Gemmarum et lapidum historia

Quo pacto vltramarinus color alio modo & breuius à lapide separetur. Cap. CXLI.

Recipe lib. 1. lapidis in tenuissimum puluerem redacti, ac cum aq. clara ad porphyrium triti, & impone scutellae vitreatę donec puluis in vmbra exiccetur,

[p. 148]

quem iterum si in massam coierit, in puluerem redige. Deinde habeas in promptu picis gr. ℥ iij. resinae pini ℥ iiij. masticis ℥ iij. thuris ℥ iij. olei oliuarum ℥ ij. Patellam vitreatam supra lentum ignem pone, ac primo imponas oleum, & cum bene calidum erit, adde resinam, postea picem, deinde thus, ac postremo masticen, ac moue optimè: postea, alteri scutellae infunde & bulli parum. His peractis habeas ad manum aliud vasculum in quod pones siccum lapidis puluerem, cui affundes vnguentum dictum paulatim, mouendo spatula vt bona fiat mixtio. Tum relinque per diem mixturam, & cum auferre vis colorem, funde supra pastam aquam bullientem, ac moue & agita optimè materiam, & cum aqua incipit refrigerari eiice, ac aliam calidam affunde, idque fac donec aqua colorem trahat, atque repete toties, donec omnem colorem extraxeris. Singulas extractiones separare potes vt distinctos colores habeas.

Si color spurcitiem contraxisse videatur, ita restitues: Tantum aquae tartari adiice colori, vt ab aqua tegatur. Sine per diem, postea aqua limpida colorem ablue, & habebis mundatum.

Praeparabis lapidem ad dictum opus, hoc modo: Dum in frusta fregeris, vasculo impone ac vre. Deinde laua cum aceto, sic supererit optima pars, quae igni resistit.