Mastreechter versjes en leedsjes (onder ps. P.C.d.B.)



[pagina 14]
De pisbak Bij 't aofbreke van den awwe pisbak oppe Merret in 1927. Op te merret stònt 'n huiske In et midde gans allein, Iez're plate mèt 'n deekske En van binne twie blauw stein. Aon de veuj laog dèks 'n huipke Wat tao neet waor ingewejd, Mer door eine, dee neet wachde, Stiekumkes teneer gedrejd. En de loch waor neet te ruuke; Nein! die waor neet altied veers, Zeker neet es zjus e mooswief Dao zoe get had neergepeers. Mer noe weurd et aofgebroke En me weurd et huiske kwiet, Ondergrònds goon ze et make Nao de eise van den tied. En de café's van de merret Höbbe vreiselik et land: Veur 'n dröpke gòng me pisse In de Ruiter of bij Brand. En de zaak zal deftig weurde, Urinoire mèt closèt, Wel kòs et verdomd väöl duite Loos iech lès in de gazèt. Al dat geld van eus belasting, B. en W. dat deit miech spiet; Höbbe veer, Mastreechteneere, Nòndetjouw dan zoeväöl sjiet??