Het prieelken der gheestelyker wellusten

[p. 74]

Een schoon gheestelyck liedeken van den peys,
op den toon, Die de werelt yet wel besiet, &c.

Laet ons in Godt verblijden
Sonder vermijden
Den Heere ghebenedijden
Cleyn ende groot,
Godt dancken ende loven
Die ons heeft van boven
Gegeven den peys, twas meer dan noot,
Veel menschen zynder bleven van honger doot.
En wilt dit vergeten niet,
Altsamen tot Godt vliedt,
Dat wij niet en vallen in swaerder verdriet

Godt wil ons gracie gheven,
Om deuchdelyck te leven,
Sonder sneven,
Elck nae zynen staet,
Goede borgers wilt uutroyen,
Jae teenemael verfoyen
Der Calvinisten leeringhen quaet
Met al hen ongeloove zeer obstinaet:
Want ghij ziet hoe dat
Verdorven wort die stadt,
Daer zy sayen hen quaet saet.

Wilt al hertelyck bidden,
Dat Godts gheest int midden
Van alle herten worde gheplant,
Dat liefde mach regneren,
Eendrachticheyt floreren,
Die neringe en welvaert brengt int lant
Ghy Catolycke hout hieraen de hant,
Dat Calvinus worde veriaecht,
En Luyter uutgevaecht
Met hen predicanten sonder verstant.

[p. 75]

 

Verhuyst ghij Calvinisten,

 

Vol muyterije en twisten,

 

Gy hebt te Bruessel te lange gewoont

 

Want u tirannye en u diverije

 

Hebdi ons genoech ghetoont,

 

Naer u wercken suldi worden geloont.

 

Door u valsch gheloove blint,

 

Onse kercken hebdi gheschint,

 

Wee die tot u zyn ghesint.

 

 

 

Gheestelycke persoonen

 

Wilt nu blyschap toonen,

 

Die te Bruessel zyt beswaert:

 

Als goede levende rancken

 

Wilt Godt almachtich dancken

 

Dat hij u soo lange daer heeft gespaert,

 

Nu en suldi niet meer zyn vervaert,

 

Grijpt al eenen moet,

 

Het Calvinist ghebroet

 

Gaet nu wech loopen metter spoet.

 

 

 

Den edelen Hertoch van Parmen

 

Heeft Bruessel willen ontfermen,

 

Natuerlyke liefde hem daertoe dwingt

 

Godt gheve hem prijs ende eere

 

Tes een ghenaedich Heere,

 

Die ons den peys uut liefden schinckt,

 

Goede borgers dit altyt ghedinct,

 

Wilt allen danckbaer zyn

 

Op dit termyn,

 

Dat ghy niet en valt in swaerder pyn.