Lustighe Amoreuse Refereynen

elck met een Liedeken daer op accorderende, seer gheneuchlick ende recreatijf

Een Refereyn int amoreus, met een Liedeken daer op accorderende.

A Dieu jonckheyt, adieu alle verblijen,
Adieu allerhande solaes by tijen,
Want aen alle zijen is my druck nakende,
Valsche fortuyne coemt my nv berijen,
Die liefste veracht my, wie sal my bevrijen,
Voor druckich bestrijen, dat ick ben smakende,
Mijn sinnen zijn altoos na mijn liefste hakende,
Nochtans weet ick wel het is verloren pijne,
Nootkens van bitterheyt ben ick nv krakende,

[p. 33r]

 

Verandert zijn haer sinnen, stuerlic staet haet aenschijne,

 

Sy is omgheset deur klappaerts fenijne,

 

Dies ick verdwijne, by daghen en by nachten,

 

O jongste jonghers, ick bid u ten fijne,

 

Wanneer ghy mint wil u voor qua tongen wachten.

Het Liedeken gaet op de wijse: Houdt nv alle aen,
>ick sal ons singhen voren.

O Tonghen quaet,

Wat hebdy my ghebrouwen,

Deur uwen raet,

Laet ick die bloem van vrouwen,

Sy wil my niet aenschouwen,

Eylaes het is u schult,

Waer sal ick my onthouwen,

T'hert is my onverdult.

Het mach my voorwaer wel vernoeyen,
Dat sy my aldus hout in Venus boeyen,
Met groot vermoeyen, en schepter vreucht // in
Hoe sou mijn jonghe jeucht, moghen ghegroeyen,
Want alle mijn leden van droefheyt bloeyen,
Sou den boom voeyen, daer moest zijn jeucht // in
My verwondert hoe sy haer daer verheucht // in
Och t'is clappaerts schult ongheloghen,
Want in haer en was noyt dan deucht // in
Maer nv is haer het net over thooft ghetoghen,
Coem ick haer tegen sy ontdraeyt my haer oogen,
En soude dan niet verandert zijn haer ghedachten,
Iae sy, dus ghy Iongers eer ghy werdt bedrogen,
Wanneer ghy mint wilt u voor quae tongen wachten.

Ick en weet gheen saeck,

Dat sy my mocht begheven,

Want noyt met spreack,

[p. 33v]

 

En heb ick yet bedreven,

 

Maer deur clappaerts aencleven,

 

Dunckt my is dit ghebeurt,

 

Dus moet ick droefheyt weven,

 

So langhe als dit duert.

 

 

 

Als ick peyse op ons vreucht vermetelick,

 

En op ons minnelick spreken onverghetelick,

 

Dat wy secretelick, hadden te samen,

 

So ontsteeckt my mijn bloet seer heetelijk,

 

Om dattet alle gheworden is verbetelick,

 

So elck is wetelick, ick machs my wel schamen,

 

Op alsulcx en had ick noyt eenich ramen,

 

Nochtans ick kent, het is nv verloren,

 

Het hebben gedaen quae tongen, God wilse pramen,

 

Tis om niet dat icker my om wil stooren,

 

Ick mach my troosten als menich te voren,

 

Want my en moghen helpen gheen clachten,

 

Niettemin ick segt wiet mach lesen oft hooren,

 

Wanneer ghy mint wilt u voor quae tongen wachten.

 

 

 

Had ick haer yet,

 

Misseyt t'eenighen stonde,

 

Maer neen ick niet,

 

Ick neem God tot oorconde,

 

Noyt heb ick haer met monde,

 

Oft eenichsins misdaen,

 

Het is een valsche vonde,

 

Tgheen dat sy my tijdt aen.

 

 

 

Prince die hier wil leven in rusten,

 

En sal nemmermeer op vrouwen achten,

 

Oft ten minsten raed'ick u met lusten,

 

Wanneer ghy mint wilt u voor quae tongen wachten.

[p. 34r]

 

Prince ghemeyn,

 

Houdt mijn vermaen in weerden,

 

Wacht u certeyn,

 

Voor clappaerts die my deerden.

 

Ghelijck als scherpe sweerden,

 

Snijden haer tonghen fel,

 

So langh ick leef op d'eerden,

 

Sal icx ghedencken wel.