Gemmarum et lapidum historia

De saxo arenario. Cap. CCLXXXIV.

SAxa arenaria triplicia à me obseruata sunt. Vnum quod asperum est, ex arenis crassioribus satis firmiter compactum, ob quam causam leuorem

[p. 254]

non suscipit, vtile aedificiis, quia calcem bibit. Alterum ex arenis tenuissimis, sed mixtis argenteis intersplendentib. sed adeo molle vt digitis atteri fere possit. Id prope Pragam inuenitur vbi ad aedificia expetitur & à scribis ad atramenti humiditatem absorbendam. Leui enim affrictu in arenam conuertitur albam & subtilissimam. Variat arenarium colore, Fribergi enim arenaria lutea, Rochlicii rubra, Querfordiae cinerea, Eitbeccae in Saxonia in rubro subnigra. Prope Horasdiouitium Bohemiae rubra aureis micis splendentia, inueniuntur. Variant etiam diuersis rebus grauida. Nam in nonnullis silices, conchae, pectines, aut alia corpuscula nascuntur.