De const van rhetoriken
(1986)–Matthijs de Castelein–
Auteursrechtelijk beschermd¶ Superfluë, j: Dicht te vergheefs.¶ Die wijs es en darf niet zeere verre gaen,
Oft hy en wild hem te wandelene bestaen.
| |
[pagina 234]
| |
¶ Parabole.¶ Trijcke der hemelen (vuer diere naer
vraechden)
Es te ghelikene by thien maeghden,
Daer wy Mattheum af hooren scriuen,
Goddelick bouen sommen.
Die den Brudegom ontmoetten metten
ghedaeghden
Maer die op de olie in haer lampen traeghden,
Zullen ter bruloft moeten buten bliuen,
Ind helsch verdommen.
Tsghelijcks zonder dueght en sal niement
commen
Ten hemel binnen, hoe wijs, hoe habele,
Exemple an de naeilde ende an den cabele.
| |
¶ Cocorullen, op alle Kinderen dagh.¶ Vvaer blijft ghy schoon lief? kijct ute tcomd al,
Ic zo u eenen vollaerd gheuen: maerick en sal.
| |
¶ Andere.¶ Datmen u versmaedde, tware emmers bot wat,
Als es dyn ghesichte afgriselick en gruwelick:
Ghi hebt eenen langhen nuese ende
een breed snotgat,
Buuck ende den eers, ghelijck eenen pot plat,
Van handelijnghe valdy straf, ende ruwelick:
Ghy werdt om daghen een propre huwelick.
| |
¶ Andere.¶ Sietse my staen kiken de leelicke clekere,
Zu beghind haer naer den man te rasschene.
Machzu niet wel eenen vollaert wachten? Iazu sekere
Haer schotels staen van Kersdag noch te
wasschene.
| |
[pagina 235]
| |
¶ Morael.¶ Als Terpander zyn haerpe maeckte ghereet,
Met zeuen choerden, naer tghetal der planeten,
Ouer pate, deerste nam Iuppiter bescheet,
Den God Sol, nam ouer Mese dbeleet.
Parhipate, was onder Saturnus gheseten,
Mars Licanos, Trite Luna, magh elck weten,
Venus hadde van Paramese dbestier,
Mercurius nam Nete, in zyn secreten:
En dees harpe magh Maria syn, doidmoedig dier
Haer vij. choerden waren zoo ickt segghe hier,
Vvijsheid, ende Cracht, ieghen tviands malicie,
Hope, Ghelooue, en t'Caritatiuigh vier,
Ghetempertheid, ende Rechtveerdighe Iustitie.
Den soon, dien dese haerpe vuer haer officie
Vuudtte? was Iesus Christus, ten zeluen tye,
Gheboren vander heligher maeghd Marye.
| |
221.
¶ Vveedt dat dees tittelen in allen mannieren
Tdicht zeer verchieren, en den zin duerstralen.
Vveereldlic, moedt ghy de Comparatien hantieren,
Gheestelic de Parabolen allegieren,
Ende meest altoos Goddelick de Moralen.
Hier met illustreerd men alle talen:
Ende en mueghd ne gheen colueren sachter vaten.
Van Tsuperflue dicht, mueghdy wel falen:
Al dat ouerschiedt machmen wel achter laten.
|
|