'ne Gooje raod veuraof
Veurtot g'r nao de verklaoring gaot zeuke boeveur tot lache oonnötteg is, iers eve dit:
Trèk dit book ope wie 'n fles excellente wien.
Gaot néét metein gölzeg lezentere pagina nao pagina opslörpe, nein: euvertuig uuch iers vaan 't ‘bouquet’ vaan deze Mestreechse ‘Grand Cru’ in bookvörm.
Blaajert 't rösteg door, vaan väör nao achter en trök, um tot de oontdèkking te koume tot g'r bij gelegenheid vaan de 75ste verjaordaag vaan d'n auteur Pol Brounts e manjefiek, väölkleureg boekèt, geplök oet 't bèste vaan zien oeuvre, geprizzenteerd krijg.
Verhaole oet 't leve-vaan-ederen-daag, kösteleke leedtekste (mèt de meziek-partij debij!), gediechte veur groet en klein, keersverhaole, legendes en dat allemaol gesjreve en gecomponeerd in de rieke taol vaan zien hart, vaan zien stad: 't Mestreechs.
En es g'r daan dee Mestreechse ‘Grand Cru’, mèt bezej, slukske veur slukske gesavoureerd höb, daan zölt g'r bij d'n hart- en geisverwermenden aofdroonk verzöchte: dat smaak nao mie!
De Veldeke-Krink Mestreech, dee de oetgaof vaan ‘Lache is oonnötteg’ heet meugelek gemaak, heet dao mer ein antwoord op: wach rösteg aof; es Godbleef heet Pol Brounts op z'nen tachtegste weer väöl nui werk op de plaank ligke...
Dat winse veer d'n auteur en ziene lezerskrink in en boete Mestreech vaan harte touw.
Mestreech, zomer '94
Bestuur
Veldeke-Krink Mestreech
Auteursrechtelijk beschermd