Het groote liede-boeck

417. Een ernst-haftich Ghebedt-liedeken, om Goddelijcker hulp en bystant, teghen alle temtatien ende aenvechtinghen des leydighen vyants.

Op de wyse: van den 118. Psalm. Dancket den Heer seer hooch ghepresen.

CRachtighe Godt seer hooch verheven
Toont nu u macht, biedt ons u handt
Nu wy in dit jammerlijck leven,
Moeten stryden aen elcken cant,
Teghens den vyant onser zielen
Die om ons gaet dach ende nacht,
En soeckt ons ziele te vernielen
O Heer, hout ghy voor ons die wacht.

LAEt ons niet vallen int becooren,

Maer verlost ghy ons van het quaet,
Dat hy ons daeghlijcks stelt te vooren
Door synen boosen valschen raet,
Wat hy vertoont, dat is gheloghen
En enckel valscheyt met bedroch
Soo hy ons Ouders heeft bedroghen,
Soo bedriecht hy daeghlijcks noch.

Staet Heer by ons, aen onser zyden

Want u is het rijck en die macht
Soo moghen wy campen en stryden,
En overwinnen deur u cracht
Ghy zijt machtich ons te bewaren
Heer leert ons sulcks betrouwen vast,
Dat ghy ons wilt in als bewaren,
Bystaen en draghen onsen last.

HEeRe wilt ons 'tgheloof vemeeren

Dat het ons zy als eenen Schilt
Alle pylen van ons te keeren,
Daer met men ons deur schieten wilt,

[fol. Fff3v]

 

Dat ons die pylen niet en raken,

 

Noch en schaden in ons ghemoet

 

Wilt doch Heere over ons waken,

 

En neemt ons soo in u behoet.

 

MEN mach seer vast op u betrouwen

 

Want ghy staet heel ghetrouw'lijck by,

 

In allen anghst ende benouwen,

 

In aller noot hoe dat hy zy,

 

Daerom (o Godt) comt ons te baten

 

In onsen anghst en swaren noot

 

Wy ons daer op gheheel verlaten,

 

Want u barmherticheyt is groot.

 

Soo bevelen wy u met namen,

 

Ons ziel en lijf tot alder tijdt

 

Draecht sorghe voor ons al te samen

 

Beschermt ons doch in desen strijdt,

 

O Godt dit bidden wy aendachtich

 

Vervult het doch na ons begeer,

 

Dat bidden wy u nu eendrachtich

 

Door Iesum Christum onsen Heer.