Mosalect. Bloemlezing uit de Limburgse dialectliteratuur



[pagina 185]
De joonkmaan sprik Maastrichts Huurt wat miene vrund, de joonkmaan, zeet: - heer is doorloupend zaat! - ‘Leefde en Doors, dat zien gein twie, dat is mer ei pot naat. Zoe wie stiech nao ei muilke smachs, dwingk 't kinneke um de boors. Och, wat den eine Leefde neump, dat hèt den andre Doors.’ Huurt wat miene vrund, de joonkmaan, zeet: - heer is neet gans good wies! - ‘Zoelang es Eva neet bestoont, had Adam ei paradies. En zaog heer dao ene wingerd stoon, z'n hart sloog in zien boors. Och, wat me later Leefde neumde, dat hèdde toen al Doors.’ Huurt wat miene vrund, de joonkmaan, zeet: - heer zup zech nog ins blow! - ‘Zoe vlöchtig wie de smaak vaan wien is de charme vaan ein vrow. Meh et verlange blijf altied nao wat ste ins verloors: Och, wat den eine Leefde neump, dat hèt den andre Doors.’ Th. Desir