Diversche liedekens

(1574)–Matthijs de Castelein– rechtenstatus


Een ander. II. JC weet dat schoonste Vrauken, Dwelc d’zonne noyt bescheen, Zo aerdigh een cortauken, Als onder duysent een, Haer oochskins blijncken claerder Dan blijnckende Sapphieren, Dies ghijnc zy my veel naerder Dan yemant can versieren, Wat wil ic veel cryhieren, De schoonheit haerder oghen
[pagina 6]
Heeft heuren eers bedroghen. Ick vantse tsauonts late Alleen dat weet ick wel, Met haer schoon lief op strate Secreet in Venus spel. Jck zagh daer int secrete Haer vriendelick aenschauwen, (Het hielp my) deur de splete, Dwelck haer noch zal berauwen. Wat achtick der ontrauwen, De schoonheit haerder oghen Heeft heuren eers bedroghen. Haer claeghick niet met allen, Jck claghe haer oochskins zoet, Die oock staet zonder vallen Js vaste vanden voet: Jck claegh God vanden throone Der ooghen schoon behaghen/ Want waer zy niet zo schoone Zy waer noch wter plaghen. Wat willicks veel ghewaghen, De schoonheit haerder oghen Heeft heuren eers bedroghen.
[pagina 7]
Adieu schoone Princesse Ghy hebt my wel verduld, Dijn opsien voort ick messe, Tis dijnder ooghen schuld: Ghy hebt niet el dat schoon is Dan d’opsien en tghesichte, Dies mijn adieu dijn loon is, Adieu vrau Venus nichte, Van v ist dat ick dichte, De schoonheyt uwer oghen Heent uwen eers bedroghen.