Den Gheestelycken leeuwercker vol godtvruchtighe liedekens ende leyssenen

(1645)–Guilielmus Bolognino– rechtenstatus


Van de Heilighe Maghet ende Martelersse Dorothea.
Siet de wijse fol. 32. O Dorothea, ghestreden Wettich die hebt hier beneden, En vergoten u reyn bloedt, Appels, Roosen die van boven Hebt gheschickt uyt u Liefs hoven, Weerdich u ons eeren doet. Patronerss' u van hun hoven De Bloem-misten dienen, loven, Stellen onder u behoedt Hun ghewas, dat d' ooghen keeren Tot den schoonsten Heer der heeren, Hunnen schepper, ons hier doet. Doch voor all' wilt onse zielen, Daer de doornen soo in krielen,
[pagina 380]
Maecken bloemich voor den Heer: Datter Tulpans aller deuchden, Tulpans oorspronck aller vreuchden, Door u bed' in wassen seer. Hyacinthen en Narcissen, Animonie, alle Lissen, Schoon Jenoeffels, Irias, Tyloos, Goubloem, Martegoenen Met jonckillien, en Pioenen, En de bloemen van Damas. Dat de Roos der hoochster minnen, Dat de Lelie reyner sinnen Daer in nemen hunnen groei: Dat de Son-bloem rechter meyningh, In een volle hertsen reyningh, Daer, ghekeert tot Godt, in gloey. Datter oock schoon boomen groeien, Seltsaem vruchten overvloeien, Vruchten van volmaeckte deught. Schoon Oranien, en Limoenen Met Granaten en Citroenen, Daer den Heer sich in verheucht. Op dat hy daer com' in rusten, Daer in nem' met u wellusten, En die brengh eens tot sijn Rijck, Dat sy op van vreucht daer springhen, Lof den Bruygom met u singhen, Hem daer dancken eeuwelijck.