Cupido's lusthof

(1613)–Gerrit Hendricksz. van Breughel– rechtenstatus



[pagina 143]
21. Emblemata.
HOe slecht den huysman gaet langs tveldt En gants hem met gheen vryen quelt Hoevvel hy tot sijns buermans Meyt Om tijt verdrijf veel praets uytleyt Hoe Iaep en kees van passen out Zijn in haer kintse tijt ghetrout Devvylen dit soet praten duert De Meyt lieftallich hem toegluert Cupido met sijn pijl en booch Int binnenst' van sijn herte vlooch Dies eer ghedaelet vvas de Son Moest d'huysman vryen eer hyt con.

T'boertie slecht vrijt t'meijsien soet wiens heusche trou sij Lieuen moet
[pagina 144]

Een Nieu Amoureus Liedeken: Op de Voyse. Tusschen twee clare lichten. GOddinne vander Minnen Ghy weet wie ick verhieff En wat int herte binnen De Lieffd' al liefs besieff Goddinne vroet // de Liefste soet Doet my me hebben lieff. Dat sy sonder weerlegghen Met een verheucht aenschijn Vrymoedich mach uytsegghen Ick mindren sal u pijn Oock anders gheen // dan ghy alleen Iae / jae / ghy sult hem zijn. Voor sulcke goe weldaden Ghy Cypria ydoon Sal ick vroech ende spade Volloven u persoon Door gonsticheyt // my toegheleyt Van Cupido ydoon. Laet haer u schichten voelen Int binnenste verstant Soo mach dan haest vercoelen Inwendich desen brant Die ghy my stuert // theeft lang geduert Door Lieffde abondant. De peerle mijnder ooghen Is dese Nimphe reyn Sal haer altijt verhooghen Vyt lieffden int ghemeyn Soo trou beclijft // en sy dan blijft Mijn lavende Fonteyn. Als Aurora int daghen De neveling verclaert Soo licht mijn Lief by vlaghen tGhemoet dwelck was beswaert Voor 'tbitter roet // sy suycker soet My schenckt uyt goeder aert. Tis reden dat ick eere Dees eenichste in al Van leden soet en teere Sy is / en blyven sal Den spieghel reyn // om sien alleyn tVoorleden ongheval. Het herte jong in deughen Reyn wederliefde biet / Wanneer dat het vol vreuchden Sijn alderlieffste siet / Het is verknocht // vast tsaem gebrocht
[pagina 145]
Om gants te wijcken niet. Princesse uytghelesen De goetheyts gaven groot Gheduerich zijn ghepresen By twee schoon Liefs minjoot Wanneer dat hy // en weder sy Aenbiet 'tmondelijn root. Finis.
Een nieu Amoreus Liedeken. op de Voyse. Vande Enghelsche Fortuyn. FOrtuna fel Die soo lichtveerdich keert Het vryen snel Is my t'onrecht gheleert Want grooten strijt brengt my een reyn Iongvou In plaets subijt Dat sy my troosten sou. Met reen ick mach Beclaghen d'onplaysier tGheen my doet ach Soo moyen jonghen dier Noyt ooghen droef Beschouden sulcken leet Meer dan ick hoeff Wert my ghemaeckt ghereet. Het kermen swaer Is 'slichaems voetsel cranck De tranen claer Daer nevens mynen dranck Het suchten wis Dat soo veel pijn verweckt Het decxel is Dat mijn lichaem bedeckt. De angst en sorch Van niet te zijn ontfarmt Is vaste borch Die my in coud' verwarmt Het swaer ghepeys Met bitter smerten doet Verteeren 'tvleys En oock mijn jongher bloet. Ghelijck den snee Versmiltet op het velt Lieffd' vol onvree Alsoo doet dat me smelt Mijn jonghe Ieucht / Die als den roock vergaet.
[pagina 146]
In plaets van vreucht Gheniet ick sulcken quaet Sien ick haer aen Sy d'aensicht omme went En laet my staen In duchtende ellent. Toocht mijn natuer Haer eens te spreken toe tGhesichte stuer Stelt sy / k'en weet niet hoe. Waerom dat ick Verdient heb dees wreetheyt Heb ick wel dick In mijn selfs overleyt. Ick vinde gheen Int minste sulck oorsaeck Waerom alleen Sy met my steeckt den draeck. O harde hert Denckt dat ghy zijt een mensch t Sal u oock smart Doen / so ick dan verstensch In Liefde groot / Al toocht ghy u wat schu Sterff ick den doot De schult sal blyven u. Tijdt ist dan noch Dat ghy by tijts bedenckt Eer dat ghy doch Mijn jonghe sinnen crenckt Al t'onversaecht Waer dit aen my ghetoont Van sulcken maecht Soo bitterlijck gheloont Eens nedersiet Met d'ooghen der ghenaed' En liefde biet Want tis noch niet te spaed' Het bloemken groeyt Gunt dat sijn volle was Alst lieflijck bloeyt Comt alles weer te pas. Ghewint den prijs Daer veel om wort ghedaen Soo salmen wijs V achten nu voortaen En segghen dan Dees dochter Lieffd' vermeert Aen een Iongman Die haer heeft lang gheeert.
[pagina 147]
Een peerlen Croon Mijn lieffgen dit ghelooft Sal u persoon Ghewinnen op het hooft Een loff ghemeyn Van alle Dochters soet Dat ghy so reyn By my u Dienaer doet. Lieff duysentfout Ghy hier voor loon ontfangt Mits ghy vertrout / Hem die nae u verlangt Wat ghy beleeft Vereert u lieff Minnaer Hy wedergheeft Dat soetelijck eenpaer. Princes bedacht In vreuchden t'alder stont Een goeden nacht Byblijft u lang ghesont / En voor het goet Met vriendelijck bewijs Dat ghy Lieff doet Sal ick u gheven prijs. Finis.
Een nieu Amoureus Liedeken; op de voyse. Als een jong paert, onbetoomt &c. BInnen int hert Ghevoel ick teghenstryden Met droeve smert En overstallich lyden / Sulcx comt my nu ten tyden Van een soo schoon Goddin Diet stellen can bezyden Verghetent uyt den sin. Haer suyverheyt En minnelijcke wesen Heeft my verleyt Dat soo claer was gheresen Als Apollo by desen Op synen gouden throon Hierom wort sy ghepresen Als een in schoonheyt schoon. Tghevlochten haer Den goutdraet gaet ghelijcken Bruyn ooghen claer Wt haer wijnbrauwen kijcken Die tblanck voorhooft verrijcken
[pagina 148]
En theel visagie siet Twelck doet dat ick laet blijcken Reyn Lieffd' al ist verdriet. Een mont beleeft Met lipkens als corale Dees goddin heeft Vol vrendelijcker tale Tis waer 'tgheen ick verhale Als een costlijck tresoor Staen inden mont loyale. Tandekens van yvoor. Doen ick eerst sach Dees schoon beleeft van seden Dien selven dach Wert mijn ghemoet bestreden Venus, Cupido, deden Hun crachten blijcken saen En hebben teghen reden My in haer net ghevaen. Ghevaen te zijn Is met tlijdlijckste schromen Alst Lieff devijn Soo verd' was me ghecomen / Dat tot des Minnaers vromen Door gouden schichten maer Van Venus uytghenomen Soo meed' ghevanghen waer. V milde tong Soetsprekent int verbreyden My Minnaer jong Alleen heeft gaen verleyden Want ick en cost niet scheyden Van u lacchende mont / En daer noch tusschen beyden V lieve Borskens ront. Hoe machtich rijck Dat is menich Iongvrouwe Sy gheen ghelijck Hebben by mijn Carsouvve, Want in wijsheyt ghetrouwe Met recht sy wort gheeert En ickt selfs daer voor houwe Dat sy Pallas passeert. Prince. Nae dees Princes Alleen staet mijn verlanghen Sy is Voochdes Vant lieffelijck verstranghen Och waer sy me gevanghen Int net der Lieffden goet
[pagina 149]
Souden bitter ganghen Int eynde woorden soet. Finis.
Een nieu Amoureus Liedeken; op de voyse. O ghy vervloeckte Lindeboomen, hu, hu. VVIe sal nu het droevich claghen / en leet Mijns trou Minnaers helpen draghen / dus wreet Het herte dat moet Sijn suchten brenghen voort Om soo te zijn verlicht Want de ziele soet Die schijnt bynae vermoort Door eenen fellen schicht. Wilt bedroefde ooghen weenen verbaest. Laet u tranen tsaem vereenen met haest Die ghy nu uytstort Om te zijn ontlast Van een dus swaren pack Mijn tranen vlien voort Bigghelende vast Langhs mijn visagie swack. Sucht op sucht mijn borst sal loosen int ent Onderwijl sal my verpoosen ellent tGheen de Lieffde coockt O bitter morceel. Door den bedroefden strijt Die noch langher smoockt Tot sherten verveel Door Cupido subijt. Moog'lijck sal my eer ontbreken onsacht Dat het Lieff dus verd' gheweken eens lacht. Dan het soet propoost t'Ontfanghen van haer Om te vermaken thert Dats den lieven troost Die de pyne swaer Te niet eens doende wert. Venus ghy zijt my pertye Heel strang Door u is t'ghemoet onblye
[pagina 150]

[pagina 151]

Een nieu Amoureus Liedeken: op de voyse. van Coridon en Silvia. HOe langhe sal ick dienaer trou T'onrechten zijn vergheten Van een sulck overschoon Iongvrou Wetende mijn secreten Blijft gheen party / Dus teghen my Seght Iae / wilt neen vergheten. Aen d'onghevoelijck minnen pack Heb ick veel tijts versleten En daer toe in swaer onghemack Dus dierlijck hier gheseten Wanneert is tijdt Gont my den strijdt Seght Iae / wilt neen vergheten. Een grooten brant heeft my geraect En 'tquetst wy onvermeten Het vier dat alsoo hittich blaeckt Heeft 'therte doorghevreten Mondelijn root Aensiet den noot / Seght Iae / wilt neen vergheten. Ick hebbe Liefgen langhen tijdt Ghehonghert nae tsoet eten. Dat is / alsmen soo lieflijck vrijt Gheen haters dat en weten Indien ghy acht Op dese clacht Seght Iae / wilt neen vergheten. Als een seylsteen mijn herte treckt In liefd' lang tijdt versleten Vrou Venus die heeft my perfeckt Ghebonden aen haer keten Maer als ghy wildt Reyn Dochter mildt / Seght Iae / wilt neen vergheten. Prince. Vaert wel Princes die ick verhief / Ghy blijft by my ghepresen Toont jonst / alsoo ick u heb lieff Reyn maghet uytghelesen / Seght doch wanneer Schoon Lieff op eer Dat het eens Iae sal wesen. Finis.
Een nieu Amoureus Nieu-jaer Liedt. op de voyse.
[pagina 152]
Onder die Linde groen. COmt ghy Syrenen al Met u helder gheluyt In het Pegasydes pleyn Daer de Lieffde gaet in treyn Heel crachtich van firtuyt: Hoe wel het Loovren dal Door Boreas verhart In hem selven soo verdort Dattet schier vernieticht wort Den Nimphen tot een smart Door een Christalynich ijs Na des winters coude wijs Wilt voort bringhen // daer Helder singhen // claer V stem niet en crenct Maer een Lietgen schenckt Mijn Lief tot een Nieu Iaer. Apollo sal oock wel Vermaecklijck doen het best Als Pan op Siringes fluyt Accordeeren int gheluyt Met Amphion opt lest Orpheus liefflijck spel De dieren wel vergaert Soo dat door de soete vreucht Menich herte is verheucht Vyt jonstelijcken aert / Liefdes crachten maect becant. Ghelijck alsmen Meya plant Tot t'vervreughen // maer En 'tlangh heughen // naer Dat een Minnaer heeft Dit sijn Lieffgen gheeft Tot eenen Nieuwen Iaer. Vernieut u Liefste soet In een volcomen rust Waer nae menich herte haect Dat door lieffde hittich blaect Al eert gheniet sijn lust O ghy mijn Nimphe vroet Op u rust legher sacht Vyt een vrientlijck vry bestaen Werde door reyn Lieffd' gedaē Dit Nieu Iaer hier ghebracht Liefste die in Liefden slaept Hier uyt wat genuchten raept Met tbegheeren // swaer Mits t'onberen // haer Die partydich // fijn Gheheel nydich // zijn.
[pagina 153]
Twee Liefgens int Nieu Iaer. Prince. Princesse Liefste schoon Mijn waerde ghesellin Overlegghet menichwerf Wat moeyt op des werelts erf Mijn aenbragt dese Min Om u Lieff soet persoon Die deuchdich zijt begaeft Met veel minsaemheden fier En een oversoet manier Waernae mijn herte slaeft Om te winnen int ghemoet Eens de alderliefste soet Dees reyn schoone // caer Recht mijn loone // waer Int volheyrden // trou Soo's aenveyrden // wou My voor een Nieuwe Iaer. Finis.
Sonnet. AL tgene dat de Lieffd', oyt in sich selfs besloot Tot druck en ongheneucht, oft alle soete vreuchden Met een helder geluyt, dat oyt het hert verheuchden Hier binnen in ghestelt, vermakelijcken groot, T zy hoe de Lieffde keert in allen hoochsten noot De een het blijtschap is, den andren ongheneuchden Schept hier vermaken in, ghy soet versaēde jeuchden Al schijnt de Minne straff, te wesen totter doot. 't Regael can werden soet, thart yser is te smeden sGhelijcks tvoornemen van des Liefgens stuere seden Een lang-ghesponnen draet, men halspelt niet te gaer. tZijn cloecke gangers die, al even stijf aentreden Den een het morghen wint, en d'ander stracx nu heden T is heuchlijck alst begint, int soete Nieuwe Iaer. Bedenct u tis tijdt.

Vorige Volgende

Cupido's lusthof

21. Emblemata.

Een Nieu Amoureus Liedeken:

Een nieu Amoreus Liedeken.

Een nieu Amoureus Liedeken;

Een nieu Amoureus Liedeken;

Een nieu Amoureus Liedeken:

Een nieu Amoureus Nieu-jaer Liedt.

Sonnet.

Over dit hoofdstuk/artikel

lied