Het groote liede-boeck

[fol. *2r]

Voor-reden tot den Lesers ende Sanghers deses Lieden-Boecx.

BEminde in Christo, naedemael wy lesen, weten ende bevinden, dat Godt syne gaven menigherley wyse uytdeelt, na sijn Godtlijck welbehaghen, maer ghelijckewel wil, dat een yeghelijck, (die sijn pondekens ontfanghen heeft) hem beneerstighen sal, die selve in den woecker te stellen, sal hy anders ghepresen, ende naemaels in sijns Heeren blyschap ghewesen, ende niet met ghebonden handen ende voeten in de Helle ghesmeten worden. Ende den sendt-bode Iesu Chrsiti, Paulus, ons leert: Dat wy malcanderen sullen vermanen met Psalmen ende Gheestelijcke Liedekens. So hebbe ick dan, nae die cleyne gave die my de Heere ghegeven heeft (in myner swackheydt) ter eeren Gods, ende tot stichtinghe mijns Naestens, dese naer-

[fol. *2v]

volghende Liedekens ghedicht, beschreven, ghegheven ende ghesonden aen diversche persoonen, op hare aenhouden ende begheeren, oock uyt goeder ghenegentheyt van my, op datter sommighe tot meerder yver ende aendacht mochten ghebracht worden, den Heere te vreesen, ende sijn Woordt lief te cryghen, ende op dat elck een eyghen Vermaninghe, Ghebedt, Lofsanck ofte Dancksegginghe mochte hebben, 'tselve van buyten leeren, ende hem daghelijcks met des Heeren Woordt vermanen, Godt dancken, loven, ende synen Name aenroepen, etc. Ende hebbe dese Liedekens meest ghestelt op de Letteren der Namen, aen den welcke sy ghedicht ende ghesonden zijn, ende hebbense voor desen by partyen in Druck laten uytgaen, op datter meer mede mochten ghedient worden, ende hebben den arbeyt stichtelijck bevonden tot des Heeren prijs. Ende ben nu van velen gebeden, alle dese by partyen uytgeganghene (met noch vele die noyt ghedruckt en waren, als oock nu noch vermeerdert) ordentlijck te vergaderen, op die Letteren van den A,B,C, te stellen, ende in een ordentlijck Register te brenghen, op datse een yeghelijck t'synen gherieve lichtelijck vinden, ende tot den

[fol. *3r]

pryse Gods ghebruycken mach. Maer terwylen ghehoort is, dat wy malcanderen met Psalmen ende Gheestelijcke Liedekens vermanen sullen, ende yemant mochte desen mynen arbeyt (uyt liefen, na myner cleyner gaven) versmaden, ende segghen: dit zijn Menschen ghedichtselen, ende gheen Psalmen, ende meynen mochten, dat het ghene, d'welck David met den kinderen Assaph ende Chore gesongen heeft, alleen, Psalmen zijn. So heeft het my goet ghedocht, dat woordeken Psalm te verclaren, wat het gheseyt zy, alsoo het die spraeck gheleerden uytlegghen. Te weten: een Ghebedt, een Gesanck, ofte lieflijck stem-werck, als op Harpen, Luyten, Vedelen, etc. D'welck David inder Figuyren met den vleeschelijcken Figuyrlijcke Israel ghesonghen ende ghespeelt heeft op Instrumenten, verlicht door den H. Gheest.

Maer Christus Iesus is die rechte Psalmist, die aen den stamme des Cruyces uytghespannen, ghespallieert heeft in der Waerheyt voor Godt synen Vader, ende alsoo oock alle leden Christi, die den hoofde Christo, in der waerheyt ende gehoorsaemheyt geerne navolghen, als sy haren anghst, noodt, ghebreken ende ellende Godt door Christum claghen, hem

[fol. *3v]

om hulpe, troost ende bystant aenroepen, sijn goetdaet bevindende, hem dancken ende loven, syne wonder-wercken (hem tot pryse) vertellen, malcanderen stichten ende vermanen, ja de selve Psallieren, ende het moghen alsulcke Liedekens Christelijcke Psalmen ghenoemt worden, ghesonghen door synen Gheest, des Conincklijcken Propheets Psalmen onghesmadicht. Begeere derhalven, dat doch niemant en misbruycke, 'tghene wy alhier (als met der Weduwen, die twee myten inleyde) ter eeren Gods uyt liefden te weghe ghebrocht hebben. Maer alsser yemant goets moets is om te singhen, dat hy 'therte voor henen bereyde, 'tselve voor Gode ontbloote, ende dat den anghst, die liefde, ghehoorsaemheyt, 'tgeloove, het betrouwen, ende de bevondene weldaet, syne lippen bewegen mogen int⁺ singhen. Op dat hy, naer Davids vermaninghe, mach met verstande singhen, also oock Paulus Psallieren ende singen⁺ wilt, segghende: Ick sal singen met den Gheest, ende ick sal singhen met den zin. Want ist sake dat de Harpe ende 'tsnarenspel onses herten niet alsoo ghestelt, ghespannen, ende ten rechten toone gebrocht en wordt, soo salt voor Gode alsoo weynich clincken ende luyden, als eenen onbe-

+ Psa.47,8

+ 1.Cor.14,15

[fol. *4r]

houwen Block (om te spelen voor die Menschen) clinckt, ofte soeticheyt der Melodyen voortbrenght. Aldus begeere ick, dat ghy Gods goede gaven ten besten ghebruyckt, ende desen mynen jonstighen arbeyt in goede neemt: Godt verleene ons t'samen sijn genade daer toe, door synen beminden Sone Christum Iesum, Amen.

Desen 1. Ianuarij, Anno 1604.

Van my aller menschen Goet-gunner.

L.C.

Volherdende verwintmen.