Schalmeye, inhoudende veel geestelijcke liedekens

[p. VIII]

d' Auteur aen de druckers.

GHy Druckers waer gy sijt in steden en in landen
Zijt so beleeft hier in, dit begeer ic voorwaer
Als u dese Schalmey, sal komen in de handen
En zijt dan niet gesint om die te drucken naer
Gedinct den Ackerman die met veel arbeyt swaer
den acker baut en zaeyt, met arbeyt zonder duchten
Het waer groot ongelijc dat een ander daer naer
sou comen inden oogst, en ontmaeyen sijn vruchten
sgelijcx in uwen tuyn, beplant, ten sijn geen cluchten
De fruyt-boomen verciert, met Appelen en Peeren
quame daer yemant in, gy sout daerom wel suchten
Die u schoone plaisier, al tsamen ginge weeren
Tis die ooc geenen lof, die haer alsoo geneeren
Die daer wat dat ghy hebt u soecken te onstrijcken
ghy en sout als ghyt wist, dat also niet begeeren
en wat gy niet en wilt, doet niemant desgelijcks
Ten was Ahab geen eer, al was hy Coning rijcke,
dat Naboth omt erfdeel zulcken qua loon ontfing
ooc Gaal den zoon Ebed, buyten Sichem publijcke
die in Abimelech wijnberg maect groot gestinc
Ic meene dat die twee daer na niet wel verging
Laet elc plucken het zijn, die daer van is den bauwer
wie dat ymant beneemt (seyt Syrach) sijn neering
Zynen naesten hy doot. Ic hoop op u getrauwer
't Heeft ghelt en moeyt ghecost, aen Casteleyn en Brauwer.

Schickt u naer den tijdt.