Het Rijper Liedtboecxken inhoudende hondert schriftuerlijcke liedekens dewelcke noyt voor desen in druck en zijn gheweest
(1624)–Jacob Claesz–
AuteursrechtvrijOp de wijse vande thien Gheboden, Of claer als de Son sullen
| |
[pagina 220]
| |
GHy al die u nu hebt begheven
In dees tijt op ten smallen baen,
Welck leyt totten eeuwighen leven:
Wilt nu doch vromelijck voor gaen.
VERlaet nu al u s'vleesches lusten
En volghet Christum uwen Heer,
Wt liefden als die welgherusten
Bewijst u nu als rancken teer.
Te dragen vrucht heerlijck en schoone,
Tot prijs van Godts heylighen naem:
Wilt u so alle tijt betoonen,
Och mijn vrienden allegaer.
In al u doen hebt doch voor ooghen
Christum uwen Heylandt seer fijn
En wilt nu uyt al u vermoghen
Seer neerstich zijn navolghers sijn.
Al schijnt het vlees wat zwaer te wesen
Ghedenckt doch altijt op die vreucht,
Die u sal ghewerden na desen
Ist dat ghy trou volhert in deucht.
Claerlijck spreeckt Christus wilt dit vaten
Wil my yemant nu volgen naer,
Die moet zijn eyghen leven haten
En nemen zijn cruys openbaer.
OP hem en volcht my naet betamen
Want die zijn leven dit bekent,
Behouden wil die sal met schamen
Dat verliesen in groot elent.
Soo laet ons nu te recht versinnen
Of wy nu alle zijn beraen,
| |
[pagina 221]
| |
Om Christum te volghen uyt minnen,
Ghelijck hy ons is voorghegaen.
Die is ghegaen alsoo wy lesen
Door druck en oock door lijden zwaer,
In sijn rijck schoon en uytghelesen,
Daerom laet ons nu allegaer.
Op desen wech oock neerstich treden
Hy leyt ons na des Hemels troon,
Tot die eeuwighe rust en vreden,
Daert seer lieffelijck is en schoon.
Claerlijck laet ons dit nu doorgronden
En desen wech wandelen claer,
Op dat wy dan na desen stonden
Moghen met duytvercoren schaer.
Heerlijck en schoon werden verheven
Met witte kleederen aen ghedaen
Die Christus de ghene sal gheven,
Die hier recht in zijn weghen gaen.
TE Recht sal hy haer gaen beloonen
Met vreucht en blijschap openbaer,
En met den croon der eeren croonen
Op den Berghe Zyoen voorwaer.
Hier toe wilt ons o Godt verheven
Door uwen gheest maecken bequaem,
Dat wy hier namaels sonder sneven
Moghen by u comen te saem.
|
|