Leven van Sinte Lutgart

[14] hoe dat si de sustere berespte dat si har getiden qualec seiden ende wat dar na geuiel.

Si berespte de ionfrouwen
dicke met ernste ende met trouwen
om dat si haer ghetiden nyet
wale en seiden, ende et ghescied
wel een half iaer voer har doed
dat si in har herte groed
dogen hadde, dat quam daer bi
dat si wel mercte de maget vri
datte nonnen volcomeleke
na dien dat gode was ersamleke
haer leuen nyen beterden noch har wesen

[fol. 91r]

 

Doen seid si ic weed wel dat desen

 

sustren, na mijn doed hier sal

 

ghescien iammer ende ongheual

455

want god salt ouer hen hier wreken

 

dat si har ghetiden spreken

 

so qualeke ende so ru^oecloesleke

 

Ende dan selens omu^oedeleke

 

hen betren ende corrigheren

460

ende selen gedinken der plagen ons heren

 

ende alsi betren har leuen dan tehant

 

so sal god weder af keren sijn hant

 

di hi had vte gerect teer wraken

 

ende salt weder al gu^oet maken..

465

Al dit gheuiel also alsi

 

hadde voerseght de maget vri.

 

want also saen alsi was doed

 

so wart de sterfte daer so groed

 

onder de nonnen ind covint

470

dat men also bescreuen vind

 

dat binnen alte corten tide

 

als men doen wiste verre ende wide

 

.xiiij. geproefde nonnen daer staruen

 

dier de cloester moeste daeruen

[fol. 91v]

475

dat was hen grote scade uoer waer.

 

Een geestlec man hi quam doen daer

 

die daer twe gesustre vant

 

die gestoruen waren tehant

 

daer hi misse voer sanc, ende seide

480

dat hise in een graf groef beide.

 

maer saen dar na, na deser plagen

 

als de sieke di daer laghen

 

jnd fermerye hen willechleke

 

beterden, ende volcomeleke

485

har getiden seiden ende wale

 

so verginc de sterfte temale

 

ende doen hilt op de plage na dien

 

dat sinte lutgard had voersien

 

ende dat sijt had voerseght te uoren.

490

Roept dan ane dees vtuercoren

 

vrouwe, sijn sal v nyet af gaen

 

als ghi in node sijt beuaen.