Shit my mar lek

[p. 181]

Bylage ien

De slach om Starum op moandei 26 septimber 1345.

Troch ferkearde útlis fan 'e histoaryske boarnen is de slach by Starum troch guon histoarisy ferlein nei Warns. It wie Willem IV lykwols te dwaan om Starum, in grutte en wichtige hannelsstêd.

Yn 1345 fette greve Willem IV fan Hollân en Henegouwen it plan op om Fryslân te feroverjen. Om 't er de stêd Utert net fertrout, dy soe him yn 'e rêch oanfalle kinne, wurdt dy stêd yn 'e simmer fan 1345 seis wiken lang belegere. Hy kin de stêd net feroverje, mar dy jout him al oer en erkent Willem as har hear.

Willem bringt dan syn leger en float oer nei Inkhuzen. De Friezen binne dêr wol mei op 'e hichte en hawwe dan ek wol troch dat der in oanfal komme sil.

Op moandei 26 septimber fart de float oer de Sudersee nei Starum. It doel sil wol west ha om Starum fan twa kanten oan te fallen, want de float is yn twa parten opdield. In lyts part, sa'n 500 man, mei Willem sels oan it haad, giet oan 'e noardkant fan Starum oan lân. It oare part, fierwei it grutste, ûnder oanfiering fan Jan fan Beaumont, in omke fan Willem, docht itselde oan 'e súdkant.

De 500 man mei Willem as oanfierder, wurde fuortdaliks troch de Friezen oanfallen en allegearre deade. De swier harnaste ridders binne nei alle gedachten sûnder har hynders gjin partij foar de Friezen dy't ek gâns manmachtiger binne.

Oan 'e súdeastkant fan Starum wurdt ek omraak fochten.

[p. 182]

Ut de kaart docht ek bliken dat it om de âlde Fryske stêd Starum gyng. It legerke fan greve Willem wie gâns lytser as dat fan Beaumont De beide marren besteane net mear. Tusken de Sudermar en de see wie mar in smelle stripe, dêr't in leger maklik te kearen wie.

De Friezen wurde earst tebekdreaun nei it kleaster Sint Odulf. Letter, holpen troch de lju dy't dêrfoar Willem ferslein hawwe, binne de Friezen ynienen wer folle sterker.

[p. 183]

As de Hollanners foar it ferstân krije dat greve Willem dea is besykje se út te naaien nei de skippen ta. Dy lizze, om reden fan feiligens, net al te ticht foar de wâl, dat der fersûpe noch hiel wat Hollanners yn har besykjen om by de skippen te kommen.

Mei Willem IV kamen û.o. om: de hear fan Walencourt, de hear fan Lingne, Gautier, syn broer, hear Rasse fan Montigny, hear Jan fan Lussereulles, hear Ferry fan Hordaing, hear Jan fan Buyllemont, hear Henry fan Brisseul, hear Daniël fan Marvede mei trettjin oaren fan syn kliber en gâns oaren.

Oan 'e súdeastkant fan Starum stoaren û.o.: hear Gille Grenart, hear Thiéry fan Mauny en Jan, syn broer, de hear fan Adennehove, ferskate oare ridders en in grutte mannichte fan skyldfeinten. (Boarne: ‘De slach om Starum 1345’ fan G.R. Groustra).