Historien van Troyen

¶ Dit is dat sestiende boec. ende die vierde strijt ende hoe dat die gryeken insetteden ende raet namen hoe si hector verslaen souden

ENde doe die duusternisse des nachts aenghecomen was ende die sterren openbaer liken ouer al aen dat firmament stonden datmense wel sien mochte merckelijcken anden hemel so vergaderden alle die coninghen hartoge grauen princen ende grote vorsten der gryexscher heren. des seluen nachtes in groter stilheyt ende heymelijckeyt in coninc agamenons tente. die doe haer ouerste was ende si hadden te samen enen scarpen wijsen raet. hoe dat si hector van troeyen alre best ter doot souden brenghen want si seiden alle ghemeenlijcken ten si dat sake dat hector doot gheslaghen werde van ons soe en moghen de troeyanen nymmermeer verwonnen werden vanden gryecken. want hi is alleen alle der troyanen bescutter ende bescermer. mer doe sloten si te laetsten in haren rade dat achilles dat soude volbrenghen. niet alleen mit sijnre crachte mer oec mede mit sijnre abelheyt. subtijlheit ende wijsheit. welcke achilles dat doe aen nam mit groter naersticheyt te volbrenghen. want hem dat alre best toe behoerde ouermits dat hi seer starck mede was. ende oec mede om dat hi wel voersach dat hector sinen doot seer begheerde te sien Ende ten waer dat sake dat hi hem naerstelijcken niet en wachte voer hectors handen hi soude mit quader snoder auentueren steruen ende vergaen van hectors handen Ende aldus soe is desen raet ten eynde ghecomen. ende si sijn alle te samen weder omme ghegaen tot haren tenten om also daer haren nacht ruste te nemen Ende wanneer als die dagheraet des anderen daghes weder quam soe ghinghen die gryecken weder in haren wapenen ende si deden hem aen. want die alre stercste hector die was gecomen vter stat van troeyen inden velde om te striden sonderlinghe mitten ingheboren troyanen Ende inden eersten. so trat hector inden stride mitter scaren van troeyen Ende alsoe als meester dares heuet bescreuen. soe waren aldaer der ghewapender troyanen anderhalf hondert dusent ridderen Ende alhier om so wert aldaer

[fol. 73v]

een groot swaer strijt aen beyden siden Ende paris hectors broeder. die is gecomen met die van persen met bogen ende gescutte. ende hi heuet der griecken veel ghedoot ende gewont Ende al hier na so is coninc agamenon gecomen inden strijde. welken dat hector stack van sinen paerde seer swaerlijcken ghewont. Ende doe bestreet achilles hector. ende met groter crachten sijnre slaghen. soe brac hi hectors helme op sijn hoeft Mer troylus ende eneas die quamen hector te hulpe Ende doe bestreet die starcke diomedes eneas. ende hi wonde hem seer swaerlijcken. ende hi sprac hem aldus toe O goede raetsman die in mijnre teghenwoerdicheyt den raet gaueste coninc priamus. dat hi mi misdoen soude Mer dusultste dat voerwaer weten. is dat sake dattu aldus dicke coomste inden stride in minen handen. soe sulste van minen handen steruen Ende met desen woerden so stac diomedes eneas van sinen paerde Ende hector die bestreet weder achilles alte wonderlijcke seer wredeliken. ende hi brac sinen helme op sinen hoofde Mer wanneer als thedeus soon versach dat achilles also swaerlijcken ende wredeliken bestreden was. so bestreet hi hector weder seer verwoedelijken ende hi slooch hector met enen swaerde een grote wonde Mer hector onveruaert ende onverlaecht vander seluer wonden die bestreet dyomedes also vromeliken dat hi hem werp van sinen paerde Als troylus sach dat diomedes was geworpen opter aerden. soe trat hi van sijn eyghen paert. ende hi bestreet diomedes te voete met sinen swaerde Mer dyomedes die bescutte hem seluen seer vromelijcken ende manlijcken Ende hector ende achilles die streden noch onderlinghe binnen deser tijt Mer doe quamen daer noch te strijde coninc menelaus vlixes polymedes neptholomus palamydes. ende noch veel ander grieken vanden heren Mer vander troeyanen wegen. so quamen alle die coningen met haren volcke. die coninc priamus waren te hulpe ghecomen Ende alhier om so wert aldaer een groot swaer strijt aen beiden siden. coninc agamenon. ende coninc pandolus. die vergaderden onderlinghe. ende si worpen malcander vanden paerde Ende coninc menelaus die quam paris te gemoet Ende wanneer als si malcander onderlinge wel bekenden. soe streden si sere vromelijcken teghen malcander Ende menelaus die reet alsoe vromeliken op paris. dat hi hem stack van sinen paerde met sijnre glauyen. waer om dat paris hem scaemde voer helena. dat hem coninc menelaus die confuyse dede Ende onder deser quam vlixes ende hij werp

[fol. 74r]

coninc atestus van sinen paerde ende hi nam sijn paert ende sende dat tot sijnre tenten Ende palamides die bestreet den ouden napon ende hi wondede hem daer alsoe. dat hi doe ter stont doot bleef Ende neptholonius die bestreet archilogus. ende si worpen malcander van haren paerden ende polidamas die bestreet palamides. ende hi werp hem van sinen paerde. dat hi seer ghewont was Coninc scelenus ende coninc karras die vergaderden ende streden onderlinghe mer coninc scelenus die werp seer ghewont coninc karras van sinen paerde Ende coninc philomenus di bestreet den hertoghe van athenen. welcken dat hi werp van sinen paerde. ende hi seynde dat paert rechteuoert tot sinen volcke Ende philoteas die bestreet coninc remus. ende si worpen malcander van haren paerden Coninc theseus ende coninc euryalis. die versamenden mit stride Ende coninc priamus bastaerts sonen die deden doe op dien dach grote wonderlijcke dinghen teghen den gryecken Ende coninc thelamon die bestreet coninck serpedom Ende coninc thoas ende achilles die onderlinghe heymelicke maghen waren die bestreden mit ghesamender hant hector van troeyen mit groten harden fellen wreedelijcken slaghen. ende si sloeghen hectors helme van sinen hoefde aen stucken. alsoe dattet bloet ouer al sijn aensichte liep. Mer hector die sloech coninck thoas weder sijn nose half van sinen aensichte Ende doe quamen hectors bastaerts broederen hem seer vromelijcken. ende mannelijcken te hulpe mit groter haesticheyt ende naersticheyt. ende si verdruckeden die gryecken seer wonderlijcken ende crachtelijcken Ende si vinghen coninck thoas ende si quetseden ende wondeden coninck thelamon vtermaten seer ende si worpen hem van sinen paerde. dat hi aldaer ouer doot bleef legghen opter aerden. welcken coninc thelamon dat die gryecken ouer doot droeghen tot haren tenten Ende coninc thoas die wert ghbracht van diephebus ende anthenor gheuanghen binnen troeyen Ende te laetsten so woude menelaus paris slaen mer wanneer als paris dat vernam. soe spande hi sinen boghe ende hi scoot coninc menelaus een dootlijck ghescutte in sinen liue Ende hi wondede ende quetsede hem also swaerlijcken. dat hi voer doot ghebracht wert in haren tenten. mer alsoe als sijn wonden hem haestelijcken waren verbonden ende ghesaluet soe quam coninc menelaus rechteuoert weder inden stride, ende hi sochte paris om

[fol. 74v]

wrake weder teghen hem te doen welken paris wanneer als hi hem weder vant soe reet hi weder met sijnre glauien op paris. ende hij soude hem doe ter doot ghewont hebben. hadde eneas gedaen. die paris met sinen scilt bescuttede ende bescermde Want paris die was doe ongewapent. ende hi hadde met wille sine wapenen wt gedaen doe coninc menelaus hem voersach Ende want paris ongewapent was. so geleyde hem eneas met veel geselscaps binnen der stat van troyen Ende doe bestreet hector coninc menelaus. ende hij woude hem vangen. welcke dat hij doe niet wel doen en mochte. ouermits dat hem ontallike veel griecken te hulpe ende te baten quamen. ende aldaer om liet hector doe melelaus achter ende hi bestreet der griecken scaren ende hi sloechger ontallike veel doot waer bi dat die griecken doe voervluchtich werden Ende want doe die sonne onder ghinc. daer om soe is die strijt doe ten eynde ghecomen ende si scheyden hem doe van malcander