Gemmarum et lapidum historia

Quo pacto Adamas sculpatur. Cap. VII.

ADamas varia figura scinditur, ceteris praestantior habetur quadrata, hoc est dum superficies in quadratam tabulam redigitur. Dum a. in talem formam

[p. 70]

adamas aptatur, id obseruari debet, vt duae tabulae laterales vnam superiorem faciant, ac laterales hypotenusam anguli recti constituant. Deinde vt vna pars superioris tabulae longior sit alteri necesse est, ita enim perfectissima illius forma est. Cui si accedat substantiae puritas, ita vt nullus color in eo appareat, plerunque 50 ducatorum precio, si ceratium ponderet aestimatur. In precii tabella vnius ceratii valor indicatur numero 130, eo numero floreni vel Thaleri vel semisolares aurei intelligi possunt, prout nempe precium intenditur vel minuitur à mercatoribus. Solent etiam adamantes in pyramidis formam ex quadrangulo emergentem sculpi, sed huiusmodi figura licet caeteris aliis praeualeat, dignitate tamen & valore figurae tabulatae cedit. Aliae figurae plerunque propter lapidis nondum sculpti formam ita eliguntur vt quam minimum ipsius corpori decedat.