Afrikaanse volksliedjies. Deel 2. Minneliedjies


33. ‘Klein Miena's lof’. Hierdie volksliedjie, wat in die Transvaal (Potchefstroom) bekend is, lyk meer na 'n skimpliedjie of hekeldig as na 'n liefdesliedjie; maar dit behoort tot die soort van minneliedjies wat Bredero soms geskrywe het, en wat nie baie vleiend was vir die meisies nie. Hierdie liedjie is te vergelyke met die refrein van ‘Ek is 'n arme Engelsman’ (No. 22 onder rubriek B), en is 'n teëhanger van 'n liedjie soos ‘Daar bo op die berg’ ens. (vgl. No. 44, onder rubriek D), waarin die geliefde se skoonhede opgesom word, maar anders as hier. Ek sing Klein Mie-na's lof, E- - - -k sing Klein Mie-na's lof, Ja, ja... ja! Ek sing Klein Mie-na's lof.
[pagina 142]
2. ‘Haar handjies net en fraai, Staan gelyk die pote van 'n kraai, J...a, j...a, j...a! Gelyk die pote van 'n kraai! E..k sing klein Miena's lof.’ 3. ‘Haar tandjies haelwit, Staan gelyk die kole van 'n smid, J...a, j...a, j...a! Gelyk die kole van 'n smid! E...k sing klein Miena's lof!’ 4. ‘Haar voetjies waarop sy gaat, Staan gelyk 'n perdepoot op straat, J...a, j...a, j...a! Gelyk 'n perdepoot op straat! E...k sing klein Miena's lof!’ 5. ‘Haar hare net en teer, Staan gelyk die borsels van 'n beer, J...a, j...a, j...a! Gelyk die borsels van 'n beer! E..k sing klein Miena's lof!’ (Mondelinge oorlewering.)