Officia Ciceronis, leerende wat yeghelijck in allen staten behoort te doen, bescreuen int Latijn

Of rechtuaerdicheyt beter is, dan of maticheyt best is.
Het lx. Capit.

Men sal ter auonturen ooc vragen, oftmen dese ghemeenschappe (die alder bequaemste is voor de menscelike nature)

[fol. 62r]

oock houden sal bouen maticheyt ende bescheydenheyt. Neen dat en dunct my niet goet: want men vint veel saken van welcke sommighe soo schandelijcken, sommighe soo lasterlijcken zijn, datse een wijs man oock gheensins doen en soude, al mochte hy tvaderlandt daer door behouwen. Possidonius heefter vele van dese by een vergadert maer zijn meest soo leelick ende snoode, dattet oock dorperheyt ware die te noemen. Dese dan en sal hem niemandt ter liefden van tghemeen weluaren onderwinden: noch en sal oock sulcx van tghemeen weluaert niet begheert werden. Maer daeromme ist een bequame sake met dese gherechticheydt: dat de tijt soo niet en mach verkeeren, datter tghemeen profijt yet aen gheleghen is: welck van alle dese de wijse man doet. Waer wt nv volcht dat onder tverkiesen van de behoorlijcke wercken ofte officien, sulckdanighe officien d'alder edelste zijn: door welcke de ghesellicheydt ende ghemeenschap der menschen onderhouden werdt: ende behoort het welberaden werc te volghen nade kennisse ende vroetheyt: ende werdt alsoo tvoordachtige doen beter beuonden dan tvroedelijck bedencken. Tot nv toe dan sy hier af gheseyt: want dese sake soo verclaert is, dattet niet swaer

[fol. 62v]

en sal vallen int ondersoecken van tbehoren, welck voor ander te stellen is. Maer in dese ghemeenheyt zijn trappen van de behoorlicheit: wt welcke men licht verstaen mach wat een yegelijck nutste oft beste is. Also strect d'eerste tot Gods eere, de tweede tot het vaderlants oorbaer, de derde tot den ouders, ende soo voorts nederwaert allencxkens wat wy yeghelic sculdich zijn. Soo machmen nv verstaen wt dese voorseyde dinghen int corte gedisputeert, datmen niet alleen en plach te twifelen of een sake eerlijck sy om doen dan schandelick: maer welck oock van twee voor ooghen ghehouden eerlike saken het eerlijcste sy: het welcke (so ick voorgheseyt hebbe) van Panaetio ouergheslaghen is. Maer nv wil ick tot d'ander saken gaen.

Eynde vant eerste boeck.