Gemmarum et lapidum historia

[p. 10]

In commendationem operis Anselmi Boetii De Boodt Brugensis, de Lapidibus preciosis

Elegia Jani Lernvtii.

GEmmae, quas gremio Cybele Dea celat in almo

Ore vetustatis magna vocata parens:

Quas septem erronum constans sibi dissitus ordo

Desuper ardentis de regione Soli

Irradians insignit: Aquarum siue sub aestu

Nereides manibus vos poliere catis;

Seu Venus ipsa satas conchae natalis in aluo

Extulit, in Cyprum per freta quando means

Construit è baccis torquatum laeta monile,

Posset vt Assyrio gratior ire viro:

Siue cauernosis eiectas montium ab antris

Vistula vel Ganges proluit amne cito:

Aut animale secus dissecto in corpore praebet

Frigore concretas sine caloris ope:

Ite per ora virûm florentes luce reperta:

Et qua quaeque potest dote placere decus

Tendat honoratum: populis spectanda futuris

Gloria iam generi vestro operata manet.

Thynica non potuit tantum addere lima decoris;

Daedalus in precio dum fuit ante faber,

Quàm modo de vobis meruit bene iudicio acer

Ingeniique potens Flandricus iste Bryas,

Bωtius Anselmus, patriae lux Brugidis, atque

Idem Germanae lumen amorque plagae:

Hic gemmantis opes thesauri prodidit omnes,

Naturae indagans mira patrantis opus,

[p. 11]

 

Quae vos tam varia voluit praecellere sorte,

 

Corporis includens tot breui in orbe bonae.

 

Vos contrà meritum Doctori plectite sertum,

 

Et simul eximium condecorate caput:

 

Sic exornatum preciosis ritè lapillis,

 

Splendeat vt coelo nulla corona magis

 

Lenaeusque pater miratus, ab aethere credat

 

Decerptum fronti coniugis esse suae.

 

Cleumosio debetur honos hic indigenae, Albis

 

Cuius nunc celebri nomine laetus ouat:

 

Qui maris Eoi spoliis diadema Rudolpho

 

Compsit, & imperii nobile mactat ebur.

 

Numine Caesareo clarae ite in secula Gemmae,

 

Sit sat in abstruso vos latuisse prius.

IN ANAGRAMMA NOBILIS

Clariss. et Excellentiss. Viri

D. Anselmi Boetii.

Svmes stabile vno

PEr varios casus fortuna volubilis errat,

Vna nec stabili sors manet vlla gradu:

Cor Stabile vnde tibi Svmes, Anselme Boeti

Vno quo constant cuncta creata Deo.

Theophilvs Crystetivs

Rector Collegii Societatis Pragensis.