Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Van Godeverde des iersten hertogen Jans brueder, ende van sijnre bruederdeilinge.

LI.

Hoe wel dats voren es vergeten,
Soe duncket mi wel noot te weten
Dat dit al hier nu si verclaert
Van den vromen Godevaert,
Brueder van den hertoge Jan,
Die den strijt te Woeronc wan;
Mids dit voren niet en es verclaert,
Hoe dese vrome Godevaert
Was ghegoedt van sinen broeder,
Soe salict u nu maken vroeder,
Ende wat oeire van hem es comen,
Soe ict ter waerheit hebbe vernomen.
Hertoge Jan, die here vermert,
Gaf sinen brueder Godevert
Voer sijn ghedeilte bruederleke
Arschot, Sichenen, Bierbeke,
Ende Sint Aechtenrode mede,
Met al der toebehoerlichede,
Daer in behouden ende bescheiden
Sinen rechten ende heerlicheiden
In sinen godshusen, alst behoert,
Van Eversbode, van Beckevort,
Ende daertoe van Bierbeke met.
Dese Godevert hadde na die wet
Van sijnre vrouwe kinder drie.
Twee dochtren ende enen sone, die
Selve vrome was ende coen,
Ende hiet her Jan van Viersoen.
Dese selve hertoge Jan bleef jammerlike
Met sinen vader voer Cortrike
In den strijt, des sijt ghewes,
Als boven claer bescreven es.
Sijn outste dochter gaf Godevert
Van Hercourt den greve vermert,
Ende gaf daer met te huwelike
Dlant van Arscot ende van Bierbeke.
Sine joncste dochter schoon
Gaf hi te wive den greve van Loen;
Met hare gaf hi die jegenode
Sichenen ende Sent Aechtenrode.
Dese greve van Loen die wan een kint,
Een dochter, aen sijn vrouwe, die sint
Ghehielict was, in haers vader leven,
Ende was den greve van Gulck gegeven,
Ende met hare, dat ghijt wet,
Sint Aechtenrode ende Sichenen met.
Dus hadden een wile te haren gebode
Sichenen ende Sente Aechtenrode
Die graven van Gulcke in haer regeren,
Ende waren der af voeght ende heeren;
Ende wanneer dat den coeplieden
Uut Brabant enege scaden ghescieden
In den lande van Gulcke, sonder bliven
Plach die hertoge aen hen te scriven,
Dat si dat in corten stonden
Verrichten daden, ende als si vonden
Daer inne waren ghebrekelijc,
Die greve van Gulck, dede haestelijc
Die hertoghe dat, groot ende smal,
Aen haer renten nemen al
Van Sichenen ende van Sint Aechtenrode.
Dit nam marcgreve Willem node,
Die doen ter tijt mercgreve was
Van Gulike, ende mids das
Vercochte hi, met snellen keere,
Sichenen, Sent Aechtenrode, den heere
Van Scoenvorst, ende daer na ghesciede
Grote scade den cooplieden
Uut Brabant binnen sinen lande.
Als hertoge Wencelijn dat kande,
Heeft hi rechtvort aen hem gescreven
Dat hi dat weder dade geven,
Ende hi der coopliede scade
Vergelden ende verrechten dade.
Hoe wel die hertoge heeft gescreven
Soe heeft hi daer weinich om gegeven;
Op hertoge Wencelijns versuec
Sloech hi herde cleinen ruec,
Mids dat hi niet in Brabant
Te verliesen en hadde erve noch lant.
Te deser tijt, dat seldi hoeren,
Was ghestedicht ende gesworen,
Tusscen hertoge Wencelijn ende hem
Van Gulck, den mercgreve Willem,
Den lantvrede, met meer ander heeren
Ende vorsten, diene holpen sweren,
Den welcken vrede na der hant
Mergreve Willem brac, alsoe van Brabant
Hertoge Wencelijn meinde claer;
Van welcken ende ander scaden swaer
Hertoge Wencelijn begerde
Richtinghe, daer hi hem tegen werde,
Ende een noch gheen des en dede,
Daerom die hertoge met mogenthede,
Met riddren ende knechten vaillant
Getogen es in Gulkerlant.