|
| |
Een Refereyn int amoreus, met een Liedeken daer op accorderende.
DIe duyster wolcke is verkeert in claerheyt,
Die nevel is nv verandert in douwe,
| |
| |
Alle mijn droefheyt is nv vreucht eenpaerheyt,
Troost heb ic ontfangen van een schoon kersouwe,
Verlost ben ick van alle benouwe,
Want mijn liefste lief heb ick ghewonnen,
Eertijts was ick voorwaer in rouwe,
Deur haren smertelicken strael heb ic veel begonnen,
Daer ick eylaes seer vast mede was ghebonnen,
Maer nv heb ick ten lesten vercregen troost,
Sy is die liefste vanden opganck der Sonnen
Totten onderganck van het west tot het oost,
Haer eewelick te beminnen is mijn propoost,
Want sy de bloem is van alle wijven,
Met haer liefde ben ick boven maten benoost,
Sy is de liefste en salse blijven.
| |
Het Liedeken gaet op die wijse: Meester Brod
die is gheseten, op eenen stoel.
COemt Scholieren, Venus dieren,
Die van mijn ghenoten zijn,
Vreucht hanteren, domineren
Wilt met my in desen tijt,
Helpt ongheneucht neder staken,
En wilt met my vreuchden maken
Laet alle solaes opstaen,
Troost van lieve heb ick ontfaen.
Boven alle die leven is sy te prijsen,
Boven alle gheboren is sy weerdich gheeert,
Mijn ghewont hert heeft sy willen spijsen,
Met confortatijven dranck, en versolaceert,
O sey sy lief, al wat u hert begheert,
Dat sal u wt oprechter liefden ghebeuren,
Zijt ghetroost, alle droefheyt van u weert,
Hebdy ghesucht wilt voortaen niet meer treuren,
O syde ick, bloeme onder alle creatueren,
Boven al die leven mach ick u wel bedancken,
| |
| |
Die niet en hebt ghewilt dat mijn lijen sou dueren,
Maer door u goetheyt hebt ghenesen den crancken,
Ick hope oock dat sy van my niet en sal wancken,
maer sal volherden in haer bedrijven,
Ick salse ghetrou zijn spijt alle nijders rancken,
Sy is de liefste ende salse blven.
Speelt op luyten, en op fluyten,
En verheucht u al ghelijck,
Wilt wtspruyten, ende wten,
Sterckt gheneucht en vreuchden rijck,
Coemt ghy lustighe fiolen,
Ick roep u tot mijnder scholen,
Doet doch al na mijn vermaen,
Troost van lieve heb ick ontfaen.
Ghelijck Thysbe Pyramo was ghehuldich,
Also heeft sy my oock belooft te wesen,
Want sy sey, weest niet meer sorchfuldich,
Laet staen u duchten, uwen druck is ghenesen,
Mach u ghesont maken mijnen persoone gepresen,
Weet dat hy u in trouwen sal gheschien,
Maer waer valscheyt in u gheresen,
Ghy soudt u moeten wachten van dien,
Ick antwoorde lief wilt sulcx niet bespien,
Laet ons te samen maken een troulick verbont,
Terstont begonst elck sijn hant te bien,
En beloofen malcanderen op dier stont,
Dit ghedaan zijnde ick worden ghesont,
Eenen eewigen lof mach ick haer wel toeschrijven,
Want sy ghenesen heeft mijn hert ghewont,
Sy is die liefste en salse blijven.
Coemt Musijckers, Rethorijckers,
Singt ons wat vreuchden soet,
Ghy practijckers, fantasijckers,
| |
| |
Coemt en hebt al goeden moet,
Wilt ons al gheneucht voorbringhen,
Speelt oft wilt lustelick singhen,
Houdt nv alle met my aen,
Troost van lief heb ick ontfaen.
Prince veel weerdigher is sy te achten,
Dan Breseda die als eenen weerhaen is ontdraeyt,
Doende ontrou Troylo by daghen en nachten,
Maer dese heeft my mijn hert ghepaeyt,
Woordekens van troost heeft sy ghesaeyt,
Dies ick voortaen in vreuchden mach leven,
Daer ic eertijts met veel verdriets was bespraeyt,
Nv heb ic troost verworven van die liefste verheven,
Dies sal sy int hert altijt staen gheschreven,
Gheen ander en salder oock in commen,
Want solaes en troost heeftse my ghegheven,
Liever en sou ick niet connen ghenommen,
Het is een blomme boven alle blommen,
Sy isse die in my alle pijn doet verstijven,
Geluckich boven alle menschen mach ick rommen
Sy is de liefste en salse blijven.
Int ghemeene, groot en cleene,
Maeckt u al by my ghepaert,
Coemt by eene, sterckt certeene,
Vreucht gheneucht na uwen aert,
Coemt hier by ghy jong ghesellen,
En wilt u voortaen niet quellen,
Doet also ick heb ghedaen,
Troost van lief heb ick ontfaen.
|
|
Auteursrechtvrij