De tweede vijftigh lustige historien ofte nieuwigheden Johannis Boccatii

[Dry goede Ghesellen...]

Dry goede Ghesellen deden den Marquisaenssen Rechter binnen Florencien de broecke af vallen, terwijlen dat hy int Hoff te rechte sat. Om te bewijsen dat totte handelinghe der ghemeyne saecken eerlijcke personagien, ende tot allen dinghen gheschickt behooren ghestelt te worden.

GHy meucht hebben hooren segghen, hoe dat dickwils Potestaten tot Florencen comen uyt de Aucourtaenssen merckt, het welck een armhertigh volcxken is, ende van soo benauden ellendighen leven, dat al haer dinghen niet anders en is als een rechte luyspoockerije, ende door middel van dese haere miserie ende giericheydt, brenghense oock met heur Rechters ende Notarissen, dat veel eer een volcxken schijnt ghehaelt te wesen van achter den Ploegh oft van Schoe-lappen, dan uyt een Schole van Rechten, nu eens daer tot een Potestaet eener ghecomen zijnde, isser onder ander Rechters die hy mede brocht eener gheweest die hem selven dede noemen Meester Nicolle de S. Lepide, die veel eer int aensien een seer soet maggerken als yet anders gheleeck te wesen. Ende deser wert onder anderen over de criminele saecken gheset, ende als dat menichmaels ghebeurt dat de Borghes al en hebbense int Hof niet te doen, daer nochtans wel gaen, ist gheschiedt dat Mace del Saggo op eenen Morghenstondt eenen sijnen bekenden soeckende, daer gecomen is, ende slaeghs ghevallen zijnde dat hy desen Meester daer sach sitten, dat hem een aerdich Vogel scheen te wesen, heeft hy hem vanden hoofde totte voeten toe wel doorkeken, ende al sach hy hem eenen groenen gesprickelde hoet heel beroockt op't hooft hebben, ende eenen inckt-koker aen de Riem met een Wambeys, wiens slippen langher als des Rockx waren met meer andere seltsame dingen buyten de dracht van een eerlijck degelijck man, soo heeft hyer noch eene ghesien vande uytghelesenste nae sijn verstandt boven al d'andere, te weten de Broeck,

[fol. Aa1r]

wiens eersbodem hy sach tot halven beenen toe af-hanghen. Sijnde desen Rechter gheseten die de kleederen by gebreck van Laecken soo ghepranght aen 't lijf hadde, datse over al gaepten ende voor open waeren. Weshalven hy sonder lang te staen gapen, om die te sien, ende verlatende 'tgene hy ginc soekende, eenen nieuwen aenslach begost heeft, ende is twee van zijn mede consoorten gaen soecken, van de welcke den eenen ghenoemt was Ribi ende den anderen Mathias, sulcken drollen even als hy was, ende heeft haer gheseydt soo ghy my een vriendtschappe doen wilt, ick bids u compt toch eens int Hof met my, want ick wil u den nieuwsten gheck thoonen, die ghy oyt saecht, ende met heur int Hoff ghekomen zijnde, heeft hy hen desen aerdigen Rechter met zijn broec ghewesen, waer uyt sy van verre begonnen hebben te lacchen, ende wat naerder aen den banck ghetreden zijnde, daer mijn Heer de Rechter opgeseten was, hebbense ghesien datmer lichtelijck onder kruypen konde, ende dat boven dien de plancke daer hy zijn voeten opsettede heel ghebroocken was, soo datmer de hant metten arm ghemackelijcken door-steken konde. Doen seyde Mace teghen zijn medeghesellen: Ick wil dat wy hem dees broeck heel doen van't gat af-vallen, want het kan al te lichtelijck ghedaen worden. Waerom elck eender maets alree den middel om dat te doen, berispt ende besloten hebbende, 'tghene dat elck een doen moeste, zijnde t'sanderendaeghs daer nae smorghens weder gekomen, ende de richtkamer heel vol volcx vindende, is Mathias onder de banck ghekroopen dattet niemandt ghewaer gheworden is, ende recht onder de plaetse ghegaen daer de Rechter zijn voeten ophiel, daer na Mace aen d'een zijde van den Rechter hem naerderende heeft hy hem by zijn voorste slippe ghevat, ende Ribi aen d'ander zijde sijnde dede even alsoo ende Mace begonde te segghen:Hou mijn Heer ick bids u om Gods wille dat ghy my eer dit diefken dat hier by u staet elders wech gae, een paer leersen doet geven, die hy my ghestoolen heeft, al ist dat hy't loochent: Hoewel dat ick sach ten zijn gheen vijfthien daghen dat hy die dede versolen. Ribi riep van d'ander zijde, mijn Heere en ghelooft hem niet, 'tis een schalck, ende om dieswille dat hy nu weet dat ick hier gecomen ben om my te beclaghen van een maete die hy my gestoolen heeft, is hy nu hier gekomen ende spreect vande leersen die ick over langhe tot mijnent ghehadt hebbe, ende soo u niet en ghelieft mijn te ghelooven, ick kan u tot getuygen bybrenghen Trecca die by my is, die vette beullinckmaeckersse, met eenen anderen die 't gheene inhaelt datmen voor onse Vrouwe van verseye gheeft, diese ghesien heeft doen hy van buyten inquam. Mace en liet van d'ander zijde Ribi niet spreken, hy tierde so seer als hy conde, ende Ribi oock, middelertijdt datte Rechter opstondt om haer klachten te hooren, heeft Mathias zijn hant door een gat ghesteken ende greep den eersbodem van des Rechters broeck die hy soo stijf eene ruck gaf datse beneden afviel, overmidts dat de Rechter maegher ende ranck was. Dewelcke dit voelende niet wetende wat het was, wilde zijn broeck weder ophalen, hemselven decken ende nedersetten, dan Mace hem vast aende eene zyde houdende, ende Ribi aender anderer zijden luyde roepende. Mijn Heere ghy hebt onghelijck dat ghy mijn recht weyghert, waerom en wilt ghy my dan niet hoo-

[fol. Aa1v]

ren? waerom wilt ghy van hier nu wech gaen? Mijn Heere men en geeft hier in dese Stadt noyt gheene Citatie Brieven van eenen alsoo kleynen gheschil als dit nu is: Sy hielen hem by den rock soo langhe klappende, dat al de ghene die in de Richtkamer waeren, ghewaer werden datmen hem de Broeck afghestreecken hadde, de welcke Matthias (naer dat hyse wat teghen ghehouden hadde) daer op des Rechters hielen verlaten heeft, ende is weder uytgekropen ende deurghegaen, sonder dat hem yemandt ghesien heeft, Ribi meynende oock ghenoech ghedaen te hebben sprack: Ick zweere dat icker een Voorspraecke toe nemen sal, ende Mace van d'ander zijde den rock verlaten hebbende, seyde: Dat en sal ick niet doen, neen dan ick sal hier soo dicmaels keeren, dat ick den Rechter soo besich niet vinden en sal, als my dunct dat hy desen morghen gheweest is, ende d'een is herwaerts, ende d'ander gintswaerts ghegaen, soo haest alsse oyt conden. Mijn Heer de Rechter sijn broeck in eens yeghelijcen teghenwoordigheydt op-halende, even als oft hy uyt den bedde op ghestaen hadde, werdt doen de boeverije ghewaer, ende vraechde waer de ghene vervaeren waren die het gheschil ghehadt hadden vande Leersen ende vande Male: Dan soomen niemant vinden en conde, begon hy by Godt dit ende dat te vloecken, datmen kennisse moeste nemen, ende weten oftmen binnen Florencen ghewoon was aen de Rechters de Broecke aff te strijcken, alsse inder Rechters stoel gheseten waren. Van d'ander zijde de Potestaet dit wetende, maeckte oock een groot ghetier: Dan daer na hem door sijn vrienden vertoont zijnde geweest, dat hem dit niet en was gedaen geweest dan om te toonen dat de Florentijnen wel merckten, dat hy in stede van eerlijcke lieden tot Richters daer ghecken ghebrocht hadde, heeft hy t'sijnen besten ende om den besten coop ghezweghen, ende voor die reyse isser niet voorder nae ghetaelt.