Mestreechter leedsjes-cahier. Nommer 3
(1990)–They Bovens–
Auteursrechtelijk beschermd
[pagina 55]
| |
Veer höbbe geraos
op de green aon de Maos
op 't Overe en op de Baon
Bij ruizing op 't Gräötsje
of in 't Kattesträötsje
stoonte veer mèt eus neus gans väöraon.
Veer dinke zoe gere nog 'ns trök
aon de jaore es keend dao in Wiek aon de brök
In Wiek, Wiek, eus Wiek allein
vaan zjèrremiek tot de Botermijn
aon 't Kevinsje, Refuzjiehoes
aon 't Waterpeurtsje voolte veer us thoes.
Wiek, Wiek, eus Wiek allein
vaan zjèrremiek tot de Botermijn
Nörreges op de wereld veule veer us zoe riek
es in Wiek, in Wiek, in Wiek.
Eder jaor mèt de Broonk
daan steit Wiek te proonk
daan heet Wiek zie fieskleid weer aon.
't Maak zich daan sjoen
spreidt alles ten toen
vaan hoes tot hoes hingk daan de vaon.
En eder Wiekeneer
is al vreug in de weer
en gruuts op de Broonk vaan oet Wiek
Vaan wied koume ze loere
nao de worteleboere
hun persessie mèt zaank en meziek.
De kiekoete zien sjoen en prachteg verseerd
de femilies koume bij ein en jao geine mankeert.
In Wiek, Wiek enz.
|
|