Diversche liedekens

Een ander. III.

WAer zydy lief wellustich dierken,
Die vrau Venus vierken cond ontsteken?
Waer ick by v in dijn vergierken,
Gheenrande vreucht en zou my ghebreken:
Schoon lief mocht ick v spreken in v pauwelioen

[p. 8]

 

 

Secreet alleene, zo creghic vrede:

 

Tquaetste dat ick v zoude doen,

 

Dat waer gh’lijc Troylus dede

 

Zijn schoon Brisede.

 

 

 

Wat dedy haer, dat moet ick vraghen?

 

Dat en sou ghewaghen, niemants keelkin,

 

Als zy tsamen vergadert laghen,

 

Zy speelden vaerkins en moerkins speelkin,

 

Waer ic by v schoon lief, en hulpt mijn liefde voen,

 

Wy mochten alsulck spel spelen mede:

 

Tquaetste dat ic v zoude doen,

 

Dat waer gh’lijc Troylus dede

 

Zijn schoon Brisede.

 

 

 

Constick muteren mijn natuere,

 

Ofte mijn figuere, my ontverden,

 

Van v en waer ick dach noch huere,

[p. 9]

 

Als soudick terstont een muysken werden:

 

Ghelijc dat muysken thol souct zoud’ ick my thuwaert spoen,

 

By v te crupen haic stond oft stede,

 

Tquaetste dat ic v zoude doen,

 

Dat waer gh’lijc Troylus dede

 

Zijn schoon Brisede.

 

 

 

Mocht ic verzeylen als Jouis bootkin,

 

Die in Danaets schootkin, conste vallen,

 

Als gulden dan, dede hy d’explootkin,

 

Const ick dat, zo waer ick vry met allen:

 

O schoonste wt vrau Uenus berch, waric in prisoen,

 

Ghy schuydet niet mijn behendichede,

 

Tquaetste dat ic v zoude doen,

 

Dat waer gh’lijc Troylus dede

 

Zijn schoon Brisede.

 

 

 

Schoon liefken had ick die practijcke,

 

Dat ick in v rijcke, mocht vervroyen,

 

Noyt iemands vreughd was dies ghelijcke,

 

Noch Jasons, noch ooc Paris van Troyen,

 

Noyt amoureus en queelt so lodderlick sermoen

 

Als ic sou, waerd in mijn mueghenthede/

 

Tquaetste dat ic v zoude doen,

 

Dat waer gh’lijc Troylus dede

 

Zijn schoon Brisede.