Gemmarum et lapidum historia

De cornu Ammonis. Cap. CCXLVI.

AMmonis cornu speciem cornu arietini in se reuoluti refert, ac aurei coloris armatura, obductum esse videtur. Plinius lib. 31. cap. 10. inter gemmas refert, ac sequentia scribit.

[p. 216]

Hammonis cornu inter sacratissimas Aethiopiae gemmas aureo colore arietini cornu effigiem reddens. Promittitur praediuina somnia repraesentare. Solet ferreo armari hoc cornu colore, qui aluminis succo accedente, in aereum vel aureum facile mutatur; quemadmodum ferro ipso facile contingit.

⁺Ad Hoplitis species reduci potest, quia armatura constat. Interdum tamen armatura caret, ac cinerei est coloris, & nodosus quasi iuncturis cohaereat, Germanicè vocatur ein Scherhorn. Reperitur prope Hildeshemium, ac in aliis Germaniae locis. Saepe octo digitos latum est, ac aliquando pondere tres libras superat. ⁺Nonnunquam ita exiguum est, vt nucis magnitudinem non excedat. Ab hoc differt anguis putrefactus, qui in saxum commutatus, reperitur, nam hic striis & armatura caret. Ad cornu Hammonis species referri potest lapis nouae lunae figura, aurea vel ferrea armatura vestitus mediocriter durus & interdum striatus, modo magnus, modo paruus, quem Cardanus Seleniten vocat. Item alius simili figura absque armatura à cinereo colore Tephrites dictus, aliàs Menois ab eadem Lunae crescentis & corniculatae forma quam repraesentat.⁺

+ Hoplitis.

+ Locus.

+ Selenites.
Tephrites.