Het Rijper Liedtboecxken inhoudende hondert schriftuerlijcke liedekens dewelcke noyt voor desen in druck en zijn gheweest
(1624)–Jacob Claesz–
AuteursrechtvrijOp de wijse: Mijn alderliefste verheven die opter aerden. | |
[pagina 222]
| |
STaet nu heflijck te bloeyen
Ghy spruyten valijant,
Wilt wassen ende groeyen
T'wijl ghy zijt nieu gheplant,
In s'Heeren lusthof schoon:
Wilt nu in desen daghen
Veel goede vruchten draghen
En heerlijck staen ten toon
Ylt nu tot allen stonden
Dat ghy in desen tijt
Vreuchtbaer meucht sijn bevonden,
Voor Godt ghebenedijt,
Ontluyckt doch nu seer ras,
En wilt soeten reuck gheven,
Als bloemkens reyn beseven
Soo weest nu op dit pas.
Nu ghy u hebt begheven
Tot rancken alghemeyn,
Aenden wijnstock verheven,
T'welck Christus is certeyn
Wilt nu doch naet betaem,
Seer liefelijck en schoone,
Veel vrucht dragen ydoone
Ghy Ieuchden altesaem.
IA als de vruchtbaer boomen
Die gheplant staen seer net,
By clare water stroomen,
En gheven onbelet
Haer vruchten seer verheucht
Te rechter tijt ghepresen
| |
[pagina 223]
| |
Also wilt oock in desen
Steedts bloeyen in die deucht.
Christlijcke vruchten bringhen
Ghelijck als dat behoort,
Door d'enghe Poorte dringhen
En gaen soo willich voort,
Al na de schoone stadt,
Vol blijschap ende vreuchde
In uwe jonghe jeuchde
Bemint doch desen schadt.
OP dat ghy dan na desen
Meught comen in de vreucht,
Soo oeffent u ghepresen
Nu stedich in de deucht,
Loopt so al na den prijs,
Schickt die doch nu te winnen
Dat ghy hier na meucht binnen
Gaen met de Maechden wijs.
Sijt ghy aldus beraden
O Ieuchden al ghelijck,
Soo sal Godt met ghenaden
Van u nemen geen wijck:
Maer u steets blijven by
In alle u benouwen
Want die hier op hem bouwen
Wil hy vertroosten bly.
Daerom stelt al u sinnen
Nu op het eeuwich goet,
En wilt de Heer beminnen
Met hert ziel en ghemoet,
| |
[pagina 224]
| |
En wandelt soo met lust,
Neerstich in Christus paden
Sijn woort laet u steets raden,
So comt u ziel in rust.
O Ieucht laet ons al tsamen
Na desen rust seer fijn,
Nu haecken naet betamen
Ende oock neerstich zijn,
Om nu in desen dal
Veel schoone vruchten reyne
Te draghen al ghemeyne,
Dat wy met t'lief ghetal.
CHristus moghen behaghen
Die ons nu sullecx raet,
Dat wy sonder vertsachen
Nu sullen vroech en laet
Veel vruchten draghen schoon,
Op dat wy na dees tijden
Eeuwich moghen verblijden
Met hem in s'Hemels troon.
TE Recht wilt ons al tsamen
O Heer met uwen gheest,
Bedouwen seer bequame
Dat wy in dit foreest,
Soo vruchtbaer moghen zijn,
Dat wy in u voorhoven
V namaels moghen loven
Met u kinderen fijn.
|
|