49. ‘Onlangs kom van koeberg hier’.
Die liedjie van die kieskeurige jonkman van Koeberg het ons opgeskrywe uit die mond van Kolonialers wat later na die noorde verhuis het. Dit stam dan ook waarskynlik uit die suidwestelike streke van die Kaap Provinsie, miskien selfs uit die buurt van die Koeberg tussen die Paarl en Malmesbury.
Die ‘swarte jonkman van plesier’ herinner aan ‘Swart Jasper’ (vgl. B, 24), en stam moontlik uit dieselfde wêreld.
Wat die taalvorme betref, is die liedjie half-Hollands, half-Afrikaans, en vertoon dit 'n neiging tot 'n soort van Hollandse deftigheid in taalgebruik wat in daardie streke nie onbekend is nie.
Die ontknoping is verrassend en minder deftig, maar ons het hier waarskynlik met 'n fragment te doen, wat net die onaangename slot bewaar het. (Vgl. C, 30).
On-langs kom van Koe-berg hier, 'n Swar-te jonk-man van ple-sier.
Om te sien of hier of daar Na sy sin 'n juf-frou waar.
Auteursrecht onbekend