Mosalect. Bloemlezing uit de Limburgse dialectliteratuur

[p. 53]

Wie zal 't zieë?
Heerlens

Zal - went de Hillige Krisnach geet kòmme -
oos vinster geseerd zieë mit bledjes en blòmme
va luchte kristalle, gevörms van de kouw?
Of zal d'r wink durch g'n sjtroate goa veëge
en rulse mit sjneij of mit hagel en reëge,
of àlles durchee kunt, zoedat me zich bouw
geet vroage: wat vilt...?
God wit wat He wilt.

Zal - went de Hillige Krisnach geet kòmme -
't sjweëd in de sjeij zieë en zalle de bòmme
ging hatter mieë sjpliete, de eëd drinkt gee blood?
Of zal aa satan nog tied zieë geloate
en weëd os d'r sjpegel va dèm vuurgehaote,
deë good heesj wat koad is en koad zeët aa good?
Noa wèm is oos bild...?
God wit wat He wilt.

Zal - went de Hillige Krisnach geet kòmme -
d'r miensj al mar hoeëger i hoeëgmod geklòmme
zieë, zoeë wie he noe al va Adam aaf deed?
Of huët he òp mit Die Woad te verkrachte
en bouwt noa Dieng Wet met Die leech in dees nachte
ing welt die d'r zang van d'r ingel versjteet?
Wat is da, wat gilt?
God wit wat He wilt.

Zal - went de Hillige Krisnach geet kòmme -
mie hat wie e deer zieë dat helder geet gròmme
en wilt neet gehòlpe zieë, doof is en blink?
Of zal 't oape sjtoa - Heer - vuur Die lieje,
Dieng leefde, Dieng goodheed, en entelig zieë
zieng ieëlende ònmach en weëd wie e kink,
in Dich wie versjtild?
God wit wat He wilt.

Cor Driessen