Lucelle

[p. 211]

⁺Argvment de chacvn des Actes de la Tragi-comedie.

Il n'est icy totalement declaré le sujet de cette Tragi-comedie par ce qu'il est assez expliqué au discours d'icelle, ains seulement le sommaire de chacun de ses actes.

Au premier & second, il se traite vn mariage d'entre le Baron de Saint-amour & Lucelle qui le rufuse, auec vne dispute s'il faut aimer ou non: l'origine & definition d'amour, & comme il en faut vser: chacun en ces deux actes est ioyeux & content.

Au troisiéme, Lucelle deuient tres-amoureuse d'Ascagne facteur de son pere, qui estoit banquier. Et apres plusieurs discours d'amourettes passez entre-eux deux, en fin l'espouse secrettement: dequoy le Baron de Saint-amour aduerti, entre en telle furie qu'il se delibere incontinent de tuer Ascagne.

Au quatriéme, ce mariage est a plein decouuert par le pere de Lucelle, pour auoir trouué sans y penser sa fille (qu'il auoit en si bonne opinion) couchee auec iceluy Ascagne: qui rend le tout si furieux & tragic, que les vns sont tenus pour morts, ceux-cy se veulent tuer, aucuns appellent la mort, les autres s'en veulent fuir; & n'y [9] a en cet acte passion des personnages qui ne soit tres-affligee & passionnee, auec les regrets & complaintes de chacun d'eux: mesme le forcenement & furie de Lucelle, qui entre en desespoir pour auoir veu mort son Ascagne tant fauori.

Au cinquiéme & dernier, Lucelle & Ascagne reputez pour morts reuiennent inesperément en conualescence: il est recognu fils d'vn Prince Palatin de Pologne. On decouure la cause iniuste de son exil: chacun se recognoist auec toute ioye & contentement. Et sur la fin le mariage commencé par Lucelle auec Ascagne se paracheue.

+ [8]