Mosalect. Bloemlezing uit de Limburgse dialectliteratuur

[p. 173]

De stêrke
Maastrichts

Brîng nôe de lèste blomme binne
Die us de zoomer heet gebrach;
De winter steit weer te beginne:
Et kòs goon vreeze dizze nach.

En zèt ze in 't waater veur de rôete
In 'n vaas vaan 't zûuverste kristâl,
En laot ze door 't goud vaan bôete
Goon gleujen in de zonleechvâl.

Kryzânte kinne wel deteege;
Die röilden hunne geur, hun kleur,
En - teege naojaorseelend - kreege
Hun hêlheid en hun krach daoveur.

Wat teer van kleur is, zèt dat binne,
En wat vaan geur is leef en zach,
Laot daan de winter mer beginne:
De stêrke draage wel hun vrach!

Fons Tuinstra