Mastreechter versjes en leedsjes (onder ps. P.C.d.B.)

[p. 4]

Mastreech's volksleed
wijze: Limburg mijn vaderland

Boe me gaar gein hollans sprik

Wel e bitsje frans,

Boe me altied lollig is

Bei meziek en dans,

Boe me hiel gemoedereerd

Drink ze pötsje beer,

Dao is et Vaderland

Vaan de Mastreechteneer. bis.

Boe me vaan de kale sjiet

Geine mieter kint,

Boe me vaan eus apeland

De sjoenste meitskes vind,

Boe me zoe good leije kin

Eine vreigeleer.

Dao is et Vaderland

Vaan de Mastreechteneer. bis.

Boe me wel ins fuive geit

Gaw nao Breusselt tou,

Boe me gans verstoete is

Door et roed-wit-blauw.

Boe me ziech zoe good versteit

Mèt te Luikeneer.

Dao is et Vaderland

Vaan de Mastreechteneer. bis.

Boe me ouch e täölke sprik

Vol van geistigheid.

Boe et hertsje euverlöp

Vaan verdraagzaamheid.

Boe me trouw blijf aon zien stad,

Aon taol van peer en meer.

Dao is et Vaderland

Vaan de Mastreechteneer. bis.