Cupido's lusthof

(1613)–Gerrit Hendricksz. van Breughel– rechtenstatus



[pagina 38]
7. Emblemata.
T'Lieffdraghent hert dat noode scheyt Zijns Lieffstens jonste mede leydt De Peerle van zijn ooch vol pracht Niet blijven can vvt zijn ghedacht Cupido die sulcx recht betaelt Met vierich stralen dees doorstraelt En vverct zijn vvercken pertinent Hoevvel d'een d'ander is absent Nochtans verheughen sy een paer Off d'minnaer by zijn lieffgen vvaer Hoevvel de tonge seght Adieu Het hert blijft by de Lieffste nu.

O droue reijs voochdes adieu het licham scheyt t'hert blijft by u
[pagina 39]

Nieu Amoureus Liedeken: Op de voyse. Van Coridon en Silvia. SAl ick met droeve tranen heet Mijn zwaer verdriet ghetuyghen En met mijn ooghen sien dit leet Sonder dat ghy wilt buyghen Sal mijn jonck hart // dees bitter smart Noch langher moeten suyghen. Een langhen tijt is nu verleen Dat ick gae tvlees verteeren Altoos heb ick u Lieffste reen Gheacht een bloem met eeren Diemen met leyt // en zwaricheyt Moest plucken om tbegheeren. Doen eerst de Lieffde creech haer macht Waert ghy een spruytghen groene Dat door Apollos heete cracht Sich selfs soud' open doene Doch ghy ontsloot // meer groen als root Al in des Meys saysoene. Nu zijt ghy comen tot u tijt Een lust en welghenoeghen Ghy my u Lieff gheworden zijt Tis tijt den hoff te ploeghen Wanneert gheeft baet // ist niet te laet Tsal hem ten besten voeghen. Den hemel die niet haest en stilt Met deucht heeft u begoten En oock met schoonheyts gaven milt Tgheen my noyt heeft verdroten Twaer tijt ghepluckt // soot welgheluckt V Roosghen voortghesproten. Ghewacht heb ick nu also lang Niet sonder diep te suchten Hopende door reyn Lieffdes gang Te plucken van haer vruchten Maer nu u Looff // de Son berooff Laet ghy my in zwaer duchten. Bedroghen vind ick my voorwaer Siend u schaemroot aenschijne Als ghy nu merckten oock eenpaer De Lieffde ende pijne Och wiste ghy // wat ick al ly Ghy gaeft my Medecijne.
[pagina 40]
Ghy cunt wel speuren reyne maecht Met u winckende ooghen Wat Lieffd u mijn jonck herte draecht Die ghy niet weer comt tooghen Dies ick Ionckvrou // wel sterven wou Nu ick soo ben bedroghen. Prince. Princesse die mijn lust onthout Ick hope haest te sterven Een beter loone dit vertrout Aflijvich te verwerven Dan ghy my jont // of gheven cont Hier op des werelts erven. Finis.
Nieu-jaerliedt: Op de voyse. Ick lijd int hart pijn onghewoon. GOddinnen reyn der gheleertheyt Comt hier ter steden // uyt Lieffd beneden Van Helicon u berch verbreyt En singt met reden // uyt jonsten in vreden Den Loff en prijs van een Nimphe eerbare Want sy ist weert alleen Door Lieffd' en anders gheen Dit Nieuwe Iaere. Boven Venus Goddin expaert In schoonheyt even // is sy verheven Oock Iuno in Rijckdom vermaert Haer is ghegheven // verstant beneven Pallas wijsheyts Goddin Vol deuchts voorwaere Ick stelden vant beghin Op haer mijn hert en sin Int Nieuwe Iaere. Eerbaerlijck is mijn liefste als Diana reyne // een maecht certeyne Versocht zijnde van Satyrs vals Int groene pleyne // maer eer alleyne Dees jonck-vrou heeft bemint Voor ende naere Soo oock mijn Liefste kint De deucht altijt besint.
[pagina 41]
Int Nieuwe Iaere. Niet achten ick des werelts goet Had ick ten loone // dees maget schoone Tot haer soo streckt sin en ghemoet Onder den throone // gheen soo ydoone Die my oyt heeft behaecht In Lieffd' eenpaere Ick hope dat dees maecht Haer dienaer jonste draecht Int Nieuwe jaere. Prince. Princesse Pallas dochter schoon Godt wil u sparen // ghesont bewaren Goddinne onder themels throon Lieffdes verclaren doet openbaren Aen u mijn jonste groot Fonteyne claere Dus ick bely ter doot Lieff u mijn Lieffde groot Int Nieuwe Iaer. Finis.
Een Nieu Amoureus Liedeken: Op de voyse. Met een Minnelijcken sin, &c. VVAerom Venus schoon Goddin Verblint ghy soo de jeucht En doet door u valsche Min Haer winnen druck voor vreucht Want twerckt groot ongheneucht Mits Cupido toeveucht Vrient Vrindin // onghewin Int beghin // en den sin Verandert vol ondeucht. Al die nu Minnende zijt Acht Cupido niet meer En oock Venus raet altijt Versmaet als vol oneer Van haer neemt uwen keer Vernieut in Lieffden weer Minnens strijt // maeckt u quijt Troulijck vrijt // soo verblijt Reyn Lieffd' tsherten begheer.
[pagina 42]
Als ghy door de Lieffden gloet Minnaers u sinnen stelt Toont doch Lieffde niet om tgoet Noch om het groote gelt Na pracht siet oft ghewelt Tghemoet doch altoos stelt Metter spoet // tot een vroet Ionckvrou soet // die haest doet Verandren tgheen quelt. Een reyn Maechdelijck Ionckvrou Moet niet zijn opstinaet Wanneer als een Minnaer trou In Lieffd' haer niet verlaet Maer troost soeckt tzijner baet Volcht sy dan goeden raet Met beschou // sonder flou Op dat nou // winnen sou Haer Minnaer goet voor quaet. Prince. Princen en Princessen bly Doch vrientlijck blijft te gaer Lieffde draghet tallen ty So prijstmen u voorwaer Verheucht int wesen claer Van u Lieffste eerbaer Soo sal vry // jalousy Noch invy // blijven by Twee Lieffkens int Nieu jaer. Finis.
Nieu Amoureus Liedeken: Op de voyse. Vande Enghelsche Fortuyn, &c. AEOlus waeyt Fortuna neemt u keer Ick heb ghesaeyt Nu waer wel mijn begheer Dat ick by tijts Mocht maeyen met verdrach Veel schoon profijts Dat langh verborghen lach. Dat is een root
[pagina 43]
En cierlijck bloemken reyn Tgheen Liefflijck sproot Wt d'aerd' by een Fonteyn Vol lavens gloet Deuchtsamich en beleeft Die mijn ghemoet By haer besloten heeft. O Amstel claer Dien Iuno rijcklijck loont In u vorwaer / Een reyne Nimphien woont Wiens schoonheyt schoon En deuchtsaemheyt perfect Mijn trou persoon Thert uyt het lichaem treckt. Haer soete spraeck In alles ghemaniert Waer nae ick haeck Haer deuchdelijcken chiert Want beleeftheyt Beleefdelijcken haeckt Voorwaer gheseyt Nae een die is volmaeckt. Volmaeckt is sy En loffelijck vermaert Ghemeensaem vry En Lieffelijck van aert Twelck is een gaeff Die hoochmoedicheyt doot En maecktse braeff Diet meriteert minioot. Dit Maechtlijck zaet Als Iunos Pauwe rijck Treet over straet Heel weynich haers ghelijck Minsaem en heus Verstandich en oock vroet Lieffd' Amoureus My staech haer lieven doet. Als ick eerst creech Aen haer des cuntschaps danck Tghemoet versleech Inwendich tbloet ontspranck Mits op dat pas. Dees schoon soo ghemeensaem My daetlijck was Doch eerlijck en bequaem. Int inghewant
[pagina 44]
En tbinnenste vant hert Groeyden een brant Die nu noch grooter wert En my ontrust Doort vriendelijck aenschijn Qualijck gheblust Can sonder lieffde zijn. Het sy dan waer Sy gaet / staet oft vernacht Ick ben by haer Met hert / ziel en ghedacht Het fondament Doet blijcken seer bequaem Dat vast gheprent In mijn hart staet haer naem. O Lieffde teer Die my dus hebt ghevaen Dees reyn vol eer / Wilt oock bestrijden gaen Op datse blaeckt In sulck ghelijcke Min So wert volmaeckt De Liefde der Goddin. Schept eenen lust Dat sy my Lieft eenpaer Die niet en blust Ghelijck ick draech tot haer Dwelck talder tijt Blijft eerlijck watmen calt Hoe zwaer den strijdt Der Lieffden my oock valt. Lucina vroet Als Moeder der gheboort Mijn jonste doet In Lieffden alst behoort V lieve kint Gheduerich door verdrach Heb ick bemint / Van dat ick eerst haer sach. Vaert hier me wel Princesse reyne Bruyt Beyd' ons ghequel In eenen boesem sluyt Soo sal dan niet Vercouden d'lieffde heet Oock gheen verdriet Meer groeyen wt ons leet. Finis.

Vorige Volgende

Cupido's lusthof

7. Emblemata.

Nieu Amoureus Liedeken:

Nieu-jaerliedt:

Een Nieu Amoureus Liedeken:

Nieu Amoureus Liedeken:

Over dit hoofdstuk/artikel

lied