Mosalect. Bloemlezing uit de Limburgse dialectliteratuur

[p. 9]

De Limbörgse taal
Echts

Welke taal zwao gemeuj*
zwao genketig*
zwao mörg en vol saap -
seppig wie ein smautpaer*
of ein riepe merketòn?

zwao gekrutj wie mit nagelgruus en mesjaotebloom*
zwao piekant wie ei lereereblaad oet den hazepèèper...
mit dè göör van
gròffelsnaegel, junkerkes en noteblaar -

mit wäörd zwao zeut wie veese neut
en gelp* wie jòng slaaj oet den haof...
'n taal wie floer zwao zaoch
of ketelig* wie de blajer van de kònkernöllestroek*
die kan pitse wie ein wits* -
döks veultj ze roew: ein eikesjaal -

Waatfer taal
zwao vol van muziek
mit de slaag van de bookvènk op den oetergaondje*
of de bòns oet de klokkentore;
dao roesjen eike wen de wèndj aangeit -
het reet fluustert mit het wäterke
biej verdreet of in leid.

Ein taal die blinktj en sjittert:
het koper van de fanfaar op percessiedaag...

R. Geurts