Mosalect. Bloemlezing uit de Limburgse dialectliteratuur

[p. 348]

Zomeraovend
Valkenburgs

De blaar van de beukebuim aan de drie beeldsjes
Roesje zoa sjtil in de wind
En aaf en toe hèuir iech bie 't kab'le van 't water
Nog wied aaf de sjtum van e kind.

Den daag ies vergange, de zon geit weer onder
Ze sjièmert nog get door de blaar
En sjtil aan versjtörf auch 't zinge van veugel
Iech waer ze haos neet miè gewaar.

Zoa af en toe hèuir iech nog get in 't louver
Of in 't papier wat dao liegk
Woa sjtilkes e muuske of ander klei deerke
Mèt glinstrende uigskes in kiek.

De pauwhaan op Oas lièt zien sjtum nog ins hèuire
Es zaet hae den daag nog adiè
En ummer nog roesje de blaar van de beuke
Gèt andersj dat hèuir iech neet miè.

Frans Stevens