Het groote liede-boeck
(1625)–Leenaert Clock–
AuteursrechtvrijOp de wyse: van den 119. Psalm. Ghelucksalich is den mensche die leeft.
MEt lof en danc laet ons voor Godt bereyt
Verschynen, hem te loven en te prysen,
Die ons deur sijn groote barmherticheyt
Sijn goetheyt end vrientlijcheyt gaet bewysen
En ons beroept totten Hemelschen rijck,
Om eeuwelijck met hem te verjolysen.
| |
[Folio Fff1v]
| |
Alle misdaet vergheeft hy ons ghelijck
En schelt ons quijt die veelheyt onser zonden
Om ons hulp te betoonen doet hy blijck,
Want hy heelt onse vuyl stinckende wonden
Maeckt die onreyn zijn, suyver wit als snee
Wie mach zijn goetheyt nu genoech verconden.
Tot onser baet, gheeft hy ons synen vree
Die ons deur Iesum Christum is verworven
Doen hy een offerhande voor ons dee,
En is vol smerten aen het cruys ghestorven
Op dat wy vreed' souden hebben bequaem
Die wy waren door zonde gantsch bedorven.
Tot dese uyre beroept ghy ons al tsaem
O Godt dat moghen wy vastlijck betrouwen
Maer ghy wilt dat wy deuchtsaem naer't betaem,
En neerstich zijn, desen vree t'onderhouwen
Onder malcanderen soo dat behoort
In rechter eenigheyt voor u aenschouwen.
Ya hier toe hebben wy ons rechte voort,
Te samen als een hert overghegheven,
Om desen vrede willich onverstoort,
Als een herte en ziele te beleven
O Heer hier toe u milde handt ons biedt,
Op dat wy hier in nimmermeer en sneven.
Staet by, en wilt ons Heer verlaten niet
Helpt ons tegen des vyants aenslach stryden,
Die dach en nacht om ons gaet en bespiet
Die vreed' en eenicheyt doet seer benyden
Toont int bekooren eenen schoonen schijn,
Voor sijn bedroch, wilt ons o Heer bevryden.
KIntlijck laet ons in u bescherming' zijn,
Houdt ons in vree en eenicheyt met namen
O Godt nae u goet welbehaghen fijn
Bint ons doch met des vredens bant te samen
Om neerstelijck te houden alle tijdt
Die eenicheyt des Gheestes na't betamen.
| |
[Folio Fff2r]
| |
TSamen leert ons vrede soecken met vlijt
En hem met grooter neersticheyt na jaghen
Dewijl ghy oock een Godt des vredens zijt,
En hebt aen eendracht en vreed' u behaghen
Soo gheeft dat uwen vreed' neem d'overhandt
In onse herten al ons leve daghen.
KENlijc maect ons, en geeft ons recht verstant
En leert ons soo op u Gheboden mercken,
Dat uwen vrede mach seer abondant
Over ons vloeyen, wilt dit in ons wercken,
Met uwer mogender en grooter cracht
Wilt ons ghestadelijck hier in verstercken.
Soo dat wy nu ghestadich dach en nacht
In u schoon huys des vredens mogen woonen
Wy biddent u o Heere met aendacht
Wilt ons doch nu, soo u ghenade toonen,
Oms te samen nemen in u behoet,
En ons hier toe, met uwer goetheyt croonen.
|
|