Historien van Troyen

[fol. a1r]

¶ Hier beghint dat prologus inder historien van troyen als si bescreuen is bi den rechter guidonem vander columnen

AL isset dat veel oude historien mit niewen gesten verdonckert werden so sijnder nochtan sommighe oude historien voerleden die om hare vromicheden also vaste inder kennisse ghehouden sijn datse die outheyt vanden voerleden tiden niet wt doen en kan noch die oude langhe iaren mit den swighen en can besluten. want in hare groter vromicheden die ghedenckenissen also gheleghen sijn wanneer die wercken der ouder vromer mannen diemen in scriften vindet den nae comenden mensche recht of si yeghenwoerdelijcken ghesciet waren voer oghen worden gheleyt Ende vanden vromen mannen welcke die outheit der werelt mitter doot te niet heeft gemaect. datmen nochtan int lesen hare historien recht of si leefden den goeden vromen luden gheuen een bewijs der vromicheyt Ende want dat verderf der stat van troeyen mit lancheyt des tijts niet vergheten en mach werden. mer inder memorien van beelem historie scriuers mit trouwer waerheit is ghesettet Ende oec sommighe mit poetrien die selue historie hebben verciert. datse niet alleen den sommigen diese hoerden niet waer en schijnt te wesen. mer alheel versiert Van welcken die grote homerus in sijnre tijt onder die griecken die waerheyt der voerseider historien also heuet mit poetrien ghesettet. versierende daer onder veel dinghen die niet ghesciet en sijn. ende veel dinghen die gesciedet waren in een ander forme ghesettet danse ghesciet waren Ghelikerwijs als hi seit dat sommighe afgoden die die heyden plaghen te eeren dat volck van troyen verdoruen hebben recht ofse met hem luden leuendich hadden gheweest. wes dwalinghen die poeten namaels hebben gheuolghet op dat si daer bi souden gheuen te verstaen dat homerus die principael meester is van visierden gesten ende fabulen recht of si waerachtich waren te setten. ghelikerwijs als ouidius sulmonensis met veel woerden in veel boeken naemaels heeft gesettet des ghelijc heuet oec vergilius veel dinghen ghesettet die waerheit nochtan niet achterlatende als hi vander historien van troyen roerde ende heeft nochtan van homerus visierde fabulen niet willen abstineren. ofte swigen Mer op dat die waerachtighe scriften der scriuers der historien altoes bliuen moghen in veruolghenden tiden biden nauolghenden menschen ende sonderlinge der gheenre die grammaticam lesen om dat si die waerheit van die valscheit mogen ondersceyden. ende dat bisonder dier dingen die vander voerseyder historien bescreuen sijn inden boeken van grammatica bi ditem ende phrigium die

[fol. a1v]

inden strijt van troeyen stadeliken yegenwoerdich waren daer si of geweest hebben warachtige ende getruwe vertellers ende scriuers Welck men vinden sel in desen yegenwoerdigen boec. bi mi gwidonem vander columpne ouergesettet also als si te athenen gevonden worden bescreuen in haerre beyder boecken alleens ludende. recht of het in consonancien van eenre van eenre stemmen gescreuen hadde geweest. welcke twee boecken oec een romeyn genoemt cornelius des groten salustius neef gearbeidet heeft in latijn ouer te setten Ende want hij alte corteliken daer ouer ghelopen heeft dat hij die particulen der hystorien die die menschen seer anlocken souden te lesen ende te horen after ghelaten heeft wt groter cortheit. Daer om selmen in desen boecke altemael vinden wat dat vander historien alheel. of bi deelen gesciedt is Ende oec wat die oorspronc der vyantscappen ende des sceels was datter griecken lant verwect hadde tegens die van troyen. op dat onder den name van griexlant. niet dat grote griexlant mer ytalien als die sommighe willen soude worden verstaen die seggen dat tegens die van troeyen dat grote griexlant dat is ytalien dat wi huden te daghe dat roemsche lant heiten met dat cleyn griexlant ghetogen is te strijden met somigen anderen cleynen hoop van volck ghelijck als dit veruolch der hystorien die hier nae volget claerliken sel bewijsen In deser hystorien sal bescreuen worden. wie die coningen der griecken gheweest hebben. ende hoe veel der geweest heeft Ende wie die hartogen ofte princen der griecken gheweest hebben die met ghewapender hant. ende met veel scepen in dat heer ende strijt getogen sijn ende wat manieren van wapenen si plagen te ghebruken Ende oec wat coninghen hartogen ende princen ghecomen sijn te hulpe der stat van troyen. ende hoe lange tijt die victorie vertogen is. ende hoe menichweruen daer ghestreden ende gheuochten is ende in wat iaer dattet gesciet is. ende wie inden strijde verslaghen sijn. ende van wien dat die slach ghesciedt is Van welcken allen die voerseide cornelius int meeste deel niet gheseit en heeft Hier om isset tijt datmen gae totter ordinancien der historien als si warachtelijc gesciet is

¶ Explicit prologus