goede mannen van troeyen, waer om so heb dy aldus groot misbaer Ic segge v dat uwer alre verderfnissen toecomende sijn. waer om so en versoeket ghi genen vrede anden griecken eer dat ghi alle gader te samen wredeliken metten swaerde vergaet ende te niet coemt. ende dat dese scone edele stat van troyen te gronde wert verdoruen ende gedestrueert ende oec neder geworpen Ende uwe cleyne kinderkijns met haren moederen iamerliken ende bitterlijcken bescreyende. eweliken enen bedwangeliken dienst sullen hebben. Ende wanneer als cassandra aldustanige woirde ouer al riep. ende in geenre maniere en woude swijgen. so dedese coninc priamus lange tijt gesloten leggen Ende binen deser tijt. doe beclaghede palamydes vtermaten seer. als dat coninc agamenon waer die ouerste ende haerre alre prelate Ende hi seyde dat hij des onwaerdich waer. dat hi doe macht soude hebben ende heerlicheyt bouen also vele hertogen grauen ende anderen edelen vorsten. ende dat hi des niet waerdich en waer Ende dat hij oec mede van hem niet gecozen en waer noch oec mede vanden gemenen coningen van grieken. want daer wasser meer dan dertich Mer alleen van drien coningen soe was hi ghecoren
|
|
Auteursrechtvrij